Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Friday, 18 August 2017

INSIRIN BÂN A CHEN




Ziektu : H.Zate, Hmar Rûn.

Chu khawpui ka lut tir chun ka ngampa naw khawp el a,  Freshers Meet kan hmang hma po lem chu hmelhriet khawm ka nei bek naw leiin Class ka fe ti naw chu ka in hluo ah chun ka'n khum țawk țawk hlak. College a kai , ka țin a, ka in hluoah bawk ka um nawk el hlak.


Freshers Meet chu kan college el khelah Hnamin   an buotsai a hai ka țhang hnung chun miin an mi hriet ve ta a. Mi hretu an tam ang bawkin mi hêltu khawm an tam. Hmel le piengah a mawi le nal tawk ka lo ni ve bawk leh mi beiseitu an tam khawp el.
Zing tin zan tin WhatsApp ah msg dawn ding a lo um ter tuor a, ka dawn pei naw deu khawm an um. Kan College a mi vai hai khawmin an mi beisei ve ran a. Ka luck hun ka tawng ve ni ngei ding ana, dawn seng naw msg dam ka dawng ve hlak!
Mi heltu tam tak laia chun ka dit ve le ka lungril hlui vetu a um a, Hmar tlangval ngei niin a felin a hmel khawm a țha khawp el. Ama chu ka ngaisak deu tak a, A tir chun ka indu khum hlak a, sienkhawm, dit ve tho na na na chu indu khum ran thei a ni nawh. Ni tin, zan tin a mi dit thu a hril a. A mi ngaisak peiin a mi ngaiven pei bawk. Ka mamaw le ka harsatnaah ama chu ka țangkaipui khawp el.
Hun a fe pei a, thla khat vâng a mi beisei hnung chun kei khawm, ka lulul ka'n suo zing thei bik ta nawh a. 'Kei khawmin!' tiin a ta dinga ka rem thu ka hril ve ta a. Ka hril țum chun a lawm khawp el. 
Pasal pangngai tak a ni leiin a mi ngaisak el khelah a mi'n za thiem a. Mawi naw takin ka lakah a châng ngai nawh. Sienkhawm, a mi dit hne em leiin ka lakah a thikthu a sie a. A mi veng tlat hi a ni ringawt.
Inngaizawng le indit ta chu remchang ta phawtah kan inhmu a. Kan  inpawl a, kan hlimin kan nun kha inhawi ka ti em em hlak. A mi duotin ka ta dingin a țhain a fel a.  Kan college alo inang pei bawk leh kan inkawp deu rawt el a nih. 
Zanah khawm a thei chen chen kan inpawl a, WhatsApp a hai kan inbiek hlak. Zan khat chu a hung leng a, a mi hmangai zie a mi hril a, lawmthu ka hril mawl mawl a, a vawi khatna dingin a mi fawp a, kei khawmin ka lo dawnlet ve a.  'Ka hmangai che a. Vawi khat i lo chang suol tak chu i nunhlui a ni a, pawi ka ti nawh. Sienkhawm, i nun tharah ruok chu thienghlim takin aw!' a ti a. 'I nunhlui ni lovin, i nun thar lem hi ka ta ding a ni sk a!' a ti nawk a. Lawițhat zanah chau sex hmang ta dingin a mi'n fui a. Sienkhawm, lo intem ta ta ding chun, mi kuo mektu ka ngaizawngpa chu châknain a sip ti ka hriet thei a. A kekawr pawng khawm ka hmu hmai naw chieng hle! Inthlakhla em emin kan inthla a. An in hluona ding a mi țin san a.
Zingkar a msg ka dawng chu ka en a, 'Khawvel thil mawi po po neka ka thlang hi, Khawvel mawina sukzuoltu dingin ka ta dingin vul zing rawh aw?' ti hi a lo inziek a. Innui ver ver pumin ka thil thaw ding chu ka thaw a.
A mi dittu an tam a, mi lo be nuom hlak an tam. Ni khat chu ama class a lak laklaw laiin Vai pakhat, mi dit vetu, hmel țha veng vawng, pieng nal zet el chun a mi hung biek a, kan inbiek a. Thil ram tin kan hril zo chun College Canteen ah thil a mi'n chawkpek a. Kan lo hlim khawp el. Ka in hluonaa mi'n thla a tum tlat a, a mi ngen tlat leiin a bike ah chun ka chuong a, a mi'n thla tah a.  Lawmthu ka hril chun, 'kei khawm!' a ti a, a kir nawk nghal a.
Zanah chun a mi hung biek a, thil tam tak kan hril a. Ka ngaizawngpa leh khawm kan inbiek a. Anachu kan inbiek sawt nawh. Vaipa leh chun kan inbiek ran a. Zan dang khawm a mi dit thu hril hlak tho sienkhawm, chu zan chun a hril ngun khawp el. Sawt fang kan inbiek hnung chun kan inmangțha ta a.
A zing a ni a. Ka ngaizawngpa chun inhmu a rawt a. Kan inhmu ta ngei a. 'Vai bike a phurtu che kha tu am a ni?' ti chu a thil mi'n dawn hmasa tak a nih. Ka hrilpek a, anachu, a lawm naw khawp el. 'A dit che ti i hriet ve ran a!' a ti a. 'i dit ve a ni hiel naw maw?!' ti le ka phone lak a'n ruol a. Ka dit naw thu hrilin, 'nang chau hi annawm ka dit.' Ka ti a. Sienkhawm, a hmelah chuna thik a ni ti a'nlang chieng khawp el. Ka phone a en a, kan inbiekna hai a en a, a mi hni leia ka thlalak ka thawn le, a mi'n thla laia thla kan inlak hai a hmu chun a lung a sen kher el. Ka hril ngiel khawmin a lungril a dam thei nawh. A lungsen le lungril na taluo chu a mit a sen vawng a. A mitthli a far fap a. Kei hlak chu tlawm nuom bik lo chu ka țhang ve țung a. Ka phone ka lak a, ka zamsan dei a.
Zan a hung ni a. A dan pangngai bawkin a mi hunh biek nawk a. A thikthu le a lawm naw thu a hril  nawk a. Ka nghawk le lungsen chun ințhe ka rawt a. Sienkhawm, a nuom nawh. Anachu, ințhe chu ka rawt tluk tah a. Ngaidam a mi hni a, 'Ka hmangai le dit em lei che hi  chân che hi ka'n lau em a nih!' tiin a thukthu siet san a hril a. Ka pawm nuom chuong ta nawh. 'Nang ang, pasal thikthu sie deu ka dit nawh!' ka ti a. 'Bawite, hmangaitu lungril hi i hrietthiem ve si naw maw?!' a ti a.  'Mi kuoma i hlim khawm lawm hlak sienkhawm, chân che a'nlau lei hin a nâ nawk hlak si a ni hi!' tiin a sunzawm a.
Ngaidam mi hniin a lo thaw suol thu a hril a. Sienkhawm, ka pawm nuom nawh. A thikthu siet lei kha  zalen naw rieu a inhrietna ka nei tlat.  Țhe sawng dingin thutlukna ka siem ta lem a.
18 August 2017 | G

No comments:

Post a Comment