Tuesday, 31 October 2017

TÊNU, MANGȚHA

Model:  Nuni Ralte
Ziaktu: H.Zate, Hmar Rûn.
- hzate.in
Facebook khawvelah  'Tenu' tia awm a profile chuan 'Friend Request' min rawn thawn a. Ka hmu chiah chu țhian atana min sawmna chu ka chhang rang kher mai!  Ka pawm leh rualin lawmthu ka hrilh a. Chu chu kan thawnthu ințan dan a ni.
A thlalak 'like' ațanga țanin a tawpah chuan kan phone nambar te inpein kan inbe ta fova, kan hriat loh hlanin inbe lovin kan lo awm thei lo dêr tawh!
Kan inbiak tirh ațangin ngaihzawng nghet tak a neih thu a sawi a, ka hre bawk. Chumai ni lovin, kei ngei pawhin a chhia chhiain ngaihzawng chu ka nei ve țat tih a hria a, ngaihzawng anga inen thei kan ni lo tih chu kan pahnihin kan hria a, kan chiang dun viau! A chhan chu, a kum leh lawka innei mai tura 'suankual' dah diam tawh an ni a. A sap țawng takin an in 'engage' tawh a ni ber ang chu. Kei pawh nupui nei mai tur ka ni tawh!
Țhian angin kan inbe reng a, kan inthlah chuang lo. A chanchin min hrilhin ka chanchin ka hrilh ve țhin a. A bialpa nena an intawn dan hlimawm tak min hrilh zan phei kha chu kan nui nasa khawp mai. Hnem a ngaih chang ka hnem a, ka lungngaihnaah min hnem ve țhin.
Hmeichhe zaidam leh nun nem tak mai a ni a. Mahse, a duh loh zawngah rau rau chuan khauh leh rum tak mai a ni thung si. Hmeichhe fel famkim ni lo mahse, hmeichhe fel tih chauh a sawi tura uiawm khawpa fel leh țha a ni lawi si! 
A hmel leh pianzia lah sawisel tur a awm lova, mipa mit fukna leh nulate thik rawn khawpin a țha ve a ni. A hmel țhatna leh a pian nalhna mai ni lovin a piaha a nunze mawi tak mai hi a ni min hneh fo țhintu leh heti ang khawpa ka buaipui tak chhan pawh hi. Hmeichhe rilru tluang leh mipa zah thiam, țawng duh , țawng thei si lo a nihna hi a fakawm a, kohhran leh khawtlanga inhman a țhulh loh ang bawkin in chhunga a mawhphurna a hlen a, a zirna lamah pawh a nêp lo!
Chutia inbe ta fo chu kan mizia kan inhre tawnin kan hre tam zel a. Inhriatchian hnu chuan kan ze mil ve ve kan intawng a ni tih kan hai lo. Kan inbiak ngun poh leh kan inngainaa, Kan duh leh tum rêng vang ni hauh lovin Kan inngatna chuan zual lam a pan zel mai a lo ni. 
Kan inbiak tirh khân ka rilru chhungril ber a luah hi ka ring ngai lova, ka nupui neih niin, 'amah ni zawk se aw!' ka ti veng veng dawn tih ka hrelawk lo, a ni pawhin a ring ngai hek lovang. Mahse, tunahchuan Inbe lo leh inhmu lovin kan awm thei lo a ni deuh ber tawh a, kan inthlahlel ngawih ngawih a ni deuh ber tawh. Mahse, Pasal nei mai tur a ni a, tihlan a rem lo. A ni pawhin min haw lo tih ka hria a, inhaw lo na na na chu mi hriat lohin kan inkawm ta fo reng a ni.
An khua leh kan khua hi a inhnaih vangin ka leng ve fova, hmun nuam tak takah te lêngin kan inkawm ve fo țhin.
Mahse, rilru chhungrila mei anga min hliau a min ur vut vuttu hi sawi loh chuan a ur a na ting a, zep tum sateh mahila, ka tum reng vang ni hauh lovin ka sawi chhuak ta tho tho a nih kha. Chu thu, kan rilru a hun rei tak inup tawh kan sawi dun zan chuan a tu a mah kan mu lova, zan hian hahdamna ni ve turin kan tan hlutna a nei lo a ni ber mai. A changin call in a changin thu thawn zawngin kan ti a, a țap tih ka hria a, mahse, ka hriat hlau tak siin a țap. Ka tana a hlut ang bawkin a tan ka hlu a, kan ngaihdan kan rilru engkim inhrilh a, inhnem tawn țhin kan ni a. Engkim tiah zêp kan lo nei ve ve a ni ber zawk.  Kan sawi chhuah ngai loh thil kan sawi chhuah meuh chuan kan natpui dun lawi si! 
Chu mi zan ațang chuan mi hriat lohin hmangaihna khurah kan lo lut reng a, a rukin kan ngaihzawngte lakah kan lo rinawm lo ve ve tawh a ni. Mahse, thianghlim takin nun kan hmang a, kan nih hnu hian khua hmun lo na na na chu  vawi khat mah kan inhmu lo! A pasal neih hun a hnai tial tial a, kei pawh ka nupui neih hun tur a hnai ve tial tial a. Biak Inah meuh puangin lehkha hial an târ ta. Rilru a hahin ngaihtuahna a bing mup mup a. Ngaihtuahna fim hman a har țalh țalh tawh khawp mai.
Ni tin inkawmin kan inbia a, Inbe lovin kan awm thei tawh lo a ni ber mai. Ka ngai ngawih ngawih a, a ni pawhin min ngai a, kan inthlahlel a ni. Kan inkawm nasa bawka ka bialnu, ka nupui ni mai tur pawh ka ngaihsak hman lo. A changin min ringhlel ve fo mai. Mahse, rin zawn tur a hmuh miau loh avangin a reh leh mai țhin. Kan inneih a hnai zel a,buai lovin kan inzui reng a. Ka ngaihtuah chang hian min hmangaih hle niin ka hre țhin.
Ka nupui neih ni a thleng dawn ta. Ni khat chauhin min dang tawh. Mi dang chu ka nupui neihna tur inbuatsaihin an buai luai luai a, kei erawh Tenu te khua,( veng a ni mah zawk), lam ka pan a. A hmun ngai, tun hmaa kan lenna țhinah kan inhmu a.  Chumi ni chuan kan damchhung hun awm dan tur kan sawi dun a ni.  Ka sawi hmasa a, ka hmangaih thu leh ka nupui tur kalsana amah pawm mai ka duh thu nen lam tlang takin ka sawi a. A  ni a țawng chhuak a, "..Mahse, a lehlam te pahnih hi ngaihtuah ve la!" a ti zet a, "Phatsan an nih vanga an nat dan tur chu han ngaihtuah chhin teh." tiin a chhunzawm ta a. Kan hmangaihna kan ngaih pawimawh zawk chuan chu kha ni la la khan  ka ru anga hmun dangah kan tlan dun ang . Kan hmangaihna dahțha a kan chhungte leh kan kawppui turte kan  dah lal zawk chuan kan thlan tur a chiang.
A tawpah chuan, heti hian kan rilru kan siam a, kan hmangaihna ni lovin min hmangaihtute hmangaihna zawk dah lalin, kan inkara hmangaihna kuhmum erawh par chhuak ve lo tura tuma hriat loh tura thupbo hlen kan tum ta zawk a. Chu ni ngei chuan, hmangaihna țawngkama inbe leh ngai tawh lo turin kan inthlah a. Nupui nei tur chuan thutlukna ka siam a, a tawpna a tan leh a vawi khatna atan ka kuah a, a hmuiah ka fawp vawng vawng a, "Tenu, Mangțha!" ka ti sap a. Kan inkara hmangaihna thawnthu par vul ve lo tur chu kan titawp ta a!
31 October 2017 | Guwahati


Saturday, 28 October 2017

ȚAHNA NUNHLUI


Pic: Malsawmkimi, 

Ziaktu : H.Zate, Hmar Rûn.

