Labels

LightBlog

Tuesday, 10 February 2015

A'NHNU ZO TAH

Ziektu: H.Zate
– Hmar Rûn
– 20 May 2014
Ka ṭhungna ah ka khat chauin Kan ṭhung a, thil ramtin ngaituo in ka thil en pangai ka en tlawk tlawka, kan Klas rum kawtkhar chu damte in an hawng a, Pheikawk dum tle em em el hi a hung in lang a, Ka en nghawknaw hle el.
A tungin ka en pei a, a kechawn le a kerai hei nal zie dam kha aw!! Ka kuom tieng panin a hung a, ka kawl a hung tlung chun a hmai a tak ka lo en a, a hmel ṭha em em el, a rûk a ka lo hlimpui hlak le a nek a mawi um thei dinga ka lo ring ngainaw kha an thimbut a, a hmel en ringawt khawm chun hlim suol aninawh ti chu an hriet thei a. A Bienga mitthli luong ngiei ngiei hei hmu chun a piengcham lawm dinga mi fiel tum a hung ani nawh ti ka hriet thei. Kha ni a, a hung hun kha kum 1 liem ta a a hung hun chie ani a, a hun, a hmun an ang vawng a, October ni 7.. . . .
Hun a liem a, hunin Ni a hring a,Ni in Kar, Kar in Thla, Thla khawmin Kum hringin, Kumsul veiin huntam a liem tah. Kan hlimlai haiin muol an liem a Nunhlui an in changzo tah. Sienkhawm, lunglaiah ruok chu Zani lai el a thiltlung ang in a la thar si. Kha kum kha ka la hriet zing Ka hmangai em em ka hrietnaw kara mi lo hlemtu ka tawng kum chuh. October ni 7 ani a, kan sikul chu a pangngai ang bawkin kan kai nawk a, kan klas khawm kan dan pangngai ang bawkin kan rum ah inṭhungin kan hunk an hmang a. chawllâwk ani (Break) a ni a, ka ruolhai pop o tuolah an ssuok vawng a, ka pang anhawi raknaw leiin ka suok venaw a, Ka ṭhungna ah ka khat chauin Kan ṭhung a, thil ramtin ngaituo in ka thil en pangai ka en tlawk tlawka, kan Klas rum kawtkhar chu damte in an hawng a, Pheikawk dum tle em em el hi a hung in lang a, Ka en nghawknaw hle el. A tungin ka en pei a, a kechawn le a kerai hei nal zie dam kha aw!! Ka kuom tieng panin a hung a, ka kawl a hung tlung chun a hmai a tak ka lo en a, a hmel ṭha em em el, a rûk a ka lo hlimpui hlak le a nek a mawi um thei dinga ka lo ring ngainaw chu hmaisan ah ka en a, ka kawlah inṭhungin thil ramtin kan hril a, inhawi ka ti zie kha aw. Kei pasal a po a dawizep tak hi kha ni khan hmangaitu ka nei ve ti ka hriet a, a ma in a mi bêm lem nisienkhawm, ka ruolhaiin an ngeinêp ka phalnaw leiin keiin ka bêm lem angin kan langtir a, khani a inthawk khan chu sikul fe khawm inhawi ka tiin ka hlim thei em em a, a hmel khawm kha ṭha sawt sawt in ka hriet hlak.
Kan innei tieu tieu a, sikul a inhmu el chu kan dittawk tanaw a , an inah khawm ka leng ve zeu zeu hlak a, ka vawikhat lengna a chun anu in a mi lawm beknaw leiin kan zak em em a, sienkhawm, a naunu meu in a mi ṭan tlat leiin ka ngampa ve tlat. A hnunga chun ngaiah a nei ve ta a, ka leng nawk khawmin a mi mel duli ta ngainaw a, zalen takin kan hun kan hmang ta hlak. ka ringnekin ka lungril ka lo pek hman a, ka lo hmangai hman vieu ta a, ka hmangai mieu leiin ka ringzo a, a mi hlem hi ka ring ngainawh. hun hi a lo fe hrat em em a, December thla ani a, kum tawp ani a, an kohran in inkhawmpui an tlung ding leiin kan thla dul a, ama sukbuoi ka ṭi leiin zan a lem chu sms a mangṭha kan phur bak phone khawm ka phone ngainawh. zankhat chu ka hei biek a, chawmkhat kan inbiek hnung chun kan in mangṭha nawk el a. chun, keikhawm