Saturday, 1 April 2017

KA HMANGAIH CHE; MAHSE, MANGȚHA


Pic : Berema Chhakchhuak



Ziaktu : H.Zate ,
Hmar Rûn.
Ka inhlawhnaah min rawn call vangin kan inbia a, kan inbiak zawh chuan a thlalak ka en a. Chutih lai tak chuan kan zinga inhlawh ve vai mistiri chu lo kalin, "chhelo ve, * tawh em?! Zei khawp mai!" a ti a. Mak ka tia, mahse, min fiam a nih ringin, "nia a chhe lo khawp mai, mahse, ka la * lo." Ka ti a. "He nula chu a zei a nia aw!" a tih zawm zat a, Mak ti deuh chung chuan ka nui mai mai a. ka phone chu ka dah ta a. 

Kum khat lai a liam ve ta, he a chanchin ka sawi mek nen hian intawngin kan inngaizawng a, kan hlim thei hle. Ka ngainain ka ring zova, a ni pawhin min ring zovin ka tan engkim min hlan a phal thu a sawi fo țhin. Mahse, ka hmangaihna vang leh a niin min hmangaihna remchanga laa a natna thlen ka duh loh vangin hmuia infawh bak chu engmah ka thlenpui ngai lo.
Min ngaih thu leh ka ngaih thu kan infah dun fo țhin a. A lakah ka rinna ka nghat a, a ni nen chuan engkim hi a nuam ni berin ka hre țhin.
A ni chu ka innghahna leh ka beiseina  a ni a. A ni lo chu hmeichhe dang pawh ka ngaihtuah thei lova ka ngaituahsan phal hek lo.  A chhan chu ka laka a rinna tihchhiat ka duh lova, ka hmangaih tlat vang a ni.
Engkim inhretawnin kan inpawh em em a, a chhungte leh ka chhungte paw'n min hre tawh a, țhiante pawhin 'innei' mai turin min fiam fo țhin. Mahse, thawhchhuah mumal nei lova nupui neih ngawt erawh ka duhin ka ngam chai si lo. Khawvel hmeichhe dang zawng hnâwl a ka thlan hi hrehawm  taka nun  a hmang tur chu ka phal lo a ni. Hna zawn pahina țul țul thawkin ka inhlawh ve țhin a, a changin lei lai, a changin in sakah te ka inhlawh ve țhin.
Chu vai mistiri min fiamna nia ka hriat chuan ka rilru a luah riau a.  A tuka hna kan thawh leh chuan ka ko pêng a, thlalak chu hmuh lehin ka zawt chiang ta a. An lo * tawh thu leh a laka a inzawrh țhin thu a sawi a, a khal thu leh a zei thu thlengin a sawi luam a. A titi tui ngang mai. Kei lah thinrimin ka sa pup pup mai si. Mahse, insum ngaiin ka hre si a. "Ka awih lo, he nu hi chu a fel a sin!" ka la ti hram a. Mizo nula a * hnem tawh thu leh he nu phei hi chu  a ti ta mai a.
Ka awih loh thu leh a fiahna ka hmuh loh chuan ka awih loh thuin ka la chhang fan a. Chupa chuan uang tak maiin, a fiah ngam thu a sawi a. Bawl titih, fak titih, dil titih a ni tin ka dil fo hnu, kar khat liam hnu chuan kan vaia chhan Fiah turin hun a ruat tur thuin min chhang a. A no.  min pein ka no. Ka pe ve ta a.
Ka hmangaihi nen chuan pangngai takin kan la inbia a, engmah hre lo angin ka la awm a, mahse, ka rilru ah erawh a rukin ka vawng reng a. A rukin ka na em em ringawt mai a ni.
Zan khat chu vai mistiri chuan min lo call a, "hei ka inah a lo kal dawn a, a fiahna i hmu duh em?" a ti a. "Aw" tia chhan leh video call a min hmuhtir turin ka hrilh a, kan nula-i luh dawn hnaih chuan video call in, a pindan sir kilah chuan a dah ta a.  Chu pindana an chet dan engkim mai chu ka pindan ațangin ka en a. Hmuhnawm lam aiin rilru hi a na ngawih ngawih mai a ni. Engmah ka  thei lova, ka bing mup mup mai a ni.
An thil tih an zawh chuan video call chu off in, kan nulai chu ka call a, "ka țhiante inah ka leng a. Ka lo be leh ang che!" min ti a.
Chu zan ațang chuan, ka hmangaihi chu kalsan turin thutlukna ka siam ta a. Ka hmangaih em vangin mualpho taka inchhala, kalsan lovin, dam taka kalsan zai ka rel ta a.
Țha tak leh mawi takin ka thlah a. Ka hmangaih em vangin a mualpho ka phal thlawt si lo. Mahse, kan vai mistiri erawh ka hnawhbo tak kha!
Ka hmangaihi'n ka țhen chhan min zawt a, "min hmangaih lo em ni?!" tia min zawh pawhin engmah ka sawi lo, ka hmangaih thua chhangin, "KA HMANGAIH CHE; MAHSE, MANGȚHA!" tia ka thlah che a ngai a ni, tiin ka hmangaihna hmang țangkaia min bumtu leh a nunin Hnam nun tilangin hnam pum a timualpho a ni tih hre duh hauh lova  nun hmang duh  chu damchhung atan ka nun ațangin ka hnawt kiang ta zawk a ni.
30  March 2017 | Thingdawl
https://hzate.wordpress.com/2017/03/30/ka-hmangaih-che-mahse-mangtha/

No comments:

Post a Comment