Saturday, 12 August 2017

CHU TLANGVAL CHU

Ziektu : H.Zate, Hmar Rûn
Chu tlangvalin kan hotel a sin a hung thaw a inthawk chun kan hlawkin, thil fe dan khawm a'nfu vieuin ka hriet a. A felin a ringum a, chang vel a thiem bawk. 

Kan thil zawr bâng, a nawng hai hi pei dinga ka ti chun inpâm hmel deuin a pei hlak a. Ni ie, pei el naw chu kannta ding chun thaw dan a um ta chuong nawh.  A zinga hmang nawk tlak a ni ta chuong si nawh. A fel em leiin ka ring zova, kan dawr khawm ama ngawtin a kharin a hawng  hlak.
A hung thawk a inthawk a thla khat a liem meu chun kan sin thawhai laia inthawkin, "Zana a țin hin thil a hâwn zie hlak a!" ti thu ka dawng a. Thil a siețha a, chu chu zanah a hawn hlak thu a hril nawk lem chun ka lung a sen a, Ka lung a awinawin ka lawm naw kher el. Sienkhawm, thil hi tukver pakhat a inthawk chau a thlir nuom naw mi ka ni leiin ka la to hri a.
Zan a ni a, dan pangngaiin mi dang an țin ta a. Kei khawm, enthlak ka nuom leiin țin ding anga inhrilin, hmun danga ka fe ding leia chabi ruok chu ka room kawtkhar kawla lo sie el dingin ka hril a. 'awle,' tiin a mi dawn a, mi en khawm mi en lêm lo chun a thil sukfai lai chu a sukfai miel miel a. Suok angin tuolah ri ka siem hnungin ka lut nawk a. A rukin to țawkin, a hmu thei nawna hmuna inthupin ka en ran a. Hmun dang a sukfai zova, ka lo suok a, tukver a inthawk ka en nawk a,  a suok tawm chun hmunnawk bâwm a inthawk chun Polithin hi a hung phawr a. Chu polithin chu a Mansa (bag) ah paiin , a suok ta a.
Chu ka hmu hnung zet chun, 'zingah chu inhawi hmu naw ti nih!' tiin ka lo ngaituo a. Ka lungrila intar up up pum chun a fena tieng a chun ka zui a. Kawtthler lien ainthawkin kawtthler chin lemah a lut a, a neka chinah a lut nawk a, chuonga kawtthler tin deu thaw a fang hnung chun in țawp bar lo umah hin a lut a. Chu inah chun Pitar le Putar hi an lo um a. An ni chun an lo lâwm hmel khawp el. Chawmkhat an ințhung hnung chun a thil pai chu a phawr a, a pêk ta a. An phawr a, an hei en a, thlengah sawpin an fâk mawl mawl a. An fâk mek chu darkar khat vel liem taa pei dinga ka ti , Chow kan zawr bâng kha a ni ran el. Inhnik ti hmel em.em chun an fâk a.  Chu tarhai chun, 'Kan lâwm taluo!' tiin lawmthu an hril mawl mawl a. 'Nang hi chu aw!' an ti lai chun, 'iengkhawm a ni naw kha.' a ti a. 'Hei țin el tâng ka tih.' ti le suok a'nruol a. 
A suok hnung chun chu inah chun ka lut ve nawk a. An mi hei hmu chun mak an tiin an mi ți hmel khawp el! Ți naw dinga ka hril hnung chun chu tlangval chanchin le an chanchin chu ka'n dawn ta a.
Fak zawng thei ta naw an ni leiin chu tlangval chun an fak ding a pêk hlak thu le, Zan tin hieng hin a pêk zie hlak thu an mi hril ta a. Mak ka tiin ka lungril  a hne kher el. 'Zan tin maw?' ka ti a. 'aw' an ti a. Zan tin pek ding chun thil nawng kan nei ran si nawh. A hnung chun, 'a châng chun Bu pangngai dam mi hung pêk hlak annawm!' 
Karei ! Hi tlangval hi ka lo tluk naw takzet a nih! Kha bu kha a fak dinga ka pêk hlak a ni annawm. Kei khawm kan hotela mi hi ka fâk el hlak leiin,  Tlangval, makhata um a ni leiin ka'n chawitir ve hlak kha a ni a. Thil zawr bâng chuongliem kan nei naw pha a fâk ding khawm a lo pêk hlak a nih.
Chu zan a inthawk chun ka lungril a dang hlawk a. Zan tin chu tlangval chu fak ding ka'n chawitir ta a. Chu chau khawm chu ni lovin, Kan thil zawr zo naw chu pei el ta lovin, chu tarhai anga mi baivai hai fâk ding semin chu tlangval leh chun zan tin , kan suok ta a! A hnunga lem chun a chuong pe el ta lovin, mi dang ta dinga malsawmna ni dingin an ta ding lieu lieuin kan siem ta lem a nih!
'I fâk seng naw i pei kha, tu am a ni ta ding chun malsawmna a ni thei!'
09 August 2017 | G.
( Fiction )

No comments:

Post a Comment