Tuesday, 1 August 2017

MIN HNÂWL ZAWK MAI RAWH

Ziaktu- H.Zate, Hmar Rûn
Ka thiannu chuan, tap a insut hlep hlep chungin a ngaihzawng/bialpa hnenah, "I rilruah hmun ka chang ve tak tak lova, Min hmangaih lo  a nih chuan, Min chelh reng lovin Min hnawl hawk mai rawh. Ka dam zawk ang!," a ti a.
Hriatpuitua ka tan tawhah chuan a la nuam lo ber awm e. Chu tawngkam chuan ka rilru a khawih a,  "I anka nem tal," an ti thin emaw tih laia, "Min hnawl zawk mai rawh." han tih tawl mai chuh. 

A ni a sin. "Nei ve si a, hman theih loh ai chuan neih loh a nuam zawk," an lo ti thin tak e. "I lung ka dum si loh chuan, khiangawi la mi tawnah, ka lawm a kim awm e," pawh an lo tih thin kha.  "Ei theih loh Sa neih ai chuan, Ei theih Mai an a tui zawk!"
Mizote hi pawl emaw khawtlanga inhmang nasa ber kan ni hial lo'ng maw? tih tur khawpin kan inhmang nasa hlawm a. Hruaitu tha tak tak lo chhuakin, pawl tha tak takah an chhuah thin. Pawl belh tlak loh pawh hruaituin a zir chuan mipui, khawtlang mai Bakah ram tana belh tlak leh rin ngam an ni thin. Mi endawng leh ngaihnep, tlusawp mai tur pawh an tung ding a, Beiseina thar siamsakin pawl ropuiah an din thin. Hruaitu tha chuan beisei tur awm tawh lo hnuah pawh a thawhpuite leh mipuite tan beiseina a pein a siamsak thin a. Hruaitu tha lote tan mipui an chakna a nih laiin Hruaitu tha erawh mipuite chakna a ni tlat lawi si. Beidawnna ruam ata hruaichhuakin beiseina tlang chhipah a chuankaipui thin. Duhthusam chu a takah chantirin , mitthla maia an lo hmuh thin chu mit ngeiin a hmuhtir thin.
 Hruaitu tha chuan theihtawp chhuahin a bei a. Amah leh a chhungkaw tana hlawkna awm miah loah pawh pawl emaw mipui tana tha a nih phawt chuan a thawk/ti mai thin. Tlanchhiatna hun remchang tam tak hmu mahse a tlanchhe ngai lo. Beidawnna ruamah pawh beiseina mei de ve ve a hmu a, chu a Beiseina ngei chuan mipui a kaihruai thin. Mipui an beidawn hnuah pawh a ni chuan Mahni chauha tih tur pawh nise a ti talh talh thin.
Mahse, a lehlamho chu kan sawi tawh lehling thawk hi an ni. Mahni hamthatna turah lo chuan a thawk leih lova. A tana tha lo turah a fehchhuak ngai lo. Channa a awmin a kir a, mawhphurna pehhel dan phet a ngaihtuah fo thin. A mawhphurna miin an hrilhin tawngtam a ti a, an hrilh loh lah chuan thawh a tum bawk si lo. A thawh tum lah chuan thawk tam ta ber emaw a inti a, a uang fo thin. Sawiseltu a tawn vein a khinglet a amah a hniam phah thin. Hruaitu a nihna theihnghilhin Hotu emaw a inti a, Lal a tum a, ropui a tum bawk thin. Ropui a tum luatah hruaitu a ni tih a theinghilh fo thin. Ropuina zawnga buaiho hian ngaihnep an hlawh a. Mi dang tan Beidawnna mai an Siam sak a, Hruaitu a inti ve hle thung!. Pawl leh rawng a bawlsak mipuite aiin ama hna a ngaipawimawh a, mipuite chunga lengah a inngai a, tuma'n a lakah Beiseina an nei lova, an beidawnpui zawk. Inlak mi len hi Ropuina emaw an ti fova, an ropui lutuk a rawng an bawlsakten an bel ngam lo fo thin.  Hruaitu ni ve si, mawhphurna hlen lo;  Chhawr theih loh hruaitu chu Hmeh theih loh Sa neih ang an ni.
Hengho hi rawng an bawlsak ten an ning a, an ei lova. Zah a hnekin an ngainep zawk!. Bansan mai turin an duh a, mahse,  an ni lahin an nihna chelh an la tum fan si. Mipui lungawi lo chuan"Ei theih loh Sa neih ai chuan ei theih Mai-an a tui zawk," tiin an hnawl fova, a nih loh vek pawhin "Min Hnawl Zawk Mai Rawh!" tiin thu tawp an hlan fo thin.
06 June 2016 | Thingdawl

No comments:

Post a Comment