Based on true story )

Kum 10 lai a lo liam ve ta reng mai. Khang hunlai khân tleirawl duhawm, inkhaitli, sang leh hmețha, Nu leh paten beiseina sang tak nena an thlir ka ni. Ka han tleirawl chhuak chu ka lo chhe em em lo bawk nen hêltu leh chhaitu pawh ka ngah ve a sin aw! Rilruin eng teh vak a la ngaihtuah lova, nun kha nuam ti em emin ka hmang ve a, rilru engthawl takin ka nung ve tawp mai   a ni.

Kum 2006 niin kum lamah kum 16 ka nih kum a ni a. Ka lo tituai ve bawk a ni ang e, kan khuaa sawi hat ka tling ve a. Tlangvalte leh rawltharte thlir rawn, pathlawite fiam rawn ka ni ta dêr mai.

Kohhran thiltihnaah ka tel ve a. Chutah chuan a ngai te bawkin tlangval pakhat chuan min la bêm reng a. A țhianpa min koh tirin ka laka a luanliam zia chu ka hriatthiam phak baka rilin min hrilh a. A rûkin lawm viau mahila ka tilang duh lo. Mahse, a ni erawh ka duh hran lova, Ka chhang mai bik lo.

Chuti chuan min bêmtu tam takte zingah chuan   a ni zawng a danglam tlat. A taimain min vil peih a, min bêm tak reng avang leh ka țhiante'n chhang tura min tih vangin kei aia kum 2 a upa ka chhang ve ta a. Mahse, ka duh em em em vanga chhang ka ni hran lo, a hlimna'n a chhang mai chauh hi ka ni ber e.
Ka nun chuan nun thar, bung thar a kai ta a.  Chutia inngaizawng ta chu min duh em em mai a. A zeiin min duat a, min ngaihsak thiam em em a, a bula ka awm hi chuan ka pangchang tlat zel. Min ngaihsakin min duat bawk a, nuam ka tiin ka hlim thei ngang mai. Min duh ngawih ngawihtu ka tawng niin ka hriaa nuam ka ti a, Ka ngaina tial tial mai.
Zan inkhawmah te kan inhmu ve țhin a. Zan tin deuh thaw kan inhmu ve țhin. Engtik laiin nge a zûnah ka uai pawh ka hre lo. A tel lovin ka awm thei lo  a ni deuh ber tawh. Ka ngaiin ka duh a, ka thlahlel ve ngawih ngawih tawh mai. Ni khat lek pawh a mah hmu lo emaw be lo emawin ka awm thiam tawh lova, chutia thla 1 dawn kan inngaihzawn hnu chuan, ka lo hmangaih ve ta der mai a ni. Ka tan a țhain a fel em em a, rilru chhia a pu ngai lo. Zan khat chu kan inhmu a, min ngaih thu leh ka bula awm reng a duh thu a sawi a. Kei pawhin ka ngaih thu ka hrilh ve bawk a. Min kuahin ka biangah min fawp zauh a, ka hmuiah min fawp leh a, Ka chhang chiang kher mai. A nuamin ka sa pup pup maiin ka hria. Mahse, awm dun reng thei kan la ni si lova,  inah ka haw  a, khumah ka ngaihtuah a, ka hlim veng veng mai.

Kan inhmu reng a, kan inbe reng bawk a. Phone te kan nei ve tawh bawk a. Nuam kan ti hle mai. Min duat em em a, a bula awm a nuamin ka thla a muang hliah hliah mai a ni.

Pathianni tlaiah park velah kan leng fo țhin a. District Park leh hmun dangah te lengin nun kan chên ve țhin a, Kan picnic phei chu nuam tak a ni.

Zan khat chu inhmuh a rawt a, chhungte hnenah țhiante ina kal tur anga insawiin sikul tlangah kan inhmu a. Chu zan chuan, "Min hmangaih em?" a ti a, "lutuk" tiin ka chhang a. A tana rinawm reng turin min ngen a, mi intiamtir hnu chuan hna a hmu a, a hna vanga khaw danga a awm a țul thu a sawi ta mai a. ka ngaihtuah ringawt pawh hian ka lung a leng lawk. Kal lo mai tura ka ngen lahin, "i tan zawk a lawm!" a ti a. Chu zan, kan inthlahna zan chu kan duhthawh dun ngei mai. Min kuah a, min fawp a, min keih hi a ni ber mai. Mahse, sex erawh hmanpui min tum lo. A pawi thleng si lovin, kan duh thawh dun ngei mai. Ka kawng chin chunglam hi chu a fawpin a hne chhuak vek a ni ber e. Châkna chhuak ve mahse, kan insum țang țang a. 

Zing a lo ni a, a hna zawmna lam turah min kalsan ta a. Ka lunga leng ngei mai.

A hna thawhnaah chuan kum 1 dawn a han awm a. Ka ngaiin ka thlahlel thei khawp mai. Hêltu leh bêmtu tam tak nei mahila ka rinawm loh san ngai lo, a chhan chu ka hmangaih miau a. A tan ka rinawmna ka vawng fan țhin.

A rawn haw chuan kan inkawp chawt a. Zan tin lo lengin ka inkawm a, mahse, ka inning ngai lo. Kan inngaihzawnna pawh tlang hriat a ni ta. Min duh hneh em em a, ka lakah a thikthu a chhe em em mai a ni. Hun remchang kan neihin duhthawh takin infawp țhin mahila, min khawihchhiat erawh a tum dêr lo hika zah phah a, ka ngainatna a zual phah ngawih ngawih mai a ni.
Hun a lo kal zel a kan inkawp rei tulh tulh a, kan in hmagaihna pawh a nasa tulh tulh bawk a. Mi pawh țhen mai mai theih tur kan ni tawh lo. Ka luck ve hle a, bêmtu ka ngah ve a, engkim ka hrilh a, a thik ve hle țhin. Min tibuaitu chu insualpui mai hi a tum fo. Ka pian nalh zia leh ka awm bawr nalh zia hi min hrilh fo țhin a.  Mahse, pawi deuh chu zu in a ching țan a, a thinrim changin kut min thlak țhin a. Hrehawm ka ti thei hle. Mahse, ka țhen thei lo. A ni pawhin min țhen thei hek lo.
Ka hmangaihin ka ngaina a, Ni khat lek pawh inbe lo leh inhmu lovin kan awm ngai lo. Hun a lo kal ve zel a, innei tur pawhin min sawm fo tawh, mahse, ka la naupang em a, ka ngam lo a ni. Zan khat phei chu min ruk a tum a, ka țang a, ka duh lo chu țap der a, Min tilui bik lo.

Luck ve nafam chuan bêmtu hi ka nei reng a, khaw hran ațang pawhin min bêm fo mai. Chutihlai pawh chuan Rema, khaw dang a mi hian min bêm reng țhin. Ngaihzawng ka neih thu ka hrilh pawhin engah mah a ngai chuang lo, ka be chhe hran lo.

Niin kar, karin thla, thlain kum, chu kum chuan kum vêk hringin kan inkawpna pawh a kuma chhairin kut châng tliah keuh keuhna tham a ni a. Kum 3 zet a lo liam ta reng mai. Kan inngainin min tihlim thiam a, a bula ka awm hi chuan ka kim vek ni ber hian ka hre țhin. A bula awm a nuam a, ka thlahlel ngawih ngawih mai a ni. Ni 3 lek lek hian kan va han ințhen zing tak em! Kan ințhen tak tak thei lo, kan inmamawh tawn a ni ber e.
Zan khat chu a zu in fo chu zilhin sim turin ka hrilh ve a. Mahse, a sawt lo. Inhnial kan țan chu ani der mai. Dik tak chuan, pasal zu in mi neih chu ka ngam lo a ni. Zu in mi pasal neite chan ka hmuh hian inchhir ve ka duh lova, ka ngam lo a ni. Kan inhau a, kan inhnial a, a tawpah min beng țhuai a. Ka țap a, ka rilru nâ leh thinrim chuan, " i sim duh loh chuan pasal ka nei dawn!"  Ka ti a. Chutah, a ni chuan, "Nei rawh, nei rawh, i duh a, i hmu a, i ngam a nih chuan nei rawh." a ti a. "I duh leh pasal chu nei rawh" a tia leh a, Ka rilru a na ngei mai. chu a țawngkam chu ka la na ta em em mai a. Duhthawh em em a infawp țhin kha, thinrim țhumin kan ințhen ta a. 

