Thursday, 28 September 2017

KA THIEM NAW A NI BIK NAWH

Ziektu: H.Zate,  Hmar Rûn

Netizen i ni chun website hran hran a Nuhmei thlalak mawi naw tak tak , en dinga mawi em em si hmu hlak i tih. An taksa-a hlietu um ta lovin an nina ang angin an inlang a, saruok le saruok naw deu damin an um hlak. Tulaia Networking site le Community site tamtaka hai khawm hmu ding a tam. A bikin Facebook a hin hiengang thlalak țawp tak tak, en a ennuomum deu deu hi hmu ding a tam a, pasal tam takin demin an sawisel nasa hle hlak. Hiengang ka pasal chanpui tam takhai ang hin kei ngei khawm hin a san ngaituo der lovin ka lo dem ve em em hlak a, sienkhawm, hi ka thuziek  min ziektirtu țawngbau ka dawng a inthawk hin chu ka dem vawng bik ta nawh.

‘ Ka thlalak kha mawi naw i ti vieu ti raw?’ 

‘aw, ti hran love, umh, ih, nal ka ti taluo ,i pieng a lo nal khawp el! Khang ang kha chu kan tuikhur-ah khawm nuhmei insillai ka hmu rawn ta a saruok law law nisien en a inhawi dei ding bah(eltam ve deu)’ 

‘Pu Zate (Papui ami sawn tak tak ni ngei ding a ni a) Ka thawsuol chu a ni a, sienkhawm, ka thiem naw ani vawng bik lem’ 

‘Iengtinam i thiemnaw a ni bik mawh’ 

‘thu sei deu hril a ngai ve a’

‘.. a ngai chun tawitea hril kher țul lova’

‘Khawpuia um kan ni a, chun nuhmei ruol hostela um kan ni bawk.  Nuhmei ruol hostel-ah kan um a, khuo a lum si a, saruok vang vanga um chang a tam a, chuonga kan um lai chun kan ruol ,henkhatin fiemthawna-in thla an mi lak a, kan inlak intuo ve hlak. Nang khawm keini ang hin um la in ruolcham chun in thaw ve hlak ka ring tho’. Ka ngaituona-ah Kan thaw ve lai a hung inlang a. ‘chu thlalak chu kan ruolhai Phone-a inthawk Pasal țhenkhatin kan hriet naw karin an lo laksawng a, chutaka inthawk chun hieng hin ngaituo thiem bak zetin a hung indar ta a nih.' a ti a. 

Ka hei ngaituo-a thil ni thei niin ka hriet a. A tir chun an khawpui sungah inthawn an ta, hung indar peiin pasal pakhatin pasal dangah, a tawpah ‘Hi nu hei inzak thei naw zie hi’ tiin Fb tieng an hung sawpsuok ta hlak. Chu pha chun pasal tam ak chun țawngbau dengkhawng tak takin an lo țawng khuma a tawpa chun nunghak ṭha tak, nungchang mawi em em kha thlalak pakhat leiin nunghak pawrche inthangin a hung inthang ta hlak a nih. A mi hril peina-a chun ‘ei nunghakhai hmingṭhat le hmingsietnaa hin a kaikuong chu ei Pasalhai hi an nih!’ a ti a. Pasal țhenkhat chun ei nunghakhai thlalak an hei hmu hin en liem ve el lovin Internet tienga sawpsuok ngei ngei ding am a nih an ti tlat a. Țawngbau a mawi naw thei tawp hmangin an hei sawisel zui a, a cheng ka man fuk tah ti niawm takin an dittawkin an hei sawisel a, a ngaithlatu ta dinga hnuol rawi rawina khawp hiel a ni hlak. chu an thilbthaw lei chun hnam dangin ei nunghakhai thlalak an hung hmu a, ei nunghakhai an zuom a, ei nunghakhai el ni lovin ei hnam chen an hung hmu inhnuoi ta hlak a nih.

Hi kan inbiekna a inthawka ka thil hrietsuok  chuh; mi tin hin thuruk ei nei a chu thuruk chu mi tin hrieta thedar kher hi a țul nawh. A thawtu ta ding chun infiemna ani el thei, sienkhawm, a tuortu ta ding chun kumkhuo chawrno nawna a ni thei. Thlalak, sex tape le thuruk dang dang an lo nei thei a, an thuruk va phawrsuok kher kha a țulna hin a nawr tluk hrim am ti hi ngaituo a ngai. A tuortu hin a nuom hrim leia a lo inlak ani khawma lo thedar pek hi a țul kher nawh. Tuortu le Thedartuhai hin hi thil hi ei hriet rawp a ngai;  mimal tin hi hnam hmel inlangna ei nih. Chu khelah nuhmei dawrawm tak taka inchei thlalak ei hmu nazawng hi an ni hurher le suol lei ani vawng bik nawh . A thedartuhai thawsuol khawm a ni ve ti hi hriet a ṭul. Thedar ninaw sien khangkhan a um awm si naw a. Chulai zing chun, nuhmeihai khawmin an thlalak pakhat leiin an nun a sie thei a,  minute khat chau an inlangna video leiin an dam sung nun a buoiin hnam muolphona a ni thei ti hi an hriet a țul. Hung upain, an nun simin lo insiemțhahai sienkhawm, an video le thlalak ruok chun a sin thaw ding a la thaw rân ding si a!

 Zohnathlak tlangvalhai hin ei nunghakhai chau khawm ni lo, ei rawng inangpui hai lim pawrche thedarna kawnga hin ṭhahnemngaiin tlawmngai insuo naw hram ei tiu.

28 April 2015

No comments:

Post a Comment