Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Tuesday, 1 August 2017

A HUN NGEIAH A HLU

Ziektu: H.Zate, Hmar Rûn

Chu tleirawl ditum le hmelțha em em, inri har har chu a hmangai em emin a tawk dan ang anga umin a taksa chu châknain a sip a ni deu tak tah. A mitmeng de sawr a enin, a hmangai chu a kuo mawl mawl a, khawsik leia inrum ni si lovin a'nrûm hlat hlat ta a. Infâk zo an tum am a nih ti awl khawpin an inthlakhlain an infawp nasa a. 

Sienkhawm, a pâr mawina thliek tuma bei mektu chu a suollêt ve ran a. A theitawpin bei ngiel sienkhawm pasal tha na na na chu a hne naw tiengpang a ni tah.
A hmela innui hmel mawi em em hlak kha țitna le lunginrimnain a sip tah. A biengah mitthli/mittui luongin, a tawpah chun a țap suok ta hawm hawm el a. "I mi hmangai a ni chun lunginsiettakin ka insuong ve theina um sun hi chu mi suksie pêk naw hram rawh." tiin a ngen lawm lawm a. 
Satene koham tak ang el a, Tleirawl pâr vullai thliek tumtu hlak chun, "I mi hnangai tak tak   a ni chun ka thil tum hi min hlawsam tir naw ti nih!" a ti ve bawk a. An dit le an nuom dân a'nang ta nawh. Sienkhawm, chu tleirawl, en ela zuomum hmel chu a tak ramah chun zuom el chi a lo ni nawh ti a hriet a. A ngaisang ta lem a.  A tawpa chun a hmangai mitthli chu a en thei ta bik nawh, "Ka hmangai che!" tiin a'nthla ta a.
Chu tleirawl chun a ngenna a sukhlawtling pêk leia lawmthu hril pumin, "Thilpek inang zingah i piengchama thil pek am hlu lem a ta, ni danga mi?" a ti a. "Piengchama mi ngei chu hlu lem naw nim!" tiin a hmangai em em chun a lo dawn a. 
Chu phing chun, "Ka hmangai che a. I ta dingin iengkhawm inro ka nei nawh. I nuom chun tu khawm hin i dit le i phût hi ka pek thei che a, ka phal annawm. Sienkhawm, Lawițhat zana Nuhmeiin a hmangai ta dinga a'n hlan thei hlu tak hi a hlutna um lova tuta inhlan che ka nuom naw lei lem a nih." a ti a.
"Lawițhat zana i hmangai, i nuhmei thienghlimna thliek am hlu lem a ta, a hmaa mi?" a ti nawk a. "Lawițhat zan!" tiin a lo dawn nâwk a. 
"Chulei chun annawm, i ta dinga thilpêk hlu tak inhlan ka nuom leiin annawm tuhin ka nuom naw!" a ti a. "Châkna nei naw bik ka ni nawh. Sienkhawm, ka hmangai tak hi a ta dinga ka inhlan thei hlu tak hi, a hun tak, a hlut hun Lawițhat zanah ngei inhlan ka nuom lei a nih." 
Thil hi a hunah ngei a hlu raw hlak a.  A hunah naw chun thil hlu tak khawmin hlutna a nei nawh. Arasi lim le in cheimawina bakah Krismas thingkunghai hi Krismasah naw chu a hlu nawh. Birthday Gift khawm Birthday ah ngei a hlu a, Birthday Gift a hunah pe lovin an sunghai thi niin pe inla a lawm vang ngawt an tih. Lum laia vûr inpek a hlu ang bawkin, Thlasik a Thingpui lum inpêk a hlu.
Sex khawm hi Nupa kara dinga siem a ni a. Nupa karah a hlu a, nupa karah naw chu suol tirdakum niin a hlutna a bo hlak. Nupa kara hlimpui dinga siem Sex hi nupa karah ni lova hlimpui tumhai chun an țappui rawp hlak.
17 July 2017 | Guwahati
Lo him la, lo hlim la, Dam takin i hun hmanglai kha lo hmang la, Nupain an hlimpui hi țappui lo tum naw rawh! ) 

1 comment:

  1. Thil hrim hrim hi a hun taka mama a lo hlu a ni ie.

    ReplyDelete