Tuesday, 18 August 2015

I DAWNKIR VE THIN EM

 

I DAWNKIR VE THIN EM?
-       H.zate
-       Hmar Run

Khang hun liam ta te kha nimin maia thilthleng ang maiin rilruah chuan a la thar a. NGaihtuah a titamin suangtuahna a ti kal thui ngei mai. Ngaihtuah nasat vanga kir leh thei tur zawng nise a kir awn awn awm a sin. Khang nunhluite kha suangtuahnaa chiang siin thlir hian a lang lo. ‘ Nunhlui thamral tur hi dawn ve la’ tia auh lawm lawm che ka nuam. Mahse, a rem tawh awm si lo. Hlim taka kan awm a, kan nundan zawng zawng  kha a nuam vek maiin ka hria. Khang hunlai te kha ngaihtuah kir chang hian rilru-ah a thara lunglen a tizual leh thin. Hlim taka kan lenza lai te kha i dawnkir ve thin em?
Kum tir ani a, Kan sikul chu mi hran hranin kan bel a. A then a hlui,a then a thar niin kan hlim tlang em em anih kha. ni khat chu kan class-in Social work kan nei a, kan sikul bul vel kan tifai a. kha mi ni atang khan anih kha he khawvelah hian i piang ve tih ka hriat a ka thinlung zawng zawng i luah zawh tak ni. Mipa tam zawkin ‘ khang kha chu hmeichhia ten ti mai rawh se’ an tih laiin nang chuan ‘ a hna a rum em mai’ tiin min tihfai pui anih kha. khami ni atang khan ka thinlung i luah zova, Ka hming min zawt chunga ka thiltih min han pui ngat phei kha chu ka zamchhe lutuk kha ka hming pawh ka hrilh theilo tep che anih kha. Ka hming hrilh chein ka kun chu hawichhuaka min lo en reng a kan mit a intawh laia ka zam a ka laih nasat zia kha aw. tichuan nang pawhin i hming min hrilhin kan roll No te kan inhrilh a, kan  vengte nen lam. Tichuan nangmah vangin kha ni hreawm tak kha hre hman lo lekin nuam ka lo ti ve ta anih kha. tichuan, kan inkawm nel chho ve zel a. a buaithlak ta ber chu inpawl rual siin room khatah kan awm lo kha ani. Chawlhlawka kan class-a i rawn len hun ka nghahhlel thei zia kha hre ve chu ni la mak min ti zawk hialin ka ring. Beisei taka lo thlir chein ka lo nghak che a, mahse, i lo lan ve leh ka be tha ngam leh thin lo che. Nitin deuh thaw kan inhmuh takah chuan ka ngainatna che a zuala, kan inkawm nel a. a tawpah phei chuan kan inzui ta rawt mai anih kha. mahse, kum chanve a liam chuan kan vannei nge an vanduai zawk pawh ka hre lo, zirtirtu indaihohna vangin section thiatin room khatah kan thu ho  ta a, nuam ka va han ti thin tak em.
Kan veng a lo inhnaih zel bawk nen zingtin sikul kal turin min rawn sawm a. Ka lo inpeih hman loh changa i nin theih zia te kha, i kianga awm rei ka duh vanga inpeih lo lui ka nih zia kha i hre si lo a. sikul lam pan chuan kan kal ta thin a. i bag rittak chu thuhran ka bag chu zang ti awm fahranin min ahsak ta thin a. khang hunlaia ka lawm a, ka hlim thin zia te kha aw. miin min lo chhaih fiam laia zak em em sia nuam ka tih thin zia te kha hrethiam ve tak che maw? Kan pahnihin kan kal dun rial rial a, ka hlim loh leh ka lawm loh hlaua fiamthu i thawh thin te kha aw. engmah sawilo mah la ka kianga i awm hrim hrim pawh kha ka tan chuan lawmna a tling ani tih lah i hre der si lo.  