Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Tuesday, 29 August 2017

SHILLONG PÂR


Model: Kim infimate
Ziektu: H.Zate, Hmar Rûn

Umran kan tlung chun “Unau hmel hai” hun vel a ni a, a'n thim ruoi ruoi ta a, ka mit țhat naw lei am-a-ni ka kawl hnai a mi hai khawm chu ka hmu fie ta rek nawh. Sienkhawm, ka hei fe a, kha lai a nunghak lo ngir kha chu ka hmu hmai naw kher el.
Ka hming ka ziek lut lai chun ka lungril le ka mit chu hmun dang ah ka laksawn thei mawl nawh. A mit hmul dum tle zar el le inkuol rai el hnuoi a a singmit dava el kha ka hmu hmai nawh, ka hmu hmai naw el khawm ni lovin thlir lovin ka um thei ta nawh.
A pieng ve ti khawm hre lovin kum 20 chuong ka lo dam ve ta a, ka dam thei tho vei leh hi zan a inthawk hin chu a țhang loa dam ka'n zuom ta nawh. A țhang lo a dam nek chun a kuoma um ve dingin Famkhaw run khawm nisien zui ka thlang lem el awm ie! Ka mit lak sawn ka tum po leh ka hlawsam a, en ka tum nasat po leh ka en ngam si nawh. Ka pieng ve ti khawm a hriet naw laiin kei ruok chu ama leiin ka lo buoi ta si a, miin an sawisak a a hei inhmur but khawm kha ka ta ding chun thil mawi a'nchang zo tah. A hei innui sai lem khan chu mawi ka ti taluo kha ka'n awn ruoiin ka hriet. Ka lo en nasa taluo chu ka ruolhai an fe hmel khawm ka hriet naw a. Buoi nawkin ka hrietsuok a, ka la hnawt a.
Zan prawkram kan hei țan a, ama naw chu iengkhawm ka ngaisak thei  naw ani deu tak . A rukin ka thlir a ka thlir nghawk thei nawh. A um dan iengkim el kha mawi em em hin ka hriet a, kha nithum ka um sung khan ka lungril a buoi naw chauh a nih. Seminar buoi a buoi kan ni leiin ka lungril ka thunun thei hram a, ka ngaituona ka sawrbing thei a hram hlak. Prawkram kan țin le kan țan nawk ding zat a tuol a a lo ngir ka hmu khan tu khaw hriet lo khan ka lo hlimpui ve em em a, ka pieng ve ti khawm hre nawtu nuhmei pakhat lei khan ka lo hlim ve a ni chuh. Hun a liem a Umran conclave chu iengtin tin mani ka tlingtla thei hram a.
Shillong ah kan um ta a, NEHU Campus panin kan fe mek a, fak-le-dawn ding buoipuitu ding le intlawn kan ni leiin dawr ah kan lut a, dawr a ka lut tawm a Tleirawl inno em em hung inlang kha ka mit, Bui mit ang el a ping chut el hin ka hmu hmai naw chieng hle. A sam tla sieu-in a dar a hei vuok phak a, a mit hmul tle sieu dam kha ka ta ding chun khawvel thil mawi a'n chang a.  John Keats in ‘A things Of Beuty’ ti hlahril a lo phuok laikhan hi nu hi a hmu khieu am a ni aw” tiin ka lo ngaituo hman a. A puonbil insing tai el hnuoia a mal vawng lar el hung inlang ka hmu lem khan chu ka mit hi camera anga hei zoom thei nisien ka ti ngawt el. Ka en ngawi ngawi a, mit thlalo lek a enin, a puonbil  chu a'n sing taluo deu am aw, ka ti a, sienkhawm, kha nek khan infuol sien chu ka ti chuong der si nawh. 
Nute Darsangmawi in H.S.A Rorelna a fak ding ‘Mawng a deng bat’ ang hrim a invir vat vat a a ngaituo lai khan kei ruok chu Shillong Tleitir thlirin ka lo hmanhlel ve bawk a. Kan thaw ding kan thaw zo a, Kan hei fe khawm chun ralkhat a inthawk ka hmu thei chen chu ka la thlir zui hram a.
NEHU campus kan pan a, a la'n hma leiin Laboratory a hai kan leng kuol vel a, chawmkhat kan leng hnung chun rorel țan a ni ta a. Rorel kan hei țan a, sawt fang khun khan tak a rorel a ni hnung chun Ka Shillong Tleitir bawk chu a hung inlang hlawl a, Ka Nute a hung țhang sa bawk a, Kan rorel hrim hrim ka lungrilah a lut tanawh. Anni lai a țhang a, Fak-le-dawn buotsaitu a thang ve tak kha ka nuom a. Ka mit kan len zau zau a, kekawr tluon a bun a, zakuo lum a hnuoi a zakuo a hak nek a insing hieu a hak a, mi dang chun ha hai sien ka sawisel rek ding vei leh Kha nu kha chu mawi ti em em in ka thlir ringawt el a nih. Fak ding buotsai a an buoi map map lai chu ka ruolhai camera chun ka lo hmet zat zat a, an sin an zo a an fe hnungin nal ti em emin ka en char char a.
Fak ding a semlai a chethla mawl kha a nih ka lunglai hluotu chuh. Mi dang kha pe ve lo khan kei ngawt kha mi pe el sien ka nuom a, sienkhawm, a thei si nawh. Inzak ti hriet tak si, hawihawm lei a a hung innui sai lem khan chu ka tuor zo nawh. A hriet naw karin ka lo invetpui naw chauh a, ka hriet naw karin ka lungril po po a lo hluo hman der tah. Ni thum liem ta khan chu a pieng ve ti khawm hre loin khawvel hi inhawi ti em em in ka hmang a, tu ruok hin chu ka pieng ve a nih ti hre naw pangpal a tih ti inlau em em in ka hringnun ka hmang lem ta si .
 Ka ruolpa chun, "naupang a ni saw” a ti a, “Bawngtar ma-in luong dang tho annawm a thlang” ka ti a, “khawvelah nuhmei an tam taluo, hieng ang naupang laka buoi ding i ni nawh” a ti chun “Vanah Arasi tam tak an um a, sienkhawm, Thlapa pakhat chau a um i sawn naw?! Khawvel ah Nuhmei an tam, sienkhawm, ka lunglai hluotu chu hi nu chau hi a nih.” ka ti a, ami sel kuolvel pei ta naw ni ngei ding a na, ‘ i chang chang changpui rawh.” a ti a, a mi zam san dai.
Zan a ni a, Bu kan fak lai a a hei chang zet zet ka hmu lem khan chu Val hin “Siktui ka ni lai khan riel ang lo luongral lang” ti an phuok hi a nat dan ding ka hrietthiempui ve ta a. Ama chang lo a hienga um nek chun bu kan fak lai a ruotui ang khan luongral ve el ka nuom lem. 
Bu ka fak vat vat a, hun ka nei naw ti chu ka kepar zat ka hrietchieng tluk zetin ka hriet chieng a, bu ka fak khawp chun kut sawp vat vatin biek dan ka ngaituo ta a. Mawi le mawi naw khawm ngaituo ta loin a thilthaw lai chu ka va biek buoi  a, tu hnung a ka ngaituo hin inmawl ka'n ti a, sienkhawm, ka'n sir chuong der nawh. A san chu a hming ka hriet pha tlat. A buoi em leiin nghawkum inchang lem ka tih ti ka ți leiin ka'n kiengsan ta lem a.
In kan pan na a, motor pakhat a kan hei chuong dam kha intar hle sienkhawm a'nhawi kawng khat in ka hriet.
Tu hnung a ka ngaituo nawk a, ka lungril po po sengin, “Debit and Credit rules” hmanga ka hei sut vel khawm hin ka ta ding a a tling tawk nawna hrim ka ngaituo suok thei nawh. 
‘Sakhmel Rangka-Dartui chunnu’n luong si lo, 
Hieng ang lawma ka lunglai hluo zotu”