"I duh leh pasal chu nei rawh"a tih tak chu ka la na ta em em mai a. Chu zan la la chuan, min duh em emtu, ka ngaihzawng neih pawh min nghak peihtu Rema chu min nei a, min ru turin ka sawm a. A lawm ngang mai. A tuk a lo kalin min lo hruai turin ka ti ta a.

08 April 2017 | Thingdawl
Part 2

Rema ka ko chu ka inchhir leh hnuhnaw hle a; mahse, thutlukna ka siam tawh chu sût ka tum dêr si lo. Chu zan chuan nunhlui tam tak ka ngaihtuah a, rilruah lo tharin mitthlaah a lo lang zut zut a.

" *bawihte, ka hmangaih che!*" tiin ka hmuiah a fâwp a, duhthawh êm êm maiin ka lo chhâng lêt ve a. Kan inngaiin kan inthlahlel bawk a, nuam zawng zawng hi kan ta a ni ringawt. Mahse, min khawihchhe duh ngai lova, tun țum pawh hian a tum hek lo. Kawng a chin chunglam chu hmuh loh leh khawih loh pawh a nei tawh lo, chu mai   a ni lo, a fawp chhuak vek tawh zawk. Kan inhmangaih em vangin lawițhat zana mi tur erawh a hun tea hman turin kan khêk a. Châknain kan khat a, vawi khat min sâwm zeuh chu nise, kei pawh hi ka âwn duai duai ngei hian ka ring. Chu zan chuan rinawmna kan intiam a. Kan hlim dun veng veng mai a ni.
Ka ngaihtuahna vâkvel ațang chuan harh chhuakin muthilh ka tum a, ka thei mai lo. Mahse, a tâwpah chuan ka muhîl ve thei ta hrâm a.

Zing ka tho chu ka phûr lo ngei mai. chutah, ka hmangaih êm êm, a tana engkim hlan ka lo phal leh ka hlimna tura engkim tih huam țhin chuan min rawn call in mi rawn biak a tum a,  Ka chhang duh lo.  Ka chhân chuan ka thu ka sût leh ka hlau a ni. Min ru tura ka sawm avanga hlim em em hi ka țahtir thei tawh lo. Thu lo thawnin ngaihdam min rawn dil chamchi a, mahse, chhân enah ka en tawh lo. Rema chuan min rawn biain, " *Bawihte, i tân ka rawn kal a ni a.* " a ti a. A țawng dan leh a awki pêk dan chu a phûrin a hlim tih a hriat a, chu a hlimna chu tihchhiat ka duh tawh ngang lo ani.

Ka inngaihtuah a, a rûkin ka rilru a na a, pasal nei anga ka inngaihtuah pawhin ka lung a lêng lâwk a, nunhlui liam hnu te mitthlaah a lo lang zut zut mai a ni.

Pathianni tlai a ni a, lêng turin min sawm avangin phûr takin ka insiam a. Ni e, phûr lo thei ka ni hleinem, ka hmangaih ber nen kan lengchhuak dawn miau a. Ka insiam zawh chuan a bike in min rawn lam a, chak lutuk lo hian a khalh a, ka kuah a, a hnênah hi chuan ka thla a muang veng veng mai a ni. Țhiante pawh an lo kal ve a, nuam kan ti ngei mai. Kha ni a District Park han mawi bik zia kha aw! A ni, a kiangah hi chuan engkim hi a mâwi em em mai a ni. Khawvel hian min țhen theih hi kan ring ngai lova, kan tum bawk hek lo. Kan inneih huna kan awm dan tur leh fa ka neih zat turte duhthu kan sam dun a. A fâlin hun kan hmang ngun a, kan inngaih erawh a bâng chuang dêr si lo. chumi tlai pawh chuan inthlahlel em em bawkin kan inthlah leh a. Kan la inneih miau loh avangin duhthawh taka infawpin, kham lo taka duhtawk a ngai a, inning lo taka kan inthlah a țul leh țhin. In ka thleng chu ka ei rawng ka bawl a, chaw te eiin, kan chhungkua pawh kan hlim ve țhin. Ka nu leh pate pawhin Ka hmangaih nena kan inkâr hi an hria a, amah pawh an ring êm êm tawh. Zanah chuan ka nawm sam loh thut avang leh kan tlai deuh avangin ka inkhawm lova, ka chhungte erawh inkhawm turin an chhuak vek a.  Ka tihtur ka tih zawh chuan, ka chhungte an inkhawm vek vanga in min nghahpui turin ka sawm a, a lo kal tur thua min chhangin call chu a dah a. In min ngahpui dawn nge keimah zawkin hi min rawn awm dawn pawh ka hrethiam lo. Minute 10 hnuah chuan kawngka a rawn kik a, nghakhlel em em a lo nghaktu tan chuan rang taka hawnsak loh phal chi a ni lo.  Kawngka ka hawn sak a, min hmuh leh rualin min fawp țan nghal hi   a ni dêr mai. A rem lai lai min fawpin min chûl a, min pawm nawlh a, țhutthlengah min  țhut tirin nuam kan ti ngei mai. Chutia rei lote kan infawh hnu chuan kan duhtawk a, " i rawn thleng har lutuk a, ka lo ngai hman che a lawm!", ka ti a, "kei tak hian a sin ngai che. I inah lo lawi tawh mai rawh" a ti a. "I rilru te han puitling ve phawt se," ka ti a, kan nui dun hak a. A kiangah hi chuan ka thla a muanga ka hlim țhin a ni. Min ngaihsakin min duat thiam a, a chang hi chuan ka pangchang mah mah te hian ka hre țhin. Engkim mai hi a tel lo chuan tih ka tum lova, a theih chinah chuan ka sâwm zel mai a ni.
Ka phone a lo ri a, ka han en nâk chuan Rema a lo ni a, ka chhang a, "Bawihte, i tan liau liau, nangmah lam turin in khuaah ka awm tawh e. " a rawn ti a, "chaw ei khamah Kawtchhuahah ka lo nghâk ang che." a ti a. Phone ka dah rual chuan lawm viau aiin rilru hahna vangin ka tawt up up zawk a.  Ka hmangaih ber kalsanin ka hmangaih loh chu ka pan dawn a ni si a. A rûkin ka pindanah ka insiam kerh kerh a, ka mamawh tur ang tlemte chauh ken tumin ka insiam mial mial a, tlai chaw kan ei hmain ka insiam zo vek a. Chaw kan ei a, kan ei zova, thleng sengin in chhung ka tifel a, a rûkin rilrua tâwtin a khingbai ngei mai.
Ka phone a lo ri a, ka en chuan, Rema hian , "Ka nghâk tawh che a nia" tih chauh hi min rawn thawn a. Ka chhungte hnenah chuan ka pite ina kal tur anga insawiin ka țhiannu chu min rawn sawm tura ka lo hrilh tawh angin min rawn sawm a, kan kal dun ta a. Kawng lakah pawh chuan ka thil tih chu sût leh mai te ka duh rum rum; mahse, keimah vânga Rema rilru nâ taka a awm tur chu ka ngaingam si lo. Rema leh a țhianpain min lo nghahna chu kan thleng a,  ka țhiannu leh a țhianpa pawh zah zo lo chuan min lo kuah a, duhthawh takin min fâwp a, ka chhang lêm lo. Tichuan, Rema'n min phur a, kan tlan țan ta a. Zan khaw vâwt a Bike a han inphur chu a vawt duh khawp mai. A bike a chuang a, an khua pan reng chung pawh chuan rilru hi a la khingbai em em mai a. Rilruin ka hmangaih kan nunhluite a chhui kir a, kum 4 meuh lo inzui tawh chuan nun hriatreng tur a lo tam bawk a, lung a lêng ngei mai. Hmangaih lo ne turin rilru ka siam a, hmangaih lote in ka pan vuk vuk chu ani ta mai si a. Kan khaw ram chin pelin kan tlan zel a. Kawl tin maiah chuan ka rilru hahna leh hrehawmna an tizual ni mai hian ka hria. Rema chuan min hrethiam nge ni min  ngaihsak khawp mai a, a khât tawkin min be deuh reng mai a ni. An khua kan thlengin, an vêng kan lût a, châkna aiin hrehna a nasa zawk ta ve ang. An in kan lût chu a chhungte'n min lo nghâk țhap a, a zahthlak duh ngei mai. An felin min lo lâwm thiam a, a nu mawlh mai kha a fel a ni. Vawt ka tiin, ka tlanna kan chau bawk nen, zing lam dar 1 a lo ri tawh bawk a, mut zai kan rêl ta hlawm a. Awi karei, Rema nena kan mutna tur chu an lo ruahman thlap a. Mipa nen khum kan ințawm hmasak ber tur a ni a,ka hreh ngang mai. Chutah, ka hmangaih miah loh, ka duh satliah a la ni leh nghal a. Ka zâm leh hreh lutuk chu mumang chu nise harh chhuah san ka duh a, mahse, a tak a ni si a, khum danga mut mai te pawh ka duh rum rum. Ka thianghlimna leh ka nulâtna titâwp turin chu khumah chuan ka lawn kai ve ta a!

