Labels

LightBlog

Monday, 25 September 2017

HMINGTHANGMAWI


Model : Loicy Keivom
Ziektu - H.Zate, Hmar Rûn.


Bu fak dawkanah chun kan ințhung țhap a, ka huphur ang ngeiin ka pa  hung țawng suok a. "'I nei ngei ding a nih" a ti chang fak a. Thurawn a ni naw a, ka ngaidan a lak bawk nawh, thupek a ni lem. "Papa, Naupang sie el ka la ni hi." ka ti hrâm a. A buthlenga a kut innghat a, inrum em ema mi mel pumin, "i thil thaw hi naupang thil thaw ni ah i ngai maw?!" chu po chu kan pafa thil inhril ve dan a nih.
Ka ngam naw sa sain ka nu fethlengin ka hril a, sawn man peka inrel fel el thei nisien ka nuom. Sienkhawm, Ka pa ngaidan a ni nawh. Mi nauhai suksiet a nei nawk naw chu a ti zawng a ni naw bur hi a ni tawp. Ka lekha inchukna ding leh ka buoi khawp el. Bakah, ka hmangai naw hrim hrim.
A a hrim hrimin, ka thiem naw bik khawm a ni nawh. A mi sai hawr hawr a, a lo inrai ve a ni el a. Ngaizawng ka nei ti a hriet ran a, ami lo dit ve a. Ka zuruiin ka lo zalpui ve a ni a, ka thiem naw vieu na ka hriet bik nawh.
A vangduoi am ka vangduoi lem khawm ka hriet nawh. Am, a lo tum reng khawm ka hriet ta nawh. Vawi khat chau kan chang suol a, a lo inrai vel put a. Suktla dinga ka ti hlak chun a nuom naw a, "tuolthat ka nuom nawh." a ti a, "suol ei thaw ta tho annawm!" ka ti a, a la nuom chuong nawh. Ka hril ngun po leh a nuom naw zie a suklang rawn pei. Nuhmei mak tak a nih. Ka nei naw ding thu ka hril khawmin, "A pawi nawh, miin nang i nih ti khawm hre naw nihai" a ti a.
'Aw, hi nuhmei mak tak hin ami sukmak zo antah'. Ka theida a, ka nghawk ngawi ngawi elin ka hriet . Kha zana thiltlung lei khan kei le kei khawm ka'n theida a.
Ni le kar liemin thla a invawi a. Ka nau a pai khan thla 7 zet a ni nawh. A phingah a'nlang ta khawp el. Chuonga a pai si chun ka nau chu fahraa siem hlak ka nuom nawk si nawh, ka buoi a, ka buoi sie zo a nih. Hmingi hlak chun hrilsuok a tum der nawh. A sunghaiin an dawp a chuh, a zep thei țang țang khawp el. Ama chun a thutiem a sukhlawtling a, sienkhawm, kei lem chu a nem lemin ka țhang am a nih ka farnu ka hril a, ka farnuin ka nu, ka nuin ka pa, a tawpah chun bufak dawkanah nei dinga thupek inpekna a tlung ta a.
Ka pain rem a ruot zung zunga, ngaidam inhniin, chawp le chil takin Hmingthangmawi chu kan inah a hung inlawi lût ve ta a. Ka hril ta ang khan ama hin a mi dit a, ami hmangai bawk a, remchanga lain ka zu inrui laiin ka lo um khawlo pui kha ani a. A chunga ka nunrawng hnung khawmin a mi hmangai em leiin kan nau chu a khata nei dingin thutlukna a siem ta a ni kha. Sienkhawm, a khatin ni lovin a pa țhang ngeiin a nei ta ding.
Ka hmangai naw mieu leiin a kawlah khawm ka zal nuom nawh. Ka diriem a, ka ngaina naw takzet. Ka tlangvalna a mi lakpek leiin ka theida ngawi ngawi lemin ka hriet.
Nau a nei ding zan chenin ka lan rui san a, a chungah țhat ka'n suo ngai nawh  Sienkhawm, a hmelah nuor hmel a um ngai naw a. Chu nek chun, ka hmangai naw zie a hriet a, a'nphalam ngawi ngawi hlak.
Nuhmei zaidam le nunnem tak el a ni leiin ka sunghai chun an duotin an ditsak em em a, ka nu le ka farnu lem chun an ngaisak taluo hi ka lo thik deu hlak.
Ka pa khawmin Hmingi a hung inlawi a inthawk chun a mi ngaisak naw rieu hin ka hriet a, Hmingi chungah bawk ka țuongsie nawk hlak!  A sunga nau khawm thla 9 a tling vang vang tah. A taksa hrisel vieu naw sien lem chu a hmel khawmin a tuor hle ka ring. Sienkhawm, a hmel a la țha ran a. A danglam chuong nawh. Anachu, chu lei chun a kawlah zalin ka kuo pha chuong nawh. A kawla um nekin ka ruolhai kuoma um ka nuom lem.
Ka nuhmei, a pasal a inthawka hmangaina dawng naw, sienkhawm, a pasa sunghaiin an țan em em khawp a fel chu ka ngaisak naw a. Nau a nei khawmin a kawlah um lovin ka ruolhai leh zu kan dawn dei. Nau pasal a nei thu ka hriet a. Ka lawm ve tho a chuh, Hmingi nau a ni ve tlat leiin ka lawm bek nuom nawh. Thla 3 a ni chenin vawi khat khawm ka dai sin naw a, a nu khawm ka ngaisak bawk nawh. Sienkhawm, Hmingi chu a tuorselin a fel em em a, kan sungkuo sukinhawitu tak a ni a. Thla tam tak kan ina innui ri um ta ngai lo chu a hung lut a inthawk chun ka sunghai khawm an innui dar dar hlak. Ama leiin ka sungkuo khawm a'nhawiin kan inpaw pha a, tuhin chu hmingi lei chauin kan sung danghai khawm kan inah an hung leng ngam ve tah! Nuhmei var le lekha thiem tia hril ding a ni nawh. Sienkhawm, inmawl takin a var si! Mo ni a tlin a, sungkhat nu ni dinga tlin nawna a nei nawh. Kan sungkuo inrem naw a keikhawm a, ka pa le ka nihai inbe ngai der ta naw khawm ama leiin an inbiek a, tuhin chu kan sungkuo khawm vanram ang el a ni tah!


