Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Saturday, 2 September 2017

I NAU KHA I HRIETCHIENG AM?

[Pic Source: Internet ]


(Hmasawnna Thar 23 August 2017 a inthawk a lak a nih.)
Ziektu: H.Zate, Hmar Rûn.
             http://hzate.in 
Vawi khat chu In pakhata ka leng chu, in neitunu chun a naunu chungchang a hril a, a'npak khawp el a. 'Ngaizawng hla ngaisak lo, a fel a nih.' a ti a. "A ni ngei chutie. Nau hmel țha le fel deu i nei a ni chutie." ka ti a. Ka lungril ruok chun, 'Ka hung malam a, Sikul hnunga saruok a zal a, a ngaizawngpa leh sex lo hmang kha i naunu a nih ti i hriet si naw maw!
' ka ti a. A fena ka hei indawn nâwk kher a, 'Home work a thiem naw a, a ruolnu a va'n dawn ding a ni kha. Lekha hi chu   ngaisak ve a!' a ti nâwk hrâm a. Naute ang el a la ni thu le, pawl 10 a'nchûk ta a chu naute ang ela a la um thu chenin a hril pei a. Ka ngaithlak pek ve mei mei a, A rûkin ka lo inzak lemin ka hriet.
A naunu, naute anga a en kha puo tieng chu a naupang ta nawh ti a hriet naw le, a naunu a ring taluo khelah a suong taluo kha mak ka ti hran nawh. A hriet naw lei a ni ve el a. A naunu khan home work thaw ding anga inhrilin, a sung tiengah chu, Phone a inthawk thil tam tak an lo ruohmang dei ta si!
Nu le pain an hmu khêlah hin nauhai hin thil tam tak an inchûk a, an hriet a, an thaw ta hlak. Nu le pain a'nri rêt rêt an hriet ta hin chu khawlaiah chu an lo nasa ve vieu tah tina a ni a. Nu le pain an hrietchieng meu chun chu a pawi tiengpang a ni ta hlak!
Țum khat chu, nu pakhat hin a naupa chu ngaizawng khawm ngaisak lo, fel le țha emin a lo hril nâwk a. Ka nui a'nzain ka ngaithlak pei naw vang a nih. A hril a inthawk a thla khat khawm a liem hmain, POCSO Act hmangin an naupa a'ntâng dêr! Ni ie, nu le pa hin chu an nauhai hi nau an ni tlat leiin an hmu upa thei naw khawm a  ni el thei.  
Ka hmelhriet pakhat chun, "Vawikhat chu kum 14 mi hin a mi hung biek ve tlat hlak a. Kei telul hi a mi dit thu dâm a mi hril ve luom hlak! Nuhmei pakhatin muolpho le inzak khawm ngaituo zo lova a mi hung biek chu țha deuin ka dawn a, a tawpah chun a beisei 'ngaizawng' ni lovin, 'u' ah ka inhril suok thei hram a." a ti a. A sunzawm a, "Chu taka inthawk chun, Ka farnu, kum 15 khawm hi kan hmu hawia țawng fie naw ang ela a um lai hin puo tieng chu, 'Ka nun nekin ka hmangai lem che!' tiin a lo thai kûr ve dup ve el thei tho tah ti ka hrietsuok a. Hun remchângah, thil tam tak, Dit rûk nei hun  lai inhawi zie a inthawka țanin Sex  chen ka hrilpui hlak a. Nupa kâra tlung ding hi nupa karah ngei intlungtir dingin ka hrilpui hlak! A zawm le zawm naw chu a thu ni ta sien!" a tih.
Nu le pa țhenkhat hin chu an nauhai hi an hmu naupang zing a, mi nauhai, Pum thum cheng khat man chau chau an lêr zie hahipa an hril laiin an nauhai chu lêr ve thei naw dingin an ring tlat hlak! Mi nauhai khawmin an thaw thei chun an nauhai khawmin an thaw ve thei a nih ti hi an ngaituo phâk naw am an ngaituo nuom naw lem  hlak chu hriet a va ni nawh!
Nu le pa tam tak chun an  Nauhai Sex chungchang hi zamaw a nina chau ngaituo leiin an hrilhrietin an inchûktir ngai nawh. Inchûktirtu țha lem dingin inchûktir naw sienkhawm, an ruolhai le hmun dang danga inthawk an inchûkin an hriet thova, a țha naw lem le a pawi lem, 'Virgin kher chu a ho taluo. A luck naw thlak!' ti kha an inchûk lem a, a tawpah chun thil pawi tak a tlung hlak a nih. Chulei chun a pawi lem a tlung hmain, Inchûktirna țha lem infa mawl mawl ding a nih.
