Tuesday, 29 August 2017

UNSPOKEN LOVE - 4




Model: Ms Mapuii
Ziektu: H.Zate, Hmar Rûn
A sangnu thil hril chu ka hrietthiem naw em leii  dawn dan ding tak khawm ka hriet naw a.  "Ieng leiin am?" ka ti chun, "I hriet kha." tiin a mi dawn nawk a,
mak ka ti kher el.
Ka'n dawn hnunga thil um dan a mi hril chun mak ka tiin ka awi naw kher el. Sienkhawm, a hnungah a u diary a mi'n entir a, ka awi ta chau a.

Ka dit em em, ka ta ni ve dinga ka lo thlakhla em em hlak chun pawl 10 kan ni laia inthawk a mi lo dit ve ran a. Ka ta dinga thil a mi'n chawkpek hai le thla kan inlak kawp dam kha inhawi a lo ti hlak zie dam. Ka ruolnu, a hnunga a ngaizawngnu ni ta kuoma a mi dit thu hril a, ka hriet lovin a mi lo bêm zing dan hai a ziek a.  Ka dit ve nia a hriet laia a lawm zie dam ziekin, ka laka a luongliem zie chu a thu tam lem a nih. Ama ta ding chun, a mi bêm a, sienkhawm, ka lo thei pek naw a lo ni a.  Kei hlakin ka lo dit ve em em bawk si! Kan inkarah palai infuk naw leiin thil tam tak a lo fe suol a, ka dit naw nia a hriet leiin a nun a hmang khawlo thu dam a ziek a. Mak ka tiin nâ ka ti kher el. 'Ka dit che annawm, ka hmangai che annawm!' tiin ka lungril chun ka dawn mawl mawl a. Ka dit em em chu tuhin chu ruihlo bawiah a'n tang mek a ni si. Chuong ang po po ngaithla le tiema ka hriet hnung chun ka khumah ka țap tlawk tlawk a. Kan inkara hril suok naw hmangaina, hriet suoka um ta chu a sukpâr theitu ka nih ti ka hriet a.  Kei a leia a hlim ka nuom laiin ka leiin a nun a sie ti ka hrietin pawi ka ti a. Chu thil siemțha ding chun kei ngei hi ka pawimawh ti ka hriet bawk! Ka hmangai, a rûka mi hmangaitu chu a hlimna ni ve ngei dingin ka lungril le mgaituona ka siem fel tah a.
Bul țan dan ding ka hriet naw a, hre lang khawm ka thiem kher ka ring nawh. Ni khat chu a farnu chun an ina leng dingin a mi fiel a, ka va leng a. Thil tam tak hrilin a u  ka lo dit hlak zie dam ka hril a. Kan innuiin kan hlim ve khawp el. A farnu chun, "I nuom chun ka u chu hlimna i pek thei a, i nuom chun i tosan thei!" ti malamin a u pindan chu a mel zauva, ka zâm khawp el. Lut dingin a kutin a mi hril nawk a. Inthin le inlap dar dar, lungphu inrak tak pum chun a pindanah chun ka lut a, a sangin a mi zui lut bawk a. Ms chu lungngai hmel deu hin Varenda-ah puotieng enin a lo ințhung a. A hmelah beiseina le hlimna reng a um nawh. A hmel hlim sieu, beiseina mi pe hlaktu kha tuhin chu a chul vawng ta a. Tlangval nekin putar taksa la țha deu a ang lem!
Ka hnai a, a sang chun, "U, tu am a ni a hung!" a hei ti a, a mi maksan ta a.  ka rawl ka hei inthiel a. Ka rawl a hriet chun Ms chun a mi hung en var a, a mi hmu leia a hmela hlim hmel hung inlang mawl kha a mawiin a mi hne. "I hung leng a ni maw?!" a ti a. "um," ti ringawtin ka dawn a.  Kan ti vang vang a, sawt fang kan to hnung chun a hung țawng suok a. "I va fel de." a ti a. "Ni khat chu ka pindanah ngei i la hung hi ka beisei tlat hlak annawm!" a ti a. A mi beisei anga ka va'n lang chu ka lawm a, kei nekin ama a lawm lem.
Hril țan dan ding ka hriet naw a. Ama khawmin a hriet nawh. Ka huoisenna po po leh ka pan hnai a, ka kuo a, țap pumin, "Ms, Ka hmangai che!" tia țanin "ei sikul a inthawk khan ka dit taluo che annawm." ka ti a. Ka kuo a, a mi kuo ngawi ngawi a. Nautein a nu inthla ți em ema a kuo ang el hin a mi kuo a. Chu ni chun kan inkara a Unspoken Love chu hril suok a ni a. Kan inkara hmangaina chu a pâr suok ve tah a.

03 June 2017 | Guwahati

No comments:

Post a Comment