09 April 2017 | Thingdawl

Part - 3

Kan han mu dûn ta a, a rûkin ka va han hreh tak em! Ka tha a khûr a, ka rilru a buai mai dawnin ka hria. Mitthlaah Sanga nena kan hlimlai zawng zawng a rawn lang a, ka bula mu chu   amah ni zawk se ka ti ngei mai. Angel te fan ngai loh ram min fanpui lai pawh chuan ka rilru sir chuan Sanga ka ngaihtuah reng a, Ka rilru hi a na ngawih ngawih zawkin ka hria. Rema tana a nawm loh hlauin, kei ngei pawhin nuam ka tih ve theih nan Rema chu Sanga ah ka chan ta a. Ka tan zawng zan hlimawm tak ni lo mahse, Rema tan erawh a ni chiang ang, ka thianghlimna a thliak miau a, ka tan pawh, zan hriatreng tur chu a ni ta ve ang; hmangaih loh hnena ka thianghlimna ka hlan zan a ni miau a.
 Kha zan kha ka theihnghilh thei lo ka hmangaih miah loh mipain ka thianghlimna ka chên a, Ka rilru hi a nâ takzetin ka hria. A tisualtu zâwk ni siin Rema kha ka ngei ngawih ngawih a, nunrâwng hi ka ti deuh tlat pek a, ka haw ngawih ngawih. Mahse, engtin nge ka tih chuan ang, ka pasal atan ka pawm tawh miau a, pasalin nupui hnen ațanga a beisei leh a hmuh tûr chu ka pêk a ngai miau si.

Ka phone chu ka off char char a, zing kan han thova, ka han tinung chu ka chhungte'n min biak an lo tum nasa mai a, mahse, ka țhiannu ka hrilhtir a, Sanga pawh a ni chuan   lo hrilh ve nghal a. A rilru a nat hle thu min hrilh.
Tlai lam a ni a, Rema nen ei rawng kan bâwl laiin ka phone a lo rî a, Rema'n lo lain, "Bawihte, hei an be duh che." tiin mi rawn pe a, ka han en chu Sanga lek lo niin, "Bawihte, ni zan rawn lên ka tum a, i chanchin ka lo hria a, heti hi i lo ni ta mai si a, hetiang mai tur chuan ka lo ring ngai lo,  mak ka tiin ka rilru a na khawp mai. Engati nge hetianga i awm?" a ti a, ka hamhaih sawi tur hre lo chuan, "Nangmah vang a ni hi," ka ti a, Phone chu ka dah ta daih a. Rema chuan min lo en reng a, mahse, a hrethiam ni ngei tur a ni engmah min zâwt lo chuan, min kuah a, ka hmuia min fawpin, "Bawihi, ka hrethiam lutuk che a lawm!" a ti a.A felin a dawh thei a, ka rilru zawng zawng ka hlân thei lo erawh keimah hi ka indem.
Ka pasal leh a nu chuan min duat thiamin min ngaihsak thiam em em a. Ka ni tin hun hmanah hian min țawiawmin min puibawm reng a. A ni têl chuan nuam ka ti ve zel a, Rema nen pawh   a hma aiin kan innêl a, hriatthiamna nen min enkawlin nuam ka ti tawh khawp mai. A lo rei hnu chuan rilruah pawh ngainatna a lo piang ve a, nupuiin a pêk tur leh pasalin a beisei nupa nun nuam tak pawh ka pe ve thei ta a.
Palai tirin an leng ve reng a, mahse, ka chhungte chuan Sanga nena kan inngaihzâwn dan leh kan lo inzui tawh dân an hriatin kan ințhen leh mai ringin, min ring zo lo a ni chêk ang chu min rem duh ta lova, a buaithlak khawp mai.

Ka pasal chu min enkawl danah demna tur ka hre lova, a chhungte pawh ka lakah an felin min duat thiam em em a, ka ta angin ka en ve thei tawh a, a nuam tawh khawp mai. Mo thar en tur inleng an nei deuh reng a, țhenawm khawveng nu leh pa bakah a țhiante an rawn leng lût ngun ve khawp mai. Mi țha tak chhungkua an niin ka hria a, veng bawr lawilenna ber an ni a, ka chunga an fel dan em em phei hi chu ka phû hlawl lo.
Ni khat chu tih tur em em a awm loh vangin kan pindanah ka awm a, kan khumah mu zalin, thil eng eng emaw ka ngaihtuah a, sanga nen a ka awm dan leh nunhlui thlengin. Rema leh Sanga chu an miziaah pawh inthlau tak an ni. Chutia thil ka ngaihtuah lai chuan ka lo muhil a, ka mumangah Sanga lo hmuin duhthawh leh ngai em em hian min lo kuah a, kei pawhin ngaina em emin ka lo kuah a, mahse, "nau a pai a, nupui ka nei dawn," tih hi min hrilh a, mak ka tiin nâ ka ti ngei mai. Ka țap zawih zawih a. Chutihlai tak chuan Rema'n min lo sawi a, ka harh zawk a. Ka lo muhil rei ve hle a ni awm e. 
Chutia thla fê kan awm hnu chuan ka pain ka pasal a hmuh duh thu sawiin kan pahnih chuan zin turin min chah a.

