Labels

LightBlog

Saturday, 5 August 2017

MIN PHATSAN SI


Model: ArEs-i
Photographer : LD Sailo
Ziaktu: H.Zate, Hmar Rûn.
Zan dar 11 a ni a. Ka sim , ka hman țhan zawkah pawisa a awm loh vangin ka hman ngai loh zâwk ațangin ka hmangai êm êm , a tana ka nun pum hlan tura rinawmna ka lo tiam tawh chu ka call a. A ri ral ral a, a la a, "E, duat, i rawn call khiah a, Flight i nghâk mêk em ni?" a ti a. Ka la chhâng lo. "Duat!" ka ti a. A ni chuan, "Duat, lo haw vat a, ka hmu châk tawh che. Kan pahnih tân Hotel nuam deuh ka lo book a, a hma ang khân nuam deuhin hun kan hmang leh dawn nia!". 


A ni, tlangval duhawm nena kan intawn ațang khan kum 1 chu a lo liam leh ta reng mai.   A thawhna Office dawr turin ka nû nen kan kal a. Kan hmanhmawh , a ni hmanhmawh si chu kan insu a, a Thingpui ken lai sa ver vawr chu min tihbuak ta a. A thlen chin a hriat a, a sa kher mai. Ka taksa a sa vek a. Ka pum hian ka sa hut hutin ka hria.  Ka intuai nawk nawk a, Washroom ah ka lut, ka insil. Mahse, awmzia a awm chuang lo. A ni chu inthlahrung takin ka nu bulah chuan a lo awm a. A la sa vut vut mai si. Ka nu chu a naute hnenah lo buaipui tura tiin Clinic a min hruai a tum ta a. A sa em mai a, bakah, a tihsual a ni a, Sên tir ka tum ve hrim hrim a, ka zui ta ringawt a. Kan inentir zawh chuan damdawite a lei vek a, an office lamah kan kal leh a, ka nu chuan a tihtur zovin haw turin min lo nghak mek a. Kan rem ti lo viau naa, min thlah a tum țalh vangin min thlah ta a. Chu chu kan thawnthu ințan dan a ni! Chu ni chu a liam a, zan a lo ni a, a rawn lêng a. A rawn leng zan tin ta mai a ni.
Inhmu zinga, inkawm zing leh inhaw lo na na na chu karah hmangaihna a lo piang a. Hmelhriat loh ni țhin chu hmelhriat kan ni a  hmel hriat ațangin , tunah zawng hmangaihna tuiah kan pil dun tawh. Inhmangaih êm êmin, inringtawn takin nun kan hmang țhin. Min duatin min ngaihsak thiam a. Ka nun pum hlan tura ka pasal ni ngei turin ka thlang a, neih ngei tumin   a lakah rinawmna ka vawng tlat a ni.
A ni pawh, ka tan a rinawm a. Ka duh loh leh pawm loh zawngin ka lakah a khawsa ngai lova, ka zahawmna tibawrhbâng zawngin a khawsa ngai lo. Mipa a ni a, châkna nei a ni a. Min sawm fo a, mahse, ka hnar a, a laka ka chhuan theih awm chhun leh ka rinawmn zia lan theihna awm chhun chu tichhe lo turin ka ngen a. Ka ngenna min zahsak fo țhin.
Sawrkarah hna a nei a. A ni tin nun chu hnâ lamah a hmang a. A buaiin a hah ve hle țhin. Chuti chung chuan min ngaihsak a bang chuang lo.  A bula ka awm chuan ka thla a muang a. Nun hian awmzia a nei thui hle ni ber hian ka hre țhin. Ka nun ruak chu luah khatin, nun awmze nei lo chu awmzia a neihtir a. Engmah ni lo chuan eng emawni ah min siam a ni ber e!
Chhun lamah chuan ka hnaah ka buai țhin a. Zan hi kan inkawm theihna hun a ni mai a.  A hna vanga a zin chang a awm a, kei pawh chuti tho. Hnaah buai ta na na na chu a tir ang em em chuan inhmu tam lo mahila, kan inbiak khât phah lo. Hmun khata kan awm loh pawn zan tin kan inbia a, Video call thlengin! 
Kar tawpah hun thawveng leh hlimawm min hmanpui fova, hmun nuam tak takah kan kalin kan vanglai kan chên ve fo țhin. Ni khat chu hmun pakhatah min hruai a, nuam ka tiin ka hlim hle. Mahse, sex min hmanpui a tum a. Ka duh lova, ka țang tlat a. A tawpsan ve mai a,mahse, a lawm zân lo a ni.
