Saturday, 9 September 2017

KHA TLEIRAWL KHA



Pic : El Bethela
- H.Zate, Hmar Rûn

Chu thlalak a tleirawl pawi sawi lo leh duhawm zet mai ka hmuh chuan ka rilru leh ngaihtuahna zawng zawng a luah nghâl vek a, thinlunga thawnthu mu tawh hnu kai thovin hun liam tawh a ngaihtuahna a vak vel ruai a!

A nui mawi leh a duhawma te, a bianga biangsum leh a fuke mawi tak leh a pian fuh thlap mai te, a nun dan mawi leh duhawm tak maite kha thlir nin har a va ni țhin tehlul em!
Kha a hmel pawi sawi lo zet khân ka nunah hian thu a va sawi hnem sí êm! A țhiante zingah pawh a țawng ngai lo leh a ngawi pawl ni si khan ka thinlungah hian thu tam tak a sawi thung si!
Zing tin a sikul kal tur chu hmuhnawm ti takin ka lo thlir a, tlai lam nise, a sikul bâng, hmanhmawh taka a haw chu kham lo takin ka lo thlir liam țhin. Sikul naupang mai ni mahse, ka thinlungah erawh Lalna a chang lawi si!
A sikul thuam mawlh mai kha mi dang aiin a va inhmeh chungchuang bik tak êm! Sikul naupang zawng zawng ai hian a inhmeh bík riau hian ka hria a, a pawnfen fual hnûp maite kha ava mawipui tehlul êm!
A hmelțha tak leh ngaihnobei tak phena a nunze mawi tak khân ka rilru a hneh a. A țhiante an rík har har a,an pâwt zuah zuah pawhin a ni erawh mawi takin a nung mawl ve tawp zel.
A nui sen sen leh a hmela duhawmna zawng zawng kha ka tan a va mawi țhin si êm! Duhawmna tinrengin a bawm emaw tih mai awl khawpin a duhawm a, a duhawmna phêna a hmel pawi sawi lo lutuk leh a nun dan mawi lutuk kha keia rilru hnehtu chu a ni si!
Kha tleirawl duhawm kha ka tan chuan khawvel thil mawi ber a va ni teh lul êm. Tleirawl duhawm, pawi sawi lo leh rilru thianghlim tluka mawi awm thei hian ka ring lo!
Ka lo fiam changa a nui sen sen leh a duh loh zawng deuh sawi changa a tûm hmuk te kha ka mitah hian a mawi a, a duhawmna a tizualin a zûn zamah ka thamral a ni ber e.
Nêlawm tak, zuamawm si lova awm dan a thiam riau te khân nu fing tak fanu a ni tih a lantir a, a hmel nêm leh derdep tak phên a a rilru paukhauh tak khan nu leh pa tumruh tak hnuaia seilian a ni tih lo theih lohin ka lantir! A hmel ringawt hmuh pawh thlahlel țhin tan chuan ka lam hawi a a lo nui sen sen țhinte kha ka tan hmuhnawm a tlingin ka khawvel hman tinuamtu a va ni țhin tehlul em!
Aw, Kha tleirawl kha, khawiah tak awmin eng dinhmunah tak ding tawh  ang maw?!
09 September 2017 | G

1 comment:

  1. Nalh lutuk e. Thlalak pawh a nalh.

    ReplyDelete