Labels

LightBlog

Wednesday, 2 August 2017

A DANG SI LO


Ziaktu: H.Zate, Hmar Rûn
Chu Naute chuan min rawn ban a, min chhaih ang zar zar a. Tui ka in lai chuan nui kerh kerh chung hian min lo fiam ve a. A bianga piai pahin pawm tumin ka ban a, min ban ve nghal. A nu chuan min pe ve mai bawk a, kan inpawm a, kan infiam a, kan ri herh herh ta mai a ni. A nu chuan a tih turte a tih zawh chuan rawn lâk pahin, 'i fiam peih ang tal hian a pâ hian fiam peih ve chu nise,,' a tih lai mek chuan, 'i pasal a nih kha. Mi hriatah sawi suh!' ka lo ti vat a. 

Kum tam tak la vei lo mahse, a pasal nena an inkara fa piang thei tur khawp erawh chuan a lo vei ve ta reng mai. 
Mizoram a College pakhatah kan kal a, Țhian ve mai kan ni. Kan țhianho kan inkâwm a, a ni Ka cousin hmeichhia pawh chu hmeichhe dang kâwm lovin kan zingah a tâl ve mai țhin. Kan hlim a, kan nui a, kan lawm a, kan uang a, nun nuam zawng zawng hi kan hmang ho a ni deuh ber mai.  Kan nui uar uar a, ka țe tuar tuar a, ka nui leh hawk hawk a, kan ri bawrh bawrh țhin.
An in hnuai luahin ka khawsa ve naw naw a. Mahnia awm ka ni bawk nen ka in luah hi chu a hming mai a ni. An inah hun ka hmang hnem zawk. Ni e, Ka ni fanu a ni a. Ka ni in hnuaia awm ka ni a. Duh ni ila, an ina khawsa thei ka ni. Mahse, ka duh miau loh avangin lâwm lo chungin ka ni pasal chuan an in hnuai chu min luah tir ta a ni. Ka ni hi ka pa pa leh a pa unau an ni a. Inhnai lutuk erawh kan ni tawh lo.
Ka han khawsa ve naw naw a. College kal hovin kan inkâwm a, kan hlim thei hle. Kha mi zana thil thleng a thlen hma zawng kha chuan unau inkâwm satliah mai kan ni a, țhian angin kan inkâwm ve mai. Mahse, kha thil thlen hnu kha chuan unau anga kan inhmangaihna chu mipa leh hmeichhe inkara hmangaihna, khawvel țawngin a hrilhfiah thiam loh hmangaihna ngêi mai chuan min phuar ta si!
A nû leh pa an zin a, ka riahpui a. Beer in kan châk tlat pek a. Kan lam a, kan in ta ngei mai a. Chutah chuan le, kan titi a. Thil kan sawi a, kan sawi zel a. Nalh ka tih thua țanin a tâwpah chuan, 'Kei pawh le' tiin âm takin kan infâwp ta a. Infawh bâk chu kan thleng lo.
Chu zân ațang chuan unau kha hmangaihah kan inchhuah ta a.   Kan ni tin nun hman chu a nuamin a hlimawm a. Ka inngainain ințhen rêng kan tum lo, A pa hnen ațanga thu dengkhawng tak kan hriat hma kha chuan. College kal te hi a nuam riau a, ka room a a rawn kal te pawh hian nuam riau hian ka hre tawh. 
Haw lam leh kal lam kan kalin kan haw dun  a. Inhaw lo tih takah engkim mai kha a hlimawm vek mai a ni. Țhiante zingah pawh a nuam thei hle a. Mahse, mahse, nun hi kan duh ang ngawtin a kal thei si lo.
Zirna kan zova, kan khuaah hawin hna hrang hrang ka thawk ve tawh a.  A pain  pasal neih lam te ngaihtuah tura tiin a pasal tura an duh nen lam a sawi thu ka lo hria a. 'Kan inhmangaih a lawm!' tih chi a ni tawh lo. Hun a kal zel a, ruahmanna an kalpui zel a. A niin a pate a hnial ngam lova, kei lahin ka hrilh ngam hek lo. 
Tichuan, pasal nei mai tur nen chuan kan inkawp ta a nih chu! Hun a kal zel a, a pasal neih hmain vawi khat chu kan inhmu leh hrâm a. Inthlahlel em emin kan infawp a. Mahse, a pasal tana hlu ber, a thianghlimna erawh ka khawih chhe phal lo.
Tunah chuan pasal neiin fa hial an nei tawh a.  Aizawl ka zin țumin a fanu rawn puain prog pakhatah a lo tel ve a.  Ka hmu chu ava han mawi teh lul êm! Hmanah mi kha ni tawh lo mahse, amah a la dang si lo. A țhatna chu ka tân a dang chuang lo. Prog kan hmang zova, Mi chu an țin sang sang a. 
Chu Naute chuan min rawn ban a, min chhaih ang zar zar a. Tui ka in lai chuan nui kerh kerh chung hian min lo fiam ve a. A bianga piai pahin pawm tumin ka ban a, min ban ve nghal. A nu chuan min pe ve mai bawk a, kan inpawm a, kan infiam a, kan ri herh herh ta mai a ni. A nu chuan a tih turte a tih zawh chuan rawn lâk pahin, 'i fiam peih ang tal hian a pâ hian fiam peih ve chu nise,' a tih lai mek chuan, 'i pasal a nih kha. Mi hriatah sawi suh!' ka lo ti vat a. 
A pasalin a duat thu leh hmangaih taka a enkawl thu ka hriatin ka lawm a. Chhungkaw hlim tak an nih thu min hrilh phei chu ka lawm lehzual. 'Mahse, hmangaih ber nang i ni lo erawh a kim lo țhin' a tih erawh chuan rilru a hnehin lunglen a kai tho hle. 
 A naute pawm fawh tum ni awm taka kunin mi hmuh loh lai chuan duhthawh taka ka lo fawh țhin a hmuiah ngei mai chuan ni lovin a chalah ka fawp zauh a, 'Ka la hmangaih reng che!' ka ti sap a. Min rawn en pahin, 'Kei pawhin' a rawn ti a. Ka hmangaih, ka unaunu ni bawk, mi nupui duhlai chu thlalel tak chungin Ka kalsan  ta a.
 Kan hun leh nun tawn a dang a, nunhlui changin kum tam liam tawh Mahse, ka thinlunga hmangaihna erawh a la dang si lo! 
28 July 2017 | Guwahati

No comments:

Post a Comment