Hun a liam a. Zan khat chu a rawn lên zawh hian ka muhil thei lawk lo chu ka call a.  Zan dar 11 a ni a. Ka sim , ka hman țhan zawkah pawisa a awm loh vangin ka hman ngai loh zâwk ațangin ka hmangai êm êm , a tana ka nun pum hlan tura rinawmna ka lo tiam tawh chu ka call a. A ri ral ral a, a la a, "E, duat, i rawn call khiah a, Flight i nghâk mêk em ni?" a ti a. Ka la chhâng lo. "Duat!" ka ti a. A ni chuan, "Duat, lo haw vat la, ka hmu châk tawh che. Kan pahnih tân Hotel nuam deuh ka lo book a, a hma ang khân nuam deuhin hun kan hmang leh dawn nia!". 
Kha'ng a thusawi te kha ka nun pum tichhetu tur a ni tih in ring phâk kher awm love!  Kan ințhenna thlentu tûr a ni tih pawh in ring kher awm love. Ni e, kha'ng thu ka ngaihthlak te kha ka tana sawi zawng nise, ka va lawmin a va nuam dawn tehlul em! Mahse, mahse, a ni si lo! 
Kei chu ka zin lova, dar khat 2 vel liam taah khan ka bulah awmin duhthawh takin min fawp a nih kha. Tuna a biak erawh, kei ni siin a biak tum ka ni tlat lo. Hmun danga awm, nula, a duat em em, nuam danga hotela hun a lo hmanpui theih tawh chu a be mek emaw a inti si a.
"Ka fiam che a nih kha!" tia zahzel a siam lohnan, a hmun leh hun tur nen lam ka zawt a. Hrechiang lo ni awm fahranin, leh lama miin a hriat theih nan, WhatsApp lama min lo thawn turin ka hrilh leh a. Tichuan, call chu ka dah ta a. Chu zan chuan ka awm dan tur ka hrethiam lo, ka na ngawih ngawih a, ka nun hian belh tur a zawng a, ka lo belh țhin leh ka inhnem ber chuan min phatsan mêk a ni si a. 
Khua a lo vâr a, tunhma ang thovin êng mahse, ka tan a mawina a va dang ta si em! Ka hmangaih chu ka text a,inhmuhpuiah ka sawm a. An hna thila an buai tur thuin min chhang a. Engmah hre lo anga awmin ka aw liam ve leh ta mai a. Tlai lam a ni a, an hun tiam a thleng a. Kei pawh a hmun a sawi lamah chuan ka kal ve ta a. Hotel neituten hotel roomah chuan luh min phalsak lova, pawnah chuan ka lo nghâk a. Darkar 2 dawn ka nghah hnu chuan induh leh inthlahlel em em a inkuah chungin an lo chhuak a. Mi dang pawh an zah zo lo, an infawp zeuh zeuh reng a.  Ka puak keh dawnin ka inhria. A bula nula sexy tak awm chu va kal a, a sama ka keh/kek bawrh bawrh mai ka duh a. Chu ai mah chuan, min phatsantu chu a hmaia chil chhâk ka châk. Mahse, ka insûm hram a.
Zanah chuan a ngai te bawkin a rawn lêng leh a. Chhuna a thil tih ka zawh chuan dawt sawi a thiam kher mai. Chutah chuan ka insum zo tawh lova, ka thil hmuh leh hriat zawng zawng ka sawi a. Ka biangah mittui a tla a, ka țap lo thei lo. A ni pawhin, ka hmuh leh hriatchian êm vangin a pha thei bîk lo. Mahse, a thusawi chu a va na si êm! Sex ka hmanpui duh loh vangin kha nula kha a kawp chu niin. Mihring hi a lo va han mak thei ngai êm! Kei, a tana ka rinawm laiin a niin a duhthusam tihpuitlinnan hmeichhe dang lakah min phatsan a ni si!
Ngaihdam min dil a, mahse, ka thei lo. Ngaidam a, kan inkara ser nung awm tawh pai dam tur khawpin ka tuarchhel lova,tin, a ta leh a thuhnuaia ka awm hma pawha min phatsan duh tu hian a hnuaia ka awm hunah phei chuan engtin tak min phatsan ang maw!   Phatsantu chu ka pawm thei ta bik lo. Chuta țang chuan, hmangaihtu leh hmangaih mi hrang kan lo ni ta a ni!
'Ka țah leh ka nat phal lova min duat a, rinawmna min tiamtir țhintu khân min kalsanin, min phatsan si!'
Min hmangaih țhintuin min phatsan si chuan tunge ka belh chuan ang? Hringnun hi ka lo țahpui zawk mai ang e!

04 August 2017 | Guwahati




No comments:

Post a Comment