Zin tur chuan kan inbuatsaih a, zing chaw ei kham ațangin kan kal a, hmanhmawh lutuk lova kalin chawhnu herah kan in kan lût a. Ka chhungte chuan min lo dawngsawng țha ve khawp mai. Ka pain Ar min lo talh a, hlim takin kan ei hova, boruak rit zual a kiang tawh bawka a ziaawm khawp mai. Kan khuaah chuan kar khat chhung kan châm a, țhiante leh țhenawm khawvengte an rawn lawi lût reng a. Țhian kawm tur an tam khawp mai. A chângin huanah te hna thawkin kan kal a, ka pasal pawh ka chuungte mit a tlung țan hlein ka hria.
Chutia kar khat kan châm hnu chuan awm reng theiha ni lova, ka pasal chu a haw a, kei erawh ka chhungte'n min la chelh rih avangin ka la châm a. Ka pasal haw chuan min ngaiin min ngaihsak em em a, a hun awlah min rawn ve reng țhin; mahse, ka be be țha peih lova, ka ning lek lek țhin. k

Ka pasal chu ka ngai lova,  Ka hmangaih lo bawk.
10 April 2017 | Thingdawl

Part - 4

Hun a kal zel a, kan ina ka awm pawh kar khat lai a lo liam ve ta.  Tlai khat chu ka țhiante'n chaw eiah min sawm avangin ka kal a. Ka pual liau liau a chawhlui an buatsaih han kîl chu a nawm dan a dangdaiin a ropui kawp mai. Chu a chhapah chumi zan chu palai lo luh hun tur a ni a. Ka nu leh pa pawhin ka pasal chu an duh ve deuh tawh avangin min rem ve tawh dawnin ka hria a, ka lawm ve kher mai. Hmangaih lo mahila, ka nei tawh rau rau si a, hetia pangngai lo taka inkawl reng ai chuan pangngai taka inkutsuih ve te pawh a châkawm ve a. Kan inneih țhat hun turte ngaihtuah ka rilru hi a lawm ve veng veng a, țhiana ka hman tur leh kan awm dan turte lo suangtuah lâwkin tu hriatpui si lovin mahni tâwkin ka lo hlim ru ve em em a.

Ka haw a, ka țhiannuin min thlah a,  rei pawh kan kal hma chuan ka nuin min lo call-in ,"Rawn haw vat rawh, Palai an lo thleng mai dawn nia," a ti a. Ka haw mêk thu leh kawng zatve ka thleng țêp tawh thu ka hrilh a. 

Khua a thim ruai ruai tawh a, chutih lai tak chuan ka bialpa hlui Sanga leh a țhianpa chuan Kan hmaah tak motor ti dingin min pawtlut a, ka duh lo chu ka țang ve nasa a, mahse, ka hneh si lo, ka țhiannu chuan min pui ve ngial naa mipa thâ chu hneh alo har a ni ang e, khaw dai lam pan chuan min phur ta a. Ka hlau a, ka țap bawk a, mahse, awmzia a awm si lo. Han au vak dawnin a mualpho zawk ka nih ka hlau si a. Mahse, khatia ka au lo kha ka mualphona ințanna tur chauh a ni tih rêng ka hre si lo.

Sanga hnenah chuan, "Min thlah rawh, min chhuktir rawh, ka hmangaih tawh lo che" ka ti a, mahse, awmzia a awm lo. Kut min thlak a, ka hmaiah min bêng a, a na kher mai. Ka rilru chuan puitu a zawng ruai a, duat taka min enkawltu leh ka nat rêng rêng phal lotu Rema mawlh mai chu ka rilruah a rawn lang a, min rawn pui se ka ti khawp mai. Ka chhungte phone ka tum a, phone min laksak zel si. Ka laksak leh țhin a, mahse, tihchhiatah min vau leh a, Ka hlauthawng khawp mai. Khaw daiah chuan min chukpui a, a țhianpa chu motor a lêt leh ta daih a. Ka va han hlau tak em! Min chelh a, min vuan reng a, ka hmuiah min rawn fáwp a, ka va han chhang lo chiang em. Ka thlakhlelh em em țhin kha tunah chuan ka hlauvin ka ten hluah hluah a ni. Diktak ka hmangaih lutuk a lawm, mahse, pawmlai nei ka ni a, ka nei thei tawh tlat lo. chu chu a hriatthiam ve ngai. Hriatthiam a tum lova, min tibuai reng mai hi a pawi ta ber chu a ni.

Ka pasal hi țhenin sanga hi nei leh pawh ni ila uire ka ni dawn si a, chu chu ka duh lo. Bakah, Rema leh Sanga mizia chu țhat lamah chuan lei leh van ang vel a ni. Rema hi chuan min duhin min hmangaih hneh tawp a, phûtlet nei lo hmangaihna ka lakah hian a pu a ni.

 Ka hlau lutuk chu ka theih tawpa chakin ka tlan a, min rawn um pha a, Min man lehin kut min thlak zel si. Ka hun tawn hi a va han hrehawm tak em! Lehlamah kan inah Palai an lêng tawh si. Ka nuin min rawn call sek a, mahse, lak a phal si lova ka la ngam ta lova. Hlau chung chungin țap chungin ka tlan zel a, khua chu kan lut ve ta a. Ka lawm rualin ka va zak si em!  A chhungte biain, "ka rawn hruai haw dawn."  a ti a. "A nei lo, nei pawh nise, ka thu thu, mi dang a nei tur a ni lo" a ti leh a, a hnu chuan,  "in sawi tur a awm lo." tiin a titawp a.
 khua kan luh chuan ka phone a rawn ri a, ka chhungte niin , min vau nasat vangin ka chhang ngam lo. Ka rilru a hah khawp mai. A hnuah ka pasalin min rawn call leh a, Sanga chuan min chhuhsakin a chhang a, "Duh ka thlantir a, keimah min thlang" tih leh "a duh tawh lo che" tih ka rual a, engmah lah ka sawi ngam si lo, ka pasal chu a thinrim ngang a ni ang an inhau nasain an rei khawp mai. Phone chu ka chhuhsak ve leh a, Ka tlan leh ta a. Ka tlan chu min umin, ka hminga min kovin, "Ka hmangaih che, mi dang i nei lovang, keima'n ka nei dawn che!" a ti a, a au vak vak mai a. A zahthlak ngei mai. Ka zak lutuk chu khûk ral chem chem mai a châkawm.

Kan chanchin chu ka țhiannuin ka chhungte a lo hrilh a, ka nu chu a rilru a naa a țap hial a, ka pa pawh a thinrim ngang mai. Engtin tin emaw ka tlan haw thei hrâm a.
Chutianga min tih lai chuan hlim tak kan awm laia min duat theih zia leh ka hlimna tura engkim a tih țhin dante rilruah a rawn lûr zut zut a. Ka mipa rin berin hetia min timualpho zawnga a che ta mai hi hriatthiam a har ka ni a. Ka hlauhna aiin ka rilru natna a nasa zawk hial awm e. Ka nat leh pawi khawih hlau a ka thianghlimna pawh min zahsaktu khan, tunah chuan mi zawng zawng hmuhah min timualpho mêk a ni si a. Miin engtin nge min ngaih ang? Engtin nge ka sawifiah anga engtin nge ka awm tâk ang? Ka rilru a hahin a na khawp mai.

Țapa thaw hlawp hlawp chung chuan kan in ka lut a.
11 April 2017 | Thingdawl
Part - 5

In ka lut chu a zahthlakin ka hlau ngei mai. Ka pa thinrim chuan min that mai dawn ni hian ka hri a. Min haua min zilh a, ka nu erawh a zak leh rilru na lutuk chu a țap reng mai. Khatiang boruak han neih kha chu a zahthlakin neih nawn leh a châkawm lo ngawt mai. Pasal ka úm ringawt pawh an zah tawh nak alaiin inbiak em pawh inbiak fel hmaa hetianga ka awm chu na an ti a ni. 

Palai lo lêng chu an lo chhang beidawng a, keimah vang liau liauin kan inneihna tur pawh a buai zo tawh ani ber e. Palaite lakah ka nu leh pa ka tizak a, hrehawm an tih tur zia ka ngaihtuah zawng ringawt pawh hian ka pa hian min vaw hlum zawk mai se a nuam zawk hial awm e. Mahse, min vaw hlum ta em bik lova. An tana zahna tur hlir ka thlen mai chu keimah pawh mak ka inti a, ka inten ngawih ngawih a ni.