chun lekha ka tiem ve nghal a, chawmkhat lekha ka tiem hnung chun zan dar 10 vel a chun iem ka hriet anih , a ieng rengin am ami mawl ani ka biek chak tlat a, ka hei call a, an ri char char a, tukhawmin an laknawh, vawithum ka call na a chun an lak a, chu thil ri ka hriet chu annawm khawvel a ka ri hriet tak laia kalungril sukna ngawi ngawi tu chuh. Nuhmei inrum ri ani a, rinum ti leia inrum ri ani nawh. A hnung a chun pasal hi a hung ṭawng a, ‘bawi, hienghin zantin um zie ei ti aw’a ti a, ka hmangai em em, ka lo ring ve em em chun inthuok hlawp hlawp chun ‘aw’a ti mawl mawl a, ka na ngei el, ka ngai gam tanawh. Phone chu ka sie ,a ka lo call kher kher kha kan sir a, sienkhawm, a min phatsan anih ti ka hriet leiin ṭha ka ti bawk si. Ka lungril na chu ka ṭap zawi zawi a. ka lungngaini a mi hnem hlaktu le ka hlimna min tluntu khan a mi sukṭap ta si. Chu zan a inthawk chun ka bansan ta a. sikul kan lut nawk khawm chun mi biek a tum a chu ka biek nuom tanawh. Ama chun thiltlung kha ka hrietnaw sawnin ka umdan a hrietthiemnaw em em a. a hnung a ka hrietnawk danin phone kha a sie hmang a, pasal pa in kei ka nih ti a hriet phing khan a hrietnaw karin a lo pickup alo ni a. a tawp a chun thil umdan ka hril a, ngaidam a min hni a, anachu, umzie a um tanawh. Ka ringna remchang a hmang a a min phat kha na ka ti a ‘Pasal sulhnung le Lawng sulhnung hriet ninaw sienkhawm Chem mel le uire chu hmang ding zat an hrietsuok hlak’an lo ti si lei ngaidam nekin kan kiengsan lem ta a.
Hun a liem a, sikul kai khawm ni dang angin an hawi thei tanawh, nitin inhmu zing siin kan inhlat si. Ka ṭhungna ah ka khat chauin Kan ṭhung a, thil ramtin ngaituo in ka thil en pangai ka en tlawk tlawka, kan Klas rum kawtkhar chu damte in an hawng a, Pheikawk dum tle em em el hi a hung in lang a, Ka en nghawknaw hle el. A tungin ka en pei a, a kechawn le a kerai hei nal zie dam kha aw!! Ka kuom tieng panin a hung a, ka kawl a hung tlung chun a hmai a tak ka lo en a, a hmel ṭha em em el, a rûk a ka lo hlimpui hlak le a nek a mawi um thei dinga ka lo ring ngainaw kha an thimbut a, a hmel en ringawt khawm chun hlim suol aninawh ti chu an hriet thei a. A Bienga mitthli luong ngiei ngiei hei hmu chun a piengcham lawm dinga mi fiel tum a hung ani nawh ti ka hriet thei. Kha ni a, a hung hun kha kum 1 liem ta a a hung hun chie ani a, a hun, a hmun an ang vawng a, October ni 7, kan break lai ani a, ka kawlah a hung inṭhung a, nikum a a hung inṭhung lai boruok le chun an ang tanaw khawpel. A ngaizawng pa, kha zan a a min phatsanna pa le khan an in ngaizawng a, nau a pai a, sienkhawm, nei nuomloin a ṭhe nawk a chu lei a insira le thawdan ding hrelo a hung kir anih. Thil ramtin a hril a, thaw dan ding dam a min dawn a, ‘i mi hmangai hlak annaw? Mi ngaituo ta.’a ti a, chu ṭawngbau kher kher chun a mi sukhar chieng kher el. A kutah ka chel a, ‘bawi, ka hmangai hlak che, tuchen khawm hin ka hmangai ran che, sienkhawm, i chunga ringna kan nghat chu remchanga la in ringumnawna in i mi thung let lem si a, tuhin chu khuo an hnu zo tah’ ka ti a, a mitthli a bienga luong chu ka hrukfai pek a, a ditthlang lampui chu a rinum ta’m an hawi ta’m ringum taka hraw lem dingin ka'n fui ta lem a.

No comments:

Post a Comment