Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Wednesday, 13 September 2017

THLIR NGHAWKUM LO





H.Zate, Hmar Rûn


A hmel ka hmu tir khan ka lungrilah ieng bek bek a um khawmin ka hriet nawh! Sienkhawm, kha tuma ka hmu ruok kha chu ka thawsuol am ama thiem naw lem khawm ka hrietthiem ta nawh. A hmel ka hmu naw chun ka buoi a, a hmel ka hmu le hlak ami hmu inlauin ka en ngam bawk si nawh.


Mitthlaa inlang, a hlimthla khawm ka ta dingin hlimna a ni tak vei leh a thlalak ka Phone a mi lem hi chuh ka ta dingin thlir nghawkum lo chu a ni chieng!
Ama leh chun Khawvel hi a mawi a. A kiengah chun hi hnuoi rinum hi Paradis a'nchang hlak! Ka ta dinga a hlut zie hi hrechieng chie sien chuh a lawm naw vek khawma mi ti hrim hrim a tih!

A hmel ka en ringawt khawm hin ka nun a sukhlim a, a um dan iengkim hi ka ta ding chun a mawi ngawi ngawi a, beidawng lai khawm a innui hmel hin beiseina a mi pek hlak. A taka ka hmu khawm ka dittawk nawh a, a thlalak khawm ka en ngawi ngawi el a nih. A tawngbau khat khawm ka ta dingin a hlu a. A mi Chibai ringawt khawm khan ka tim sur surin ka hriet!
A nunzie a mawi a, a chang mawi naw ngai nawh . Ngaina nawtu ta ding chun thik ruol a mawi a ni a, Ngainatu ta ding hlak chun invetpui khawp a nih. A mitMeng khu sieu dam kha ka ta ding chun ngaituona sukchawmawl vawng thei khawpa mawi a nih. A kepar, a kechawn, a kut par, a ban, a phing, a mal , a mawngtam, a awm bawr, a Hmai le a iengkim el kha ka ta ding chun thlir nghawkum lo a tling.

A hmel hi mi angin lo tha naw reng sienkhawm, a changzie le a nun dan hi ka ta ding chun ngainatum le thlir nghawkum lo a ni tah hrim hrim!
Hmun hran hran, khuo hran hran fe khawmin, lungrilah a cham veng veng a, mitthlaah a hmel innui sieu kha a hung inlang veng veng hlak! Ngaituo naw thei naw, ngaiven naw thei naw a nina hi ka lungril la em emtu a nih. Theinghil ka tum po leh ka hrietsuok a, ngaivennaw ka tum po leh ka ngaiven zuol ting el si.

Ka ta ding a a hlut ang hin a ta dingin hlu ve naw langkhawm, ka ta dinga a mawina a nep Chuong si nawh. A innui hmel a mawi tluk zetin a nun dan a mawi a. Puonbil bil a'nhme tluk zetin hnam dang thuoma inthuom khawm a mawipui tho! Facebook le Instagram-ah a saruok thlalak post ve naw Sienkhawm, ka ta ding chun a mawi hlie hlie a. A dp-ah a bieng sukpuomin a hmel ang ni l khawpin chei kuolvel naw Sienkhawm, a mawina a dang chuong si nawh.Thlang a Sappui Nunghak ,Saka Korean le Hmar tienga Chinahai hmel ang put naw Sienkhawm, ka ta ding chun 'Hmar Nunghak' ngei hi thlir nghawkum lo a ni rawp hlak!


03 October 2016, Thingdawl

1 comment:

  1. Model chu a va țha zet zawt de. A nal khawp el.

    ReplyDelete