Ka khum ka pan a, ngawi reng chuan ka mu hmak a, mahse, ka muhil thi hlawl lo. Ka rilru hi a na tak zet a, ka tlaivar a ni deuh ber e. 
Kan chanchin chuan khua a khat hneh ngei mai, kalna apiangah min sawi luai luai a, a zahthlakin khaw êng pawh kan hmu ngam tawh lo. ka nu leh pa chu an zak lutuk a, pawn an chhuak ngam lova, kei pawh ka chhuak ngam hek lo. Keini ang thingtlang khuaah chuan ka chanchin chu a thang chak khawp mai a, mi tin titi bur berah ka țang a, mi nu leh pate'n an fate zilhna'n tak min hmang ta a ni. Inruin pasal a nei a, palaite inrem pawh nghâk zo lovin a bialpa hlui nen heti hian an awm a, tih vel chu min sawi duh dan a ni a. Uire thanin ka thang a ni ber e.
Ka pasal chuan min rawn bia a, mahse, tunhma a ang thei tawh lo. Uire ah min ngaiin min puh tlu a, mahse, ka dem hran lo. Ka zahawmna humhim tura ka beih nasat zia hmu turin khatih hunlai khan ka bulah a awm tlat lo a lawm. A niin thiamloh min chantirin min ten thu a sawi a, kei lahin a haw daih vanga khati ang thil kha thleng a nih thu ka sawi ve bawk a. Sanga țan zawng lek lek zawk a ka țawng chu a hrethiam lo khawp mai a. Mahse, ka țan a ni hran lo. A awm chhung zawng khati ang khan min ti ngam hleinem!
Chuti chuan, chuti ang boruak teh nuaih karah chuan min neih leh chu a duh ta lova, kan ințhen ta nge nge a. Ka dem hran lo, a ngaihah chuan uire ka ni miau a. Ka rilru chu a na lo thei lo, ka harsatna min hriatthiampui a min pui bawm a hneka min puh chhia a, thudik zawn tum lova thu puar pawleng leh a lang chin chauh thlira thutlukna a siam erawh nâ ka ti a. Ka nulâtna hlan a, ka chhungte kalsan a ka thlan meuhin heti anga min kalsan leh si chu nâ ka ti a, ka țap lo thei lo.

Ka nun beidawng lutuk chu mahni intihhlum mai te ka duh rum rum țhin a. Mahni chauh a ka awm chang phei chuan ka inngaihtuah a, ka nunna chhat mai ka duh țhin. Mahse, mahni nunna em chhat duh tur khawp chuan ka dawihzep tawk lo deuh te pawh a ni mahna, ka nun chu țha taka hman tumin ka bei leh fan fan ta zawk a.

Hun leh ni a vei a, kan boruak paw'n ziaawm lam a pan tawh a. Sanga paw'n min lo biain amah vanga ka pasal nen kan ințhen vangin ngaihdam min dil leh țan tawh a. Ngaihdam mai erawh ka tum bik lo. Mahse, chutia hna pui bera neia hmangaih berin ngaihdam min dil tak tlut tlut ah chuan hmeichhe awm nem tan chuan hnial reng a lo har a ni ang e, ka lo ngaidam leh ta a.
A mak a ni, hepa ka hnar thei lo lutuk hi chu a mak thlawt a ni. A rukin kan inkawp leh ta a, kan inah a rawn lêng thei lova, mi hmuhin langsar takin kan inhmu thei hek lo. Thingtlanga awm kan ni a, tui a harsaa, zana tui ka chawi hi lo kal vein a rûkin kan inhmu ta țhin a ni. Pasal ka neihsan hnu paw'n min la duh a, min la hmangaih reng mai hi mak ka ti a, ka ringhlel rum rum zawk! Mahse, ka hnar thei lo. Ka chhungte'n chhuah an phal lova, Sanga nen a inhmuh phei chu phal lo tak an ni. Ka dinhmun chu jail tangbte pawh ka ang lek lek. Mahse, ka sawi tawh angin tui chawi a ngai a, tui chawinaah a rûkin kan inhmu țhin a. Tleirawl ngaihzawng nei țan tirte pawh kan ang deuh hian ka hre țhin. Kan inhmuh a, kan awm dun tawh chuan kan inthlahlelin kan inngai em em a, inkuahin kan infawp ve nasa țhin. Mahse, sex erawh kan hmang ngai lo. Sanga nen hian sex kan la hmang dun miah lo, Pasal ka neihsan a mipa dang nena sex kan hman tawh hnu paw'n a ni nen chuan kan la hmang lo. Châk chu kan châk ve thei lutuk; mahse, kan indang a, kan insum hram hram țhin.
Chutia a rûka hlim taka nun kan hman dun lai chuan ka chhungte'n an lo hria ni maw ka pi dam loh chhuanlamin ka pite khaw lama awmpui turin min tir ta a. Lehlamin min rawn chah nasa bawk si nen hnial theih a ni tawh lo. Ka kal dawn zan chuan tuikhur bulah bawk kan inhmu leh a, kal lo turin min ti a. Mahse, ka kal ngei a ngaih thu leh a țul dante ka hrilh a. Inthlahlel em em a inkuahin kan infawp leh a. Chutia kan infawh lai chuan  Ka rilruah Rema nena kan awm dan te, nupa nun kan lo hman dante a rawn lut zut zut a. A rukin ka ngaj veng veng. Chu zan chuan mak deuh maiin sex min hmanpui a tum a, kei pawhin ka châk ve reng a, a ni pawh ka khawngaih lutuk. Mahse, ka duh lova, ka insum a, kan insum tlingtla thei hram a. Min ngaih tur thu sawiin ka zinnaa min zui a tum a , a țang tlat pek a, ka phal lova, kan inkhap thei ta hram a.

A tuk a lo ni a, ka pite khaw lam pan chuan ka kal a. Ka thlenga min lo hmu chu an lâwm ngei mai. Chumi zan chuan sanga nen chuan  țha takin kan la inbia a. Ni thumna zanah chuan Sanga chuan ințhen a duh thu a rawn sawi a, ka duh loh thuin ka chhâng a. A phal lo chung ka zin vanga thinrim a ni berin ka hria. Ngaihzawng dang neih a duh vang nge tia ka zawh lah chuan a nih loh thuin min chhang bawk si. Ka ngaih țha lo chuan ka call a, mahse, min chhang duh lo. A hnu deuh a ka call leh chuan a țhianpa hian min chhang a, "A phone ka kawlsak a," tiin dawt a sawi a. Chuti teh nuaih a nih vang chuan ka thla a muang lova, ka haw a țulin ka hria a, haw ka tum ta a.
 Ni lina zing chuan chhuanlam siamin kan khaw lam panin ka haw a. In ka thlen chuan ka țhiannu nen kan inhmu a, Sanga'n ngaihzawng a neih thu min hrilh ta mai chu mak ka tiin nâ ka ti ngei mai. Ka thinlung leh rilru hi nat luât vanga puakkeh tur chu nise a kehsawm chiang ngei ang. Zah pawh ka dâwn zo lo, ka țap ta hawm hawm mai a. Ka țhianni chuan min khawngaih em vangin min kuahin min hnêm ve a. Mahse, awmzia a awm lo, min hnêm tura ka duh berin min phatsan si a! A ngaihzawng hming ka zawt a, a hmelah chuan a sawi hreh tih a hriat mai a, min hrilh duh lova , "nakinah i la hre mai ang," tiin min chhang a. Chutia a ti phei chu ka na zual a, ka ngen nasat em vang chuan min hrilh ta ngei a. Awi karei, Ka laina hnai tak mai, min hrechiang em em tu hi a lo ni a. Mi dang chu nise ka hrethiam, a ni ber kher chu nâ ka ti em a ni. Ka chanchin leh kan awm dan engkim min hre vek tu a ni a, hetia min phatsantu ani tel ta mai chu mak ka ti a, na ka ti a ni. Ka thinrim lo thei lo. Ka thinrim lutuk chuan Sanga chu ka call a, "inhmu ang." ka ti a, inhmuhna chhan tur a neih loh thu leh sawi tur a neih loh thu sawiin ka call a dah hmak a. Ka call leh pawhin min chhang lova, text message pawh a chhang duh lo. "Ka tibuai tho ang che u," ka ti a. Ni e, tihbuai ka duh, amah vangin ka pasal nen kan ințhen a, amah ngei hian ka hlimna min chhuhsak si a. Tihbuai ngei tum chuan ka inngaihtuah a, țan ka la sauh sauh a.

