Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Sunday, 3 September 2017

IT'S 03


Model: Kimi Hmar
Photohrapher: Berema Chhakchhuak



Ziaktu : H.Zate, Hmar Rûn.
http://hzate.in



Kohhran khata lawi niin kan inhriatna pawh a rei ve tawh hle. Mahse, a ni nen hian ngaihzawng niin hmangaihna pâr kan tlan dun hi ka ring ngai lova, ka suangtuah ngai hek lo! An hausain mi hlun chhungkua an ni a. Keia lo beisei phâk chi a ni lo.

Mahse, thil hi kan rin leh ngaihtuah ang vekin a thleng lo. A ni chuan Min hmangaih a, min duh a, min vei a, min hêl a, min chhai a. Min duh thu a sawi tirh phei chuan a fiamthu emaw ka ti hial. Mahse, a fiamthu awzawng lo. Duhna tinrengin min duh emaw tih mai tur khawpa min duh a, a thla a thla tel min bêm hnu chuan, A  kum leh thla sawi lo mai i la, ni thum , (03) zan chuan inhmuh a rawt a. Kan hla zir zo chu kan inhmu ta ngei a. Min hmangaih thu leh min hnuh thu a sawi leh a, a hmangaihna chu chhang let ve tawh turin min ngen a. Ka țawngkain ka chhang lo, min kuah a, min kuahna chu kuah nghet sauhin, a awmah ka bei thlawp a. Ka kuah nghet tulh tulh a. Ka dâk chhuak a  , a hmuiah chuan ka fawp zauh a. A ni chuan, duhthawh em em hian min fawp leh a. Kan infawp mawlh mawlh hi a ni ber mai. "Ka hmangaih che!" kan inti ve ve a. Chu zan chu kan inkara hmangaihna nun bul ințanna zan a ni!

Chu zan ațang chuan kan inpawh zualin kan inngaina zual a. Ka ngaiin ka thlahlel thei hle. Min duatin min ngaihsak thiam em em a. Hla zirna leh țhalai thil tihna engkimah pawh nise, a ni nen chuan a nuam bîkin ka thla a muang hliah hliah țhin. Kan inzuiin kan inkawp chawt a, mi pawhin min fiam nasain inhmeh min ti thei hle!

A ni chuan ka nui hmel phêna ka lungngaihna a hmu thei a, ka lungngaina leh natna ah min hnêm a, ka țah a phal ngai lo. Ka hlimna tur a nih phawt chuan engkim tih a huam a. Ka dam loh leh ka nat changte hian min enkawl rawt zel mai a ni. Ka hlim loh a hlau a, ka thîk tur leh ka rilru nat tur zawngin nula dang lakah pawh a awm ngai lo.

Zana a lo lên changte hian nuam ka tiin kan hlim ve hle țhin. Ka duhzawng min tihsakin ka duh loh zawng chu a duhzawng pawh nise min tilui ngai lova, min nawrlui ngai hek lo. Mahse, mipa zia ve deuh nge ni Hnute erawh a lawm hle. Hmeichhia hian hnute kan lo nei lovang tih hlauhawm khawpin a khawih peih a, a ninawm chang a awm ve țhin. 


Mipa țha tak niin hmeichhe zahawmna humhim tum tlat mi a ni a. Kei pawhin ka zah ngawih ngawih țhin. Mi hmuhah mawi lo leh zuamawm turin min awmpui ngai lova, min fiam ngai hek lo. Tin, Miin chuti ang lam hawia min fiam pawh a duh lo. Sex min hmanpui a tum ngai lova, chu ai chuan, Lawi țhat zan ngeia a tana hlan turin min fuih fo zawk țhin. 
Vawi khat pawh kan inhmu fâl a, induh leh inhmangaih, inngai na na na chu kan infawp a, kan inkuah a.  Kan duhthawh telh telh ta mai a. Chutah, min nawr sawn lawp a, "A chí loh!" a ti a. Ka hrilhhai zawk lek lek a ni. Mahse,ka va zah si êm! "Tuna sex ka hmanpui che a, i thianghlimna ka tihchhiat chuan, khawiah pawh awm ila, i rinawm leh rinawm loh ka hre thei dawn hleinem." ati a. "Hetia thianghlim taka kan awm hi chuan, min lo rinawm loh san chuan lawițhat zanah ka la hre thei dawn a." a ti mauh mai.

Kan inngaihzawn champhaah thil min pe ziah a, ka lawm thei hle. Thla tin ni 3 hi ka tana hun hlu takah min siamsak fo țhin. A man tam ni lo mahse, kha, a hmangaihna ka chhân lêt hun a hre reng khân min tilawm a ni.  Ka chak lohna leh ka tlin lohna zawng zawngah min hrethiam a, mahse, tling tur erawhin min zirtir fo țhin. Amah vang hian thil tam tak ka thiamin ka hria a. Khawvel nun dan phung tam tak ka zir phah a ni.

Ka tana a hlutna hi sawia fiah a, thu a fiah chi a ni lo. Ka sawifiah thiam bâk leh ka hriatthiam theih bâk a nasa hian ka tan a hlu a. Ka engkima engkim a ni. Kan ni tin nun hman hi ka tan a hlu a, ka hun hman apiang hian hlu takah min siamsak a ni ber hian ka hria.

Ni khat chu Țhalai inhlawhin mau satin an chhuak a. An hnathawhna bula naupang pakhat chu a bula luiah chuan a tla sual hlauh mai a. Chhan tura luia a lut chu a chesual ah a țang ta zawk a, mi dang chhan tum kha amah zawk chhan a ngai a. An han zawng ngial a, an hmuh chuan, ka hmangaih, ka nunna ai pawh a ka ngaihhlut chu a hminga sawi koh ei theih ni tawh lovin, mitthi a ni ta reng mai.




Chu thu ka hriat chuan ka rilru a na a, țah pawh ka țap thei lo. A ruang chungah pawh ka na lutuk hi ka țap thei lova, ka en ngawt ngawt ringawt mai a ni.  A thih ațang chuan ka nun hian mu leh mal a nei lova, ka â ruai hi a ni ber mai. Thihna nunrawngin kan hlimlai par thliak a, ka hmangaihn hringnun vullai a tichuai chu hriatthiam har ka ti a. Siamtu meuh pawh ka dem lo thei lo! Mahse, amah neitute chu min thlahthlam ngai lova, beidawnna ruam zawh a, thlemnain ka chungah ro a rel dawn laiin amah ațanga chakna chuan min thuam zawk țhin.

Tunah chuan hun leh ni  liam a, kum hial a lo vei ve t reng mai le. Kan inngaizawn țan ni, ni 3 chu a lo thleng leh ta ngei a, ka lung  lengin ka khua a har ngei mai! A thlalak leh thil min pêkte chu en pahin, ka inngaihtuah a. A thlanah kalin pangpar k dah a, 'Ka hmangaih, vawiin hi ni 03, kan nun bul kan țanna ni kha a ni a sin. Nang chu la awm la, min duat leh awm si a!' ka ti sap a, kir leh tawh lo tur ka hmangaih an zalhna chu mittui nen Ka kian san ta a!

03 September 2017 | G 

2 comments: