WELCOME TO WWW.HZATE.IN,
WWW.HZATE.IN hi i lo tlawh fo dawn nia!
i chanchin kha mi dang tan thawnthu ṭha leh inzirna a ni thei, email: mail@hzate.in or WhatsApp @ +919402125273
Kolasib ni tin chanchinbu rintlak
ZINGṬIAN, hi lo chhiar ve la.
Call/SMS/WhatsApp +91 98 62 254565


Thursday, 18 January 2018

ROSY

Ziaktu: H.Zate, Hmar Rûn
www.hzate.in


WhatsApp aṭangin inhmu turin min lo sawm a. Chu  min sawmna chu ka beisei phâk loh thil a nih vang leh ka awih loh em avangin, "maw" ka ti hu a.


"Eng tikah nge i haw dawn?"


"Naktipah haw ka tum a."


"I haw hmain inhmu ang!"


"maw!"



Chutia inhmuh a duh ta mai chu ka ring lova, ka beisei ngai lo. Mahse, a tak a ni si, ka va han hlim tak em! Zing khua var vat vat se amah hmuh hlan mawlh ka nghakhlel tawh. Kha zan kha zan rei ka tih ber a la ni hial awm e.



Thingtlang khua aṭanga Aizawl khawpui a a rem rem thawka awm ve ka ni a. Ka ni tin hun hman dan chu inhlawhna remchang apianga inhlawh  a ni deuh tawp mai a. Nimina ka hnathawh leh vawiin lama ka thawh a inang lo thei khawp mai a. Kar hmasa lama ka thawh leh tun kara ka thawh chin phei chu inthlauin inang lo tak a ni ṭhin. A changin lei laiin ka inhlawh a, a changin in kan sa a, a changin puakphurah ka ṭang leh ṭhin. Tlangval chutia han thawh tak tak chu ka inla tlangval hman lova nula pawh ka ngaihtuah hman lo.



 Chuti ang reng renga nun ka hman lai chuan ni khat ka inhlawh chu tlai dar 5 velah kan bang chauh a. Ka in luahna lam panin chhun lama hna thawhna chau tawh nen kawng chhukah chuan ka kal chhet chhet a. Ka ngaihtuahna kâwmin ka ngaihtuahna lamah in ropui ka lo din a, ka in din chu a tak a nih theih nana thawhrim a ṭul zia ka chhut neuh neuh a..Chutih lai chuan ka hnung lam aṭang hian hmeichhe pakhat Scooter (scooty) khalh hian, "min pui r'u!" a rawn ti tla vawn vawn mai a. Ka ngaihtuahna ram ata harhin ka hawi chho zawk a. Chu hmeichhe thlaphang hmel tak mai chuan a scooty chu  thunun zo tawh lova puitu a mamawh a ni. Ka bul a lo thlen chuan engmah ngaihtuah hman mang lo chuan ka lo pan hnai a, amah chhan nan chuan a scooty hmaah chuan ka inbarh tawp a, thui vak lo min hnawl hnu chuan a thlang a mi bang nen min sut chilhin a ding thei ta hram a. Ka lawm kher mai.


"Ka lawm lutuk." thaw deuh hrawk pah chuan a ti a. Na a neih leh neih loh ka zawt a, a neih loh thuin min chhang a, ka lawm leh zual. A tho a, nichin lawka a hmela mangang leh thlaphang hmel chu hlim leh lawm hmelin a luah  ṭan a.  Mahse, pawi ta chu chet ka tum a, ka che thei der lo. Ka kut chu a che thei a, ka kawng lam a che thei lo. Miin min rawn bial luih luih a, ka chhan nu in "i na em? i na em?" a ti thawm chu, "na love!" tiin ka chhang a.  Ka bei ngial a, mahse, ka che thei tlat lo. Ka kut chuan min rawn pantute chu ka ban a, din ka tum a. Ka kawng chin hnuai lam a che thei lo. Min han hmehsak a, a ṭhenin minhan bawisawi hnu chuan ka khel vel an hmet chu a ri ṭhawt a, ka kal leh thei ta a. Kan nulai chuan, "Ka lawm lutuk!" a ti mawlh mawlh a, kan inthlaliam ta a.



Kan chetsual aṭangin ni thum a liam tawh. Ka thawh ngai thawkin ka inhlawh leh a. Tlai khat ka haw chu ka in luahna nu chuan min kova, "hei nula pakhat Rosy hming puin a rawn zawng che a. I lo awm si lova, 'zanah min lo call mai rawh se aw.' a ti a a no. a dah ta a nih kha" a ti a. Lehkha thema no. inziak chu ka la a. Ka in luahah chuan ka lut ta a. Zan chaw ei kham chuan chu no chu ka call ta a. Nula hian min lo chhang a,


"Hello, tunge aw?!"


".... Rosy i ni em? Hei ka in luahna nu hnenah no. i lo dah em ni?!"