12 April 2017 | Thingdawl
Part - 6

Mahse, ka ngaihtuah chiang a, a niin tisual mahse, a hmeichhia lam ngaihtuahin, amah ka inchan a ka thei ta ngang lova, ka tibuai ta lo. Ka enthla reng a, min runluih nana ngaizawng mai mai niin ka hria a, engah mah ka ngai tehchiam lo. Mahse, a lo ni lo; kar 3 vel a liam hnu chuan an inru a, an innei ta mai a ka rilru a na kher mai. 

Ka chauin ka zawi vek a, engmah ka ti peih lova , chaw pawh ka ei thei lo. Chutia ka awm avang chuan thla  1 chhung zet ka dam loh phah ta a. Hlim taka an awm ka hmuh te hian va ben chawrh maite hi ka duh a, an kawng kal hlim hmel ka hmuh changte hian keimah ni zawk ila tiin ka lo ngaihtuah a. Kan nunhlui lo hman tawhte rilruah a rawn lût a, lung a lêng veng veng țhin. 

 

Ka chhungte chuan min hrethiamin ka rilru damna'n tiin hmun dangah min awmtir a. kum khat vel ka awm a; Mahse, ka rilru chuan zia lam aiin zual lam a pan zawk. A chhan chu Sanga'n min rawn umzuiin min zar buai reng a. Nupui nei reng siin min rawn be reng țhin. A nupui chu min runluih nana nei mai mai a nih thu leh a hmangaih loh thu a sawi a. Awih tur nge awih loh tur pawh ka hrethiam tawh lo. A takah duh tawh lo angin lang mahila chhingril chuan a la duh si a. Min phatsan mahse, ka phatsan ve tho vang te pawh a ni mahna rilru hian a ngaithiam leh mai țhin. Min rawn biak reng tãkah chuan hnar reng a lo har a ni ang e, a rûk chuan kan inbe leh ta a. Keimah pawh hi ka inhrethiam tawh lo. Chapona pawh ka nei lo em ni te ka ti țhin. Hepa lakah hi chuan ka tuiral a, min ngen hma ațangin a lakah ka lo luangliam zel mai a ni. A chang phei chuan a hna avanga a rawn zin changin min rawn hmu leh țhin. Tichuan nupui nei reng chung chuan a rawn zin chângin kan inhmu țhin a. Mahse, ka ring tlat lova Sex erawh hmanpui turin min sawm țhin naa kan hmang dun ngai lo. Ka hmangaih a,  ka thlahlel a, a bula hun reilote hman pawh ka thlahlel ngawih ngawih a, a nupui hriat loha rei lote lo kuah veng veng pawh kha nuam ka tiin ka thlahlel a ni.

Kan inhmuh hi chuan kan inthlahlelin mi tana hmuh hrehawm tur khawpin kan inngai a, ka engkim hi a tan ka hlan ani ringawt zel.  Min mutpui tumin min bei ve nasa țhin, châk pawh ka châk mahse, ka thei ngang lo, pawmlai nei tan chuan ka inphal bik lo. A nupui nen chuan an inhauin kan ințhen zing hle a, an ințhen apiangin keimah min bêl ,a a nupui chuan min haw ngang mai,  Kei pawhin ka haw lo bik lo.
Hun a kal zel a, a nupui chu kut a thlak nasa thei hle tih ka hri a. Ka hriat chuan kutthlak tawh lo turin ka hrilh a, a nupui kut a thlak leh chuan ka hmuh tawh loh tur thu ka sawi a. Chumi hnu chuan a thlak ngai mang ta lo. Ni e, haw hle mahila hmeichhia ve tho ka ni a, hrehawm taka nun a hman ka phal bik lo a ni. Tin, Sanga pawh thlahlel hle mahila, zan lamah a nupui chan tur erawh ka dawng duh lo.

A hnu deuhah chuan nau an pai tih ka hri a, ka lawmpui rualin ka va thîk si em. Ka hmangaih ber fâ lo piang mai tur paitu hmeichhia kha ka thika ka rilru a na takzet a ni. Chuta țang chuan Sanga pawh chu ka be duh ta lova, min rawn biak a tum paw'n ka chhang duh tawh lova, a hnuah phei chuan ka no. te ka thlak phah hial a.

 Chutia, rilru nâ reng renga hun hmang ta chu nun hlimna zawngin ka tlân a, kawng dik lo zâwk chu zawhin ka hlimna tur emaw tia ka lo thlan chu ka chhiatna tur a ni reng si. Zu inin ruihhlo lamah ka tlan a, ka nun chu a bawraw chho ta em em mai a. Zu ka in nasa bawk a, ka nun a chhe chak a, ka taksa pawh a rawp chak khawp mai. Ka rilru nat vangin chaw ka ei thei lova, Zu ka in reng mai a. Ka harhfim apiangin ka rilru a nâ a, ka hriatchhuah leh țhin avangin ka hriatchhuah lohna'n ka birh ta tlut tlut mai a ni. Rei ka daih loh chiang ngei mai, ka pumpui lam a lo țha lo bawk nen thisenin ka luak ta barh barh mai. Damdawiinah thla khat veng vawng awmin ka inenkawl leh rih a, awi, ka nun hman hi a va han hahthlak tak em. Ka dam hnu chuan ka chhungte chuan an beiseina a thâmral tih an hriaa, kan khaw lamah bawk chuan min hruai haw leh ta a.

Kan khuaa ka haw chu pathlawi pakhat hian min lo ngaizawng ve em em mai a. A tir chuan ka chhang mai bik lo, kar 3 vel min bêm hnu chuan Sanga runluih nan  ka chhang ve ta a. A ni chuan min neih ngei tumin min ngaizawng  a, a chhungte pawhin min duh a, a nuam ngei mai. Mahse, kei erawh chuan ka rilru na thawi damnan mai a nihpui ka ni deuh ber mai.

A ni nen chuan thla 6 lai kan inkawp ve hman a, a zeiin min ngaihsakin min duat thiam bawk a, nuam ka ti țhin ngei mai. Ka nunhlui te pawh theihnghilhin ka hre chang tawh lo. Kan inngaihzawm chhung chuan kan inkawp nasa em em a, ka pite khuaa ka va awm lai pawn min zui ve a, min awm chilh tawp mai a ni. Ka chhungte chuan an duh lo hle a, kan innei thei dawn lo tih kan hre ve ve a, mahse, kan inkawp ve reng tho va.

A tir chuan thianghlim takin kan inngaizawng ve ve a, mahse, kha zan ațang kha chuan kan thianghlim thei tawh lo. Thla a êng ruih a, thla êng lawmin a fâlin kan inhmu a. Zan dang ang bawkin kan âm dun leh hle. Kan infawp a, kan inkeih a, kan duhthawh dûn ngei mai, intem vir ve ve tawh kan lo ni a, a ni a lo zei bawk nen khawvela mipa ka mutpui pahnihna atan chu mi zan chuan a lakah chuan ka inpumpek ta a. A rûkin Rema ka hrechhuak chiang khawp mai, a chhanchu ani kha mipa ka mutpui hmasa ber leh awm chhun a la nia, tuna mi hi a pahnihna a ni.

Chumi zan ațang chuan nupa ang chiahin kan awm a, ka chhungten min duhpui lo viau mahse, a zeiin a fel a, a zûnah ka uai a ni deuh tawp mai. Nun hlimawm tak tak hmangin zan nuam tak takte hmangin nupain an tem tur chin chu kan tem ve vek tawh. Nupa ang chiah a awmin Sex pawh kan hmang dûn nasa a. Kan chhungten min duhpui lo mahse, nau kan pai chuan an phal mai ringin nau pai ngei tumin țan kan la a ni deuh ber mai!!! Mahse, kha thla 6 chhung khan nula virgin ang maiin ka chhûl a ruak si! 

