Labels

LightBlog

Sunday, 17 September 2017

PATHIENNI KRISTIEN, BIEK IN PEL LO KRISTIEN




Ziektu: H.Zate, Hmar Rûn


Tuk khat Ka Nu dawrah inthunga thingpui ka dawn lai chun Pa pakhat hi hungin ti ti a hung vawr luom a. Kan ti ti pei a, chulai tak chun a lengna chanchin hrilin “vai pakhat leh kan infiem , an sakhuo chungchangah ka fiem ka ti leh ‘PATHIENNI KRISTIEN-HAI’ a mi ti el a ngaituo a suksei khawp el” ti thu a hril chun lungril a kam tlat el.

Kristien intiin ring nawtuhai chu ei hei hmu dang ve khanglang a, tu-in am a nih a ti angin ‘ei ring hi indik naw lem thut sien an mi hmusit awm de aw’. Pathienni mawi em ema incheiin ei inkhawm tawl a, thawtanni a hung tlung a, tuolbemhai leh inkhel ei tan a, inringni chen nuom tawkin khawvel ei hmang a, a nawk Pathienni a hung tlung a mawi em em le fel em emin chawibiek-ah ei thang nawk hlak. Biek inah hin chuh ei fel na rawh ie. Hawp ding hawp hlak khawmin a hawp nawh a,mi dem hlak khawmin a dem nawh. Biek inah chun piengthar tha angin ei inngai a hawi deu tak. Sienkhawm, ei kristienna hin Biek In khawm a pel naw a hawi ta tlat. Biek in varendaa inthawk ei setan lungril ei phawr tan nghal hlak.
Biek Ina thaa inngai hi ei tam a, tulaia Mizoram a fiemthu ‘Biek Inah i um a Ringtu tha tak anga i inngai a ni chun, Lirthei In(garage) a khawm um la Mawtawr angin i’nngai tho i tih.’ ti hih ei la hriet tawl naw ni mei a tih. Biek In a lungawi tawk naw a hmun thienghlim buotsai tawk hlak ei tam. A pawisa seng zawng khera pieng thar tum pawl leh. A kelkang fe zawng khera har hlak hi ei tam na rawh ie. Kelkang fe kha ka sawisel a ni nawh, mi thaw-na zara thaw ve mei mei ei nina lem hih a nih ka sawisel chuh.
Miin an mi thlir a, ei kristien nun an mi en a, danglamna hmu ding an nei naw ni ngei ding a na ‘kan thaw ang ang in thaw ve thei vawng, in thatna bik ka hriet nawh’ an ti hin a sukchieng. Ei kristienna hih Pathienni kristian, biek in pel lo kristien hi a tam ta a. Ka ruolpa vai pakhat chun ‘Inkhawmpui lien in ti le hlak kawppui inzawngnain in hmang tawl a’ a la ti nawk deu deu, a thil hril a dang chu hril ta da el ei tih. In enfie deu chu ei ngai a nih. Tulai hnai el Kristien ramah Kristien-haiin Kristien Biek In ei la suksiet nawk. Ramthim/ramthar tia rawng ei bawl lai hin ei nauhai sal-ah an thuoi zo ding a ni hih. Thaw ro, tho ei ta inngir ei ta, Pathienni kristien , biek in pel lo kristien ni ta lovin ni tina kristien ni lem tah ei tiu.

18 Changèr 2015
Hmar Rûn.


 More @ http://hzate.in/

No comments:

Post a Comment