"e, aw ni e. Min lo bia chu ka lawm kher mai. Hmanni a i chhan tak kha ka nia. Hmuh che ka duh a, ka rawn kala i lo awm lova." a ti a. Min hmuh a duh thu leh a chhungte'n min hmuh duh thu a sawi a.



Chumi hnu chuan WhatsApp lamah kan inbe reng a. An inah leng turin min sawm a, chaw ei nghal turin min sawm bawk a. A chhungte an felin lawmthu min hrilh luam a. Ka hnathawhte min zawt a, ka sawi a, a pa chuan, "i thawh awm tawk hna dang kan ngaihtuah dawn nia." a tia kan inthlah ta a.



An ina chaw ka ei aṭanga kar khat a liam meuh chuan a pain min tiam ang ngeiin inhlawhna ṭha zawk min ngaihtuahsak a. A pa chuan a hna pakhatah enkawltu angin min dah ta a. Rinawm takin ka mawhphurna leh hna thar chu ka thawk a. A pa pawhin min fakin min duhsak khawp mai. Mahse, Rosy nen erawh vawi hnih, amah ka chhan leh chaw eia min sawm ṭum bak kha kan la inhmu lo. Mahse, WhatsApp lamah chuan kan inbe fo ṭhin a. A pain min duhsak thu leh fel min tih thu min hrilh pahin, "ka chhuang che a nia!" a ti a.


An hnuaia thawk chung chuan hun awlah Phone kaltlangin kan inkawm fova. Kan innêl ve hle tawhin ka hria. A hmel a ṭhain a fel a, min duh ve nite hian ka hre ṭhin. Mahse, an hnuaia inhlawh ve mai ka ni a ka tan beisei phak chi a ni lo tih ka hria a. Ka beisei ngam ngai lo. A hmel ṭhat thu leh a fel thute chu ka hrilh ve luam ṭhin a. Ka rilru puthmang tak erawh ka hrilh ngam ngai lo.


Ka biak dan velah chuan ka duh tih a hre ve tawhin ka hria a. A ni pawhin min haw lo tih ka hria. A tawpah phei chuan ka duh thu ka hriat loh hlanin ka rilru ka lo hrilh ve ta a. Engtin mah phei chuan min chhang lo. Ka beisei bawk hek lo.


Krismas dawn a ni a. Mahni khua ngeia hman tumin ka inbuatsaih mek a. Rosy pa hnen aṭang pawhin chawlh ka dil tawh a. A phal vek tawh nghe nghe. Ka haw hun tur ka tifel a, ka haw tur chu a lo hria a, inhmu turin min sawm ta a.



Zingah chuan min rawn be leh a, inhmuhna tur hotel te min hrilh a. "i hmingin ka book a nia aw." a rawn ti a. "dar 3 ah chuan a hmunah i awm tawh ngei ka beisei." a ti leh a. Sawmna nge thupek pawh ka hre chiah tawh lo. Mahse, zawm loh ka tum der lo.


Tlai dar 2:30 a rik chuan Kan inhmuhna tur a hotel a lo ruahmanah chuan ka ṭhu ran tawh a. Kan inbia a, a hmuna ka awm tawh thu ka hrilh a. Kawng lakah a awm thu leh minute 10 hnuaa lo thlen tur thuin min chhang a. Tichuan, nghakhlel takin ka nghak ta a. Ka nghak a, ka nghak ta zel a, tlai dar 3   riin hun a liam zel a. Dar 3 leh a chanve a rik pawh chuan a lo la thleng lo. Ka phone chu a rawn ri a, Rosy chu niin, ka la a, "khawiah nge i la awm a?" ka ti a. Mahse, min chhangtu chu Rosy a  ni ta hauh lo mai. "Hei, he phone neitu hi a chesual a," tia a rawn sawi chu mak ka ti ngei mai. Nikhaw hre lova a awm thu leh a awmna min hrilh hnu chuan hmanhmawh takin ka tlan ta a. Hotel neitute pawh chuan mak min ti hial ta ve ang. Chak takin ka tlan a, a hmun ka thlen chuan Rosy chu an lo buaipui a, ka kuah a, ka kova, min en a, a thaw hrawk a,  biak tur a awm tawh lo. Ka kuah a, ka pawm a, biak ka tum a, mahse, min chhang tur a awm tawh si lo. Min hmu tura lo kal siin kan inhmuh hmain min liamsan leh si! A na tak zet a ni.

Min liamsan mah na tih nak alaiin, a thih hnuah chauh min hmangaih thu a diary ka chhiar aṭangin ka hre leh si . Keiin phu loh ena ka en lai khan min lo hmangaih reng a, ka tan engkim a lo huam reng a. Ka biak ngam loh lai khan ka biak a lo thlahlel ṭhin a ni tih ka hre ta chauh a.  A diary ka chhiar zo chu "Rosy, Ka hmangaih che, Mangṭha le"  ka ti sap a!

18 January 2018 | Thingdawl

No comments:

Post a Comment