Ka leng dan pangngaiin ka ruolhai leh kan leng nawk a. Nunghak lenga kan hohlim lai chun kan nunghak leng chun a thu tiem nal le țha a ti thu a mi hril a, tiem ve dingin a mi ti leiin WhatsApp a mi thawn dingin ka hril a. Kan hohlim nawk ta a.
Zan sawt hnung chun kan in ka lut a. Seatibg room a țhungnaah zalin ka phone ka tawk a, Hmingi kawlah ka zal pei thlawt naw a nih. WhatsApp ah lutin thuziek, kan nunghak lengnuin a mi thawn chu ka en a, H.Zate in a ziek, HMANGAINA NUNRAWNG chu lo niin , ka tiem a, ka tiem pei a.  A changtunu țawngbau, "Ni khat chu la hung puitling a ta, 'tu am ka pa?' tiin mi la'n dawn a ta,  chu pha chun iengtin am dawn ka ta?!" ti chun ka lungril a hne a. Ka nau hi pa nei naw ang elin ka siem a, ka nuhmei hlak pasal nei naw ang el in, a lungril nat dan ding ka ngaituo chun Hmingi chu ka lunginsiet thut a. Ri nei lovin ka roomah ka lut a, kan khum ka hei tlung chun Hmingi chu mi hriet inlau si hin a nau a kawla inzaltirin a lo țap ker ker a. ka lunginsiet zuol a. A kawlah chun zal vein, mak ti hmel deua mi en pumin, "iem i hung thaw ding?" a ti a. "Ka nuhmei kawlah ka zal ding." ka ti a. Mak a ti kher el. A biengah tuoiin, a mittui/mitthli ka sukfai a, "tuta hnung chu ka leiin țap ta naw ti nih!" ka ti a. A biengah ka fawp zau a. A hmurah ka fawp nawk a. Kha zan tluka hmingthangmawi hmela hlim hmel mawi kha ka la hmu ngai nawh, a hlimna intlun dinga intiem pumin a kawlah chun zal vein, Ka nuhmei chu a pasal pang tilum ngei innghaiin a in ta siei siei a. Thlamuong taka ka bân khama a hei in chu a hmel a lo țha ngei el. A biengah ka fawp nawk zau a, ka in ve ta a!
24 September 2017 | G



3 comments:

  1. A tiem anhawi tawp. Model a hmel țha si. Ka star tawp.

    ReplyDelete
  2. Replies
    1. A thu nekin model hi țha i ti lemi ka hriet. hih8

      Delete