Sikul hung chhung kan luta kan thianten min lo eu dur dur laia zak tak sia ka kun lai khan engnge ka ngaihtuah thin i hria em? Kan inneih min lawmpui a min au dur dur nise ka ti thin. Nang nen chuan engkim kha a hahdamin a hlimawm a, Nunhlimna min pein beiseina min pe thin. Zirna lamah ka thiam theilo a, ka harh em em tih hria ka tan liau liau inhlawha Guide min lei te kha ka tan a va hlu em. Tun thleng hian ka lehkhabu bawmah ka la dah a sin. Ka Homework/Assignment ka thiam loh vanga in in a tanga kan in thleng hmanhmawh baklenga i rawn tlan lai te kha. Ka harh lutuk vanga ka lehkhabu ka theihnghil laia i lehkhabu in en tira ka aia vuak i tuar te kha ka tana i hlutna tizualtu ava han ni chiang tak em. Sport lama tui ka nih vanga zing ka tho theilo lutuk min kai thoa min tlan pui ve ringawt te kha i mawl ka ti dawn nge i tha ka ti zawk dawn pawh ka hrethiam lo. Chakai ka ei chak thu ka sai vang ringawt a i ei duh a zeng pawh ni lova zanah i thiante sawma chakai in lo zuk chhit ringawt te kha aw. ka tana i inpekna zawng zawng kha a va han hlu em. Mahse, a hun lai kha ka hrethiam si lo. Heti khawpa ka tana i tha chung hian huatna che ka nei. Kan darthlalang keh them i ru a, i thiante nen insemin in pheikawkah in daha hmeichhe Kekawrte en nana in hmang fo kha chu ka haw ve tlat che. Sikul leh Kan in inkara ka kekawrte en tum reng renga i tlu der fo te kha khawlo ka ti lo thei lo che. Chutah, Kekawrte en in sim a, Hnue khawih in ching leh tlat te kha mipa chu ni ve lo lang chuan Mipa zawng zawng hi anchhia ka lawh tawh ang. Class room kan lut tur chiah min lo nawra kan hmaah mipa lo dingin kan hnute-ah chiah in lo tham thin kha chu anat mai bakah a thinrim thlak. Ka hnute um ruh talh mai min thamsak vanga ka tah te pawh kha i la hre ve em ang chu maw. Ka thinrim si, mahse, ka haw phal si lo che a. keimah hi ka inhaw hial zawkin ka hria.
Kum tawp a ni a, kan sikulin farewell function kan hmang dawn a Drama-ah nupa anga kan chang dun te kha a tak nise tiin duhthu ka sam thin. Tiffin ka neih loh vanga i tiffin min ei tir a, tlai kan haw-a i ril tam lutuk vanga i pum a nat leh si te kha aw. Kal lamah tha takin kan kal dun a, haw lamah chuan Ka bag leh I bag i ah pawh tih tawh nak alaiin puak ka ngen tlat thin a nih kha. Min puak duh loh lahin ka ching hrep zel che a min paw leh nge nge thin kha ani a. khang hunlai khan ka tan hian i lo va tha tak em. Mitmeng leh chezia-ah inhaw lo viau mah ila tawngkama tiam a awm si lo. Khang hunlai te kha i dawn kir ve ngai em? Khang hunlai kan awmdan leh ka tana i inpekna zang zawng te kha an sawi hmangaihna hi a ni em? A ni thei mai ang em? Hriatthiam har ka ti a , Ka rilru a tibuai fo thin. I tana ka that vena tlemte laka i thatna chhiar sen loh te kha an sawi hmangaihna hi a ni em? Khang hunlai te kha i dawnkir ve thin em? Dawnkir vein ka rilru putang hi pu ve ang che maw? Kan inngainat viau lai khan Nang ngaia ka nat hi ka lo ring ngai lova, mahse, tunah erawh nang ngaiin ka na ta si. Nunhlui dawnkir leh Lungchhir a sawtlo ti mahse, Thiana, Khang hunlai khan tuna i chunga ka rilru put ang Hmangaihna hi i lo pu ve thin em. A sawtlo tih hre reng chung si hian Nunhlui hi ka dawnkir lo thei si lo. ‘ Rem leh thei se khang hunlai ang khan’  tih hi ka duhthusm a ni fo thin. I Dawnkir ve thin em khang nunhlui te kha.


15 August 2015, Silchar


No comments:

Post a Comment