Monday, 30 January 2017

KA NUN ARSI





Ziaktu - H.Zate
Hmar Run.


  Hmangaihna hi a tehfung awm se, he hmeichhiain ka thinlunga hmangaihna chi a tuh hi ka teh ngei ang!


Eng ka hria ni maw, TKP-in hla an zir lai chuan pawnah ka lo nghak ve reng a. "Darkar chanve vel hla kan ennawn dawn a, min lo nghak la!", tia a aw ngaihno bei zeta min sawmna kha ka nep thei thlawt lo a ni ber e!


An hla zir/ennawn ka nghah chhung chuan an zai lai chu a rukin ka en reng a, a zai ringawt pawh kha ka tan hmuhnawm a tling a ni ber e. Hmuhnawm ti viau e ti lo chuan rei ka tiin ka ning khawp mai a. Ning viau e ti lo chuan kalsan mai chu ka tum chuang der si lo. Khatiang khan TKP hla zir lai ka nghah hi ka ring ngai lo. Pawnah chuan ka vei ka vei a, a changin a zai lai ka bih leh zawk thin. Khawvel hmeichhe zai ka hmuh tawh ah chuan ka mit la ber leh hmuhnawm ka tih ber a la ni hial awm e. He nu vang hian zanin hian Biak in ka lut ve chu a ni si a, chu mai ni lovin a hla zir ka la nghak zui a.


Ruihhlo ka ti nasa a, ka ti a ni  mai lova, ka rui a, ka rui ni mai lovin min salbeh a ni zawk. Ruihtheihthil an sawi zawng zawng hi ka tan a mikhual lova, Mizoram state zimte a hmuh theih chu tih loh ka nei lo. Khawtlang tan hman tlak chu sawi loh, ka hnawk a, kohhran tan phei chuan tha thawh ka nei lo, a hmingin nu leh pa vangin Baptist ruhkawl chu ka ni ve a. Biak In kawng hi ka zawh lohna chin pawh ka hre tawh lo.  Ka nun, buai leh berh taka ka hman lai chuan he nula hi ka tawng a, ka nun hian kawng eng a zawh ta a ni.
______



Ka thianpain a star em vanga kan len tum a ka rui che buai min buaipui atanga inhria kan ni a. Inhriat danah chuan a fuh lo ber awm e. Mak tak maiin kha mi zan atang khan min ngaihsakin min ngaihven em em mai a. Kan inhmuh changte hian leng turin min sawm thin a, ka leng ve ngei thin. Mahse, a nu leh pa chu an lawm chiah lo. A nu leh pain min mil loh em vang chuan ka leng fo duh bik lova. Mahse, kan inhmuin kan inbe fo mai. Chutia inbe ngun ta chu ka nun dan atanga tal chhuak turin min pui a, min fuih bawk a, min enkawl bawk thin! Ka zu chak min han buaipui zet chu a hah ve viau thinin ka ring. Inkhawm turin min sawm fova, mahse, “Zaipawla i telpui pawh hi duh huna kan khalh fal thei an awm ve tho. Engmah in ni bik lo!”, hi ka ti leh mai thin. A changin, “Min en hrek hrek emaw a ni ang a, a la tel lo seng luh tum aiin, a tel leh chhandam ni tawh bak in inngaihsak ngai hleinem!”, ti tein ka chhang thin. Mahse, ka hria, a ni erawh hi chu a danglam! A danglam tlat a lawm. Ka sawi te ang hi a ni ve lo. A ni chuan ka thlarau nun min hmangaih vangin min ngaihsakin min ngaihven a, ka tan a hun a seng thin.

Ruihhlo lakah chuan tlem tlemin tal chhuak hret hret mahila, a changin ka lo ti leh nghek mai thin a. A hriatin a rilru a na thei em em a, tih vak ngaihna a hre bik si lo. Thla tam fe chutia kan inkawm a min buaipui hnu chuan hmangaihnaah kan tlu lut ta reng mai! Kan kohhran leh Khawtlang a nula fel ber mai , kei , khawtlang buaina ral nena kan han inzui chu sawi kan hlawh kher mai. Mahse, chung zawng aia ka tana hreawm chu, nun ho taka lo hmang thin kha a ni nen kan inngaizawnga fawh khat pawh a fawh ve theih loh hi a ni! Vawi khat pawh fawh ka tum a, ka hmaiah min beng a, hmeichhe ben mah nise a nuam lutuk hran lo. Tilui chu ni ila, ka hneh ang, mahse, ka zah tlat!

Amah vangin ka nun a inthlak a, min tawngtai sak a bang lova, min kaihruai reng a. Mahse, inkhawm tur erawh chuan min sawm chhuak zo lo a ni ber e.













Beidawng mai lovin a bei tang tang a, tunah chuan camp-ah amah vanga lutin chhandamna changin ruihhlo ka bansan tawh a. Ka hmel pawh a fai ve sar tawh. E, taka, zanin ngei hian a sawmna chhangin biak inah ka lut ve a sin. Biak inah kan han inzui lut a, hma a hruai a, a hnungah ka han zui zet chu khawvel zawng zawng hian mit bial pawp pawp khawp hian min en a ni berin ka hria! Ka zak a, hawi pawh ka hawichhuak ngam lo. Ka nu leh pa mawlh mai kha an lawm! He nula chak lo hi ka nun thlak tur hian a chak tawk em a ni! A nunah Krista a nei tlat avangin!

Inkhawm kan banga, ka nu leh pain min chibai a, ka thiante; TKP Hruaitu lo ni tawhte pawh in min chibai luam a. Min en hrek hrek pawh an awm. Ka nuin kan nula-i chu a ko hranga, eng tak an sawi ni maw! Hmangaihna hi a tehfung awm se, he hmeichhiain ka thinlunga hmangaihna chi a tuh hi ka teh ngei ang! Mipui nawlpui an haw hnu chuan hla zir/ennawn turin min luhsan leh ta a. Keimah chauhin ka awm rek rek a.

Ka darah min rawn beng tharh a, ka phu zawk a, hla zir an lo bang tawh chu niin, “I va phu nasa ve. Engnge i lo ngaihtuah a?”, a ti chu “engmah ni love.”, tih leh kal rawt ka rual nghal a. Kan haw dun ta a. Kawnga kan kal lai chu insi lek lekin kan kal a, nuam ti viau mahila ka zam ve tlat! Hmeichhia aia Ruihhlo thlang thinin Nula ka kalpui ta mai chu mak ka tiin ka nun a inthlak chiang lutuk hi keimah ngei pawh hian ka ring lo zawk. Chhandam ka ni tih inhriaa Biak in ka hmu ve ta mai te hi a mak ka ti lo thei lo. Kal pah chuan thil kan sawi a, ka nun vawng tur leh insiam tha tura theih tawpa bei zel turin min fuih a, bible chhiar ngun tura min chah pahin, ka tana a tawngtai fo thu a sawi a. Chutia kan kal lai chuan an in zawn kan thleng a, a tlai tawh em mai a, an inah chuan ka lut duh ta lova, “I fel e!”, tih pahin ka biangah a fawp zauh a, kuah pah a “Hetah pawh”, tia ka hmui ka kawh chuan, “Thla hnih chauh chu nghak ve mai la!”, a ti a, “Nia, ka nupui i nih hunah le.”, ka ti a. Ka nun Arsi ani a, ka fate tan a ni leh zel dawn chu a nih hi! “Mangtha Muttui!”, tiin kan inmangtha ta a.

30 January 2017 | Thingdawl

Pic Credits: Mimi Tlau & Mawia Chawngthu







No comments:

Post a Comment