ti hla phuoktuin a lo phuok khawm hi a awm hrim a nih. Ama le hin chu hremhmun khawm inhawi el di’n a mawi. Ka en a, ka ngaituo a, ka lungril a inthawk hnawt hmang ka nuom, sienkhawm, ka ngaituo naw phal si nawh. A chetzie a nundan ka en a, a pangti inno nak el dam kha ka ta ding chun en nuomum a tling a. Țha ka ti taluo kha ka'n vet naw chau niin ka hriet a, Kumtluong nuthai dinga hei fiel el ka nuom!  A Noodles suong ka fak lem khan chu a thil suong inhnik leh, a ma hmelțhat leh  Ka fak zo hmel ka hriet nawh, ka ruolhaiin an fak tan chau a, kei chun ka lo zo hman der tah.
 A chetzie nun dan, an sungkuo nun zie le an nunphung ka thlir khan run lum Nuthai dinga ka duthusam nisienkhawm, ka retheina min țawmpui a, ka harsatna min țawmpuitu ding le, kan khuo ang Hmar chu ek tluk khawm a an mi ngai nawna le Hmar țawng hmang lei a vawi tam kut ka tuor takna hmun a mo ni a, ka rinum tuor mi tuorpui a, Serlui ral a bu mi phurpui a ka nunphung min țawmpui ding chun pamhmai taluo a ka hriet leiin ka lungril ang khawm ka hril ta nawh. Sienkhawm , ka ruolhaiin Shillong ka fe zat a an min cha hlak angin, hi ngei hi a ni hi 'SHILLONG PAR' chu tiin ka lungril ngaituo malama mitthla zing pumin inkiengzai ka hung rel san lem ta a.
8  November 2013 | Silchar

No comments:

Post a Comment