Labels

LightBlog

Tuesday, 24 January 2017

KAR KHAT INLAICHINNA













Pic: Hlimpuii Ralte
- H.Zate
Hmar Run.

Chu tlangval pawisawi lo leh sual hre lo awm a mawi chuan zan khat chu a chanchin ziaksak turin min ngen a. Ka khawngaih em avangin ka han ziahsak ve a. Mahse, a ngenna avangin hming dah a ni lo.



_Facebook_ a ka _status_ rawn _comment_ tu nula chu ka hriat ngai a ni hauh lo mai. Ka'n chhang ve ngial a. A _Profile_ ka en nghal a, chutia a thlalak thenkhat en a ka buai lai chuan _Friend Request_ min lo thawn hlauh mai a. A thlalak en a ka lo duh ve deuh a nih vangin ka _confirm_ rang kher mai. A thlalak ka en zel a. A duhawm ka tiin ka rilru a la a, a thalak atang ringawtin a lakah ka lo luangliam nghal a ni ber e.
A thlalak ka _comment_ a, ka chhaih ka chhaih a, _inbox_ lamah ka tuan a. Kan inbe nel chho zel a. Zan khat chhung lekin nambar inpein _WhatsApp_ ah kan lut nghal der mai!
Ni dang niin hmeichhe dang chu ni se, _inbox_ chu sawi loh, a thalak pawh ka _comment_ kher lovang, mahse, he hmeichhia erawh a danglam tlat! Amah a danglam ni lovin ka rilru puthmang leh a chunga ka rilru puthmang a danglam zawk a ni e.
A tuk nileng chuan tih tur ka neih loh vangin inah ka awm a. A ni damlo bawk nen _WhatsApp_ lamah kan inkawm char char a. A ni nena inkawm chu ka ning thei lo ni mai lovin kan inkawm loh chuan ka awm thei lo a ni mah zawk! A buai avanga darkar chanve kan inkawm thei lo pawh buai takte hian ka buai hman a ni !
Zan a lo ni a, kan inkawm leh a. A thil sawi apiang ka hlimpui a, tihbuai hlau tak siin ka kawm a. tibuaitu ka nih loh zia min hrilh pah a, "Kawm tur dang ka nei lo hrim hrim a!", a han ti zet chu, "Chu hmun ruak chu luah theih ka va'n chak!", tih hi ka thawn lo thei lo. Zei tak maia min chhangin kan inkawm a, inngaizawng si lo, rilru a inpawh tak siin kha zan kha dar 12 thleng kan meng a ni.
A ni thumna pawh chu a pangngai ang bawkin kan inkawm a, mahse, ka rilrua hnawhtu awm chuan min kam run thung si! Sawi tlang dawt hreh tak si hian amah ka duhzia leh a bialpa nih ve ka duhzia chu ka sawi zeuh zeuh a. Nilengin kan hlim a ni ber mai.
Zan a lo ni a, kan inkawm leh a. He zanah zet hi chuan ka insum zo tawh lo. Ka duhzia ka sawi phawng mai a. ka beisei phak lovin ka tan a rem a. Nuam ka va han ti tehlul em! Kha zan tluka ka tana zan nuam leh hlimawm kha a awm tawh kher awm love. ' _ka rilru lawmin a lo khat, i hmangaihna ka dawn hian!_ ', an tih ang deuh kha ka ni ber e. Ka zang huih a, ka rilru a hnawhtu awm ka sawi chhuak chu hahdam huai te pawhin ka inhria!
Ni 4-6 chhung chu nuam tak leh inpawh takin hun kan hmang a. Nuam ka tiin ka nun kha a zalen vah mai a ni.
Mahse, ni 6na zan a lo thleng a. Kan inhriat hmaa a ngaihzawng, a duh em em, chu rawn langin, a nunah bu khuar a rawn tum leh tan a. A niin hnar lo tum teh mahse, a hmangaih miau avangin a hnar thei si lo. Kum fe inngaizawng tawh an ni a, an boruak chhiat laiin kei ka lo lang thut a, kan ni ta a ni zawk miau si a. A hmangaih leh a nun a lo hlan tawh lo lang leh chuan ka laka a rilru puthmang a thlak danglam chiang kher mai!. Inkawm reng siin lawm a kim tawh lo. A rul tawk chauhin min chhang a, kan inbiak lahin a ni chanchin lo chu sawi tur a hre tawh lo. Ka hriatthiam a vangin ngawih ka chuh a, a nun hlimna tur a nih chuan tah zawk ka thlang a. A mak a ni, ka lo hmangaih hman tlat mai!
A changin a thinrim thut a, kan inkawm hlei thei lo a ni ber e! Ni 7na a lo thleng a, inbe reng siin kan inbe fuh hlei thei lo. A changin mipa dang chanchin a sawi a, a changin thil dang daih. Min pawm tawh si a, min hnar leh kha a duh si lo. A ni chuan ka nat hlau takin min la ngaihtuah a. Mahse, lawm a kim si lo.
Ka tel lovin a hahdam a, ka tel ve hian tibuaitu mai ka ni tawh si a. Chutianga awm reng ai chuan a hlimna tura kalsan ka duh ta a. Ni 7na zan chuan ma rilru hi a buai map map mai a. Ka hlimna nge a hlimna?! tih chu ka zawhna a ni ta.
A tawpah chuan heti hian thutlukna ka siam thei ta a. Ka hlimna aiin a hlimna, a nuih chuan ka tah paw'n a pawi lo. A hlim chuan ka nun hian a hlimpui zawk ngei dawn si a.



Tichuan, a hlimna ka duh vangin ka hmangaih chu a hlimna lam kawng zawh turin tap insum chungin ka thlah liam ta a.
Kha kar khat inlaichinna kha ka tan chuan ka nun sawi danglam tu leh ka tawn ngai loh hlimna min petu a ni a. Ka nuna kar khat nuam leh hlimawm ber a ni. Hei ai hian nat phah dawn mahila ka theihnghilh phal lo. Piang nawn leh dawn pawh ni ila, kha hun kha tawn leh ngei ka duh.
Mahse, a hnua ka natna erawh hian dam tih a nei thei tawh ngai lo vang.
23 January 2017 | Thingdawl




*_H.ZATE Android Apps download la_*
https://drive.google.com/file/d/0B8qq8OoYXBGLWGxtckFEV1JlUzQ/

No comments:

Post a Comment