Tulai rawltharhai chu, nu nene nêk an bansan chau a, nene dang nêk ding an zawng a, Tleirawlhai hlak a hliek ni lo,  Naute lim inawi an bansan chau a, a naute tu ding an zawng nâwk nghâl si!
Hi țawngbau hi i lo hriet ta di'm chu, 'Nuhmei chu Zakuo hnuoi(bra) an hâk char hin an taksa a puitling a, Pasal khawm Zakuo hnuoi hlip dan an hriet char hin an taksa a puitling tah!' ti hi.  Ni ie, I naunu khan Zakuo hnuoi a hâk țan char khan a puitling tah a, kha le inruol khan i naupa khawmin Zakuo hnuoi hlip dan a lo hriet ve nghal !  Nuhmeiin ruolpa a nei a, pasalin ruolnu a nei rawn char hin ngaizawng an nei țan hlak! A san chu, khawlai tleirawl khawmin an nu le pa kuomah, 'ka ngaizawng hai inah ka leng ding!' an ti ngam ngai lêm!
Fiemthu ka dawng pakhat, Pain a naunu a halna a chun,  "I inhawitirna dingin thuomhnaw țha le to tak tak kan inchâwkpêk che a. I inhawitirna ding tak tak chun i hlip nawk vawng hlak si!" a'ndik hmel khawp el.
Chu tleirawl thlalak indar chun an vêng le an khuo a hluosip hnê hle a. A nu le pain an hei hriet  chun, a ta dinga țangkai nia an ngai, a pass lawmna dinga an inchâwkpêk ngei khan a thlalak chu a ngaizawngpa a lo thawn a lo ni a. Nu le pa hriet naw hin thil hi a lo va tlung nasa de aw! I laka a'nzakpui hlak a taksa kha tu am a ni lakah chu a lo inzakpui ta naw el rawi am?  I naupa, Naupang anga i en khan, a ruolhai kuomah chu, 'Pawla'n mi sai ta bik naw nih!' a lo ti zawt zawt el ta rawi am?
Naupang sikul țin hun neka inhnu taluo a naupang inah an inlawi rawp chun nu ta ding chun ngaițhat nawna hmang a, en zui vat vat ding a nih. Tulai nu țhenkhat, an nauhai, zantieng dar 3 a sikul țin hlak, a hla bêk bêk khawm ni lo, Dar 5 a in an inlawi khawma lungril buoi țhak lo an um. A mak khawp el! Nikum khan Inchûklai pawlah inhmang vein, zantieng dar 3-5 inkar hin office kan hawng hlak a. Chuonga office a kan um lai chun naupang țhenkhat, nu le pa hriet a la'n ngaizawng mak chie naw hai kan office kawlah an lo inhmu hlak. Darkar chanve lam kha zantieng dar 5 damin in an tlung a, an nuhai an lo buoi dêr nawh. Lam laka thil tlung hlak an hriet si nawh!
I naupa khawpuia lekha inchûk dinga i sum tam tak sêng a i sie khan lekha chau inchûk lovin, a inchuklai a zo hmain, EFCI kohranin thupuia, 'A hun taka ra insuo' an hmang kum hin hun naw takin a sin inrim ra a hung insuo thut el di'm? ICI Kohranin, 'Sandamna Ropui!' an ti lai hin Laibunghai leh ngaidam inhnina ropui in thaw el chun, ropui naw hle a tih! I naunu khawm, khawpuia i sie kha, pawisa a hni ngai naw che a, a hung thawn lem lei el chein lâwm ringawt naw rawh! A sumdawng le sin a thaw anga i hriet lai khan a hek thei naw ding a lo zawr sa el am i hriet am a nih? I naunu/naupa chu 'nei naw nghei naw' an lo ni el rawi naw maw?! 
A hung suok chânga naute anga um a, in kohrana in suong em em, i nau kha, khawpuiah chu a lo naupang naw vieu el thei a. Inchûkna hi a țha , khawpui pan khawm a țhah. Sienkhawm, thiemna le varna dawng siin i nau nungchang i chânna a ni ruok chun a hlu lem i chân ni mei a tih!
An vanglai chên inti a, innui hlak hai hi ka kuomah țap pumin an inpuong ráwn ta khawp el! Tleirawl pakhat chun, țap pumin a ngaizawngpa leh sex an hmang a, a hnungah a'nphatsan thu le a nu le pa hriet lova nau a suktlak thu a mi hril a. Nu le pa hriet lo hin thil tam tak hi a lo tlung thei a, a tlung zing bawk a nih! 
I nau kha i hrietchieng am? A vanglai hun țha le hlu Krista leh hmang țha dingin ei nauhai ei enfie a țul ta khawp el. Vanglai chên inti vieu hai khawm hin a tawpah an beidawng hnung  chun 'Krista' tho an bêl nawk hlak si a!
22 August 2017 | G

No comments:

Post a Comment