A tawpah chuan a insum thei ta ngang lo a ni ang e, a huaisenna sawm khawmin ka nu leh pain min neih a dil ta ringawt a. Palaite a rawn tir a, mahse, ka nu leh pain erawh an rilru a khauh tlat thung si. Kan inneih chu an phal bau lo mai a, a makin a hrehawm țhin ngei mai. Kan awm dan zawng hria se min phal em em tur hi a ni a. Mahse, sawi chi lah a ni si lo. Inrûk a rawt a, kohhran sai dai țhiat tawh hnu khan kohhran vawikhat ka tihsual tawh vangin  ka chhungte rem tihna lo chuan ka duh tawh bau lo pek a. Kohhran huang chhungah tling tawh lo mahila, chhungte remtihna ngei lo chuan inneih ka duh tawh lo. Keimah vanga an nat leh ka phal tawh lo. Mahse, kha kha ka chhungte rilru natna ka thlenna tur a ni tih rêng ka hre si lo.
Zan khat chu a ni min neih loh hlau chu rui phêt pháwtin kan kawngka a rawn hawng țhuai a,  kan inah a rawn lêng a. Kan chhungkuain T.V kan lo en țhap a. Ka pa țhutthlenga mu chu kâwkin , "Tho rawh, țhu chungin kan indâwr ang!" a rawn ti mai chu ka lo zak lutuk hi ka thi thei mai dawnin ka hria. Mahse, kha kha a tâwpna a lo ni lo. Chuti chuan ka nu leh pa hnenah chuan ka chanchin, kan awm dan engkim mai chu kim dap maiin a hrikh ta mai a. Nupa nun kan hman dante nen lam zêp miah lovin a rawn sawi ta mai a. Ka zak lutuk chu khûk ral chem chem mai ka châk.

Ka nu leh pa chu an thinrimin an rilru a na ngei mai. Min hau a, min zilh a, thiamthu sawi tur ka nei lo, ka ngawi reng a, ka lo rinlawk em em min vuak ka rin tehreng nen vuak erawh min vaw em lo.

Ka zak rilru na bawk si chu khum lamah ka luhsan daih a, ka tâwt up up a, thih daih mai ka duh. Ka țap char char a, mahni intihhlum tumin kan ina damdawi awm zawng zawng chu ka chawhpawlh a, ka in ta a. Mahse, hei, a mak lutuk, ka la nung chu a nih hi!
A hnu chuan ngaihdam min dilin ka leh pa pawh ngaihdam a dil a, mahse, ka ngaidam thei lo. Ka ngaidam ngai hek lovang! Khang nunhluite kha ka ngaihtuah lêt hian tun thleng hian ka la na țhin.

Tleirâwl duhawm tak niin chhungte beiseina ka ni țhin a. An beisei ang pha zo lovin khawvel lamah tlanin a par zû ka dâwn a, mahse, chu par zû ka dâwn chuan hlimna tawite, țahna leh beidawnna kum hlun min pe zawk si țhin. Nu leh pa thu zawm lova thil tih hi a pawi a, an thu a nun hian engkim a lo fel mai țhin. A chhan chu, hmangaihtu chuan a hmangaih chu a nat a phal ngai lo. 

Ka nuna min hmangaihtu nia ka lo hriatte chu ka nun tichhetu mai an lo ni a, ka beiseina leh hlimna min thlentu emaw ka tihte hi nun beidawnna min thlentu mai niin, ka beisei țhin khawvel hlimna ten min tibeidawng a, khawvelah hlimna zawng mahila, beidawnna chauh lo chu ka hmu lova, a tawpah, hlimna leh lawmna a kim, krista hnenah chuan.

Tunah chuan Pathian khawngaihna changin nun kawng dik ka zawh ve tawh a. Hmangaihtu dik tak tawngin hlim takin ka awm tawh a, ka nuna ka theihnghih tawh loh tur, Țahna Nunhlui chu kalsanin Nun thar hlimawm ka hmang ta zawk a ni.

A TAWP TA!
13 APRIL 2017 | THINGDAWL


Thursday, 26 October 2017

KAN COLLEGE LADY

Ziaktu: H.Zate, Hmar Rûn.
http://hzate.in/


( A hmanna tur zawka hman tak loh he thuziak tlawm tak hian ka website hi han luah ve rûn mai teh se! He thuziak hi MZP Chanchinbu, October 2017 a chhuak tawh a ni.)

Ka ban khama thaw ri sêk sêk a muhil ka nupui chu ka en a, a hmel ka enin a duhawm ngawih ngawih hian ka hria a; chu ai mah chuan,  a hmel phena a rilru țhatna zawk hi a ni duhawm lehzual chu. Ka tan ka nupui ni turin a inhlan a, a nun pum ka tan a hlan  a, min hmangaih a ni tih hi chu sawia fiah mai chi a ni lo.
Kum fê a lo liam ve ta. Aizawl veng khata fapa duat sual ka ni a. Govt Johnson College-ah B.A ka zir ve a, a tir chuan subject dang ka la a, mahse, ka suahsual leh zir peih loh êm vângin Mizo min laktir leh ta a. Thil mak tak chu a ni ve ta awm e.
B.A 2nd year kan zir  kum tâwp lam a ni a. Johnson College in College Week kan hmang a, a tawp ni tlai lam a ni. Ka tih dan ngai bawkin rui satliah mai lova rui chhe em em mai lah hi ka ni pek a. Hun kan hmanna pawnah chuan kan ri suau suau a, kan hmaah hian nula pakhat, Kan College Lady hlui leh SU-a department pakhat a secretary ni lai hi a kutah lehkha țhenkhat kengin a tifel mek a. Chutihlai mek chuan kan bula ding tlangval pakhat chuan a biangah a lo piai vak mai a. A tlan leh daih a. Kan nula-i thinrim chuan ben a tumna lamah ka hmaiah tak mai chuan chiang mangkhengin a rawn bêng a. kei thinrim chuan ka nam a ben ve nghal mai ka tum a. mahse, a hmel ṭha tak leh a hlauh hmel ka hmuh chuan rui viau mahila ka beng phal lo, ben a hnekin hlau taka a chhin lai chuan a chalah fawp zauhin, “I ṭha reuh lutuk.”tiin ka kalsan  ta  zawk a.  Chuti ang vel chu a ni kan inhriat ve dan chu.
Kan inhmu ngunin, kan inkawm ngun telh telh a. kan inngaina telh telh a, a felin a kianga hun hman a nuamin a hlimawm. SU lamah nihna a nei ve a, kei lah  zirlai satliah mai ka ni.  A chang chuan kan inmil lo lek lek ṭhin.  Mahse, he hmeichhia hi chu hmeichhe danglam a ni. A nihna vanga mi dang hmusit ching mi a ni lova, a nihnaa thuneihna ni lovin  a nuna tlawmna zawkin mi a hneh fo ṭhin. A thil tih sualah mi dang hneh nan a nihna a chhuang ngai lova,  tunlaia hruaitu ṭhenkhat anga a thil tihsualah , ‘SU hruaitu ka nih hi aw!” tia au pung punga mi dang hneh tum tlat chi ni lovin, a dik lohna pawm a, a diknaah pawh a kaihhruaite damna tur a nih chuan dik lo zawk anga lang ngam mihring a ni. 
Ni khat chu kan dan ngai ang lo takin college kal turin kan  kal dun a.  kan inmelh relh relh reng a, sawi tur nei, sawi ngam chiah si lo hian kan awm ve ve a. kei pawh, a dik tak chuan ka rilru hi a luah a ni. Mahse, ka ngaihtuah chiang a, ka tan chuan a ṭha mah mah a ni. A hrehawmna ṭawmpui ka inhuam a, ka hlimna min ṭawmpui tur pawhin ka duh a; Mahse, ka nun beidawnthlak tak min ṭawmpui tur chuan ka phal thei mawlh lo a ni. Thil eng eng emaw sawiin kan college chu kan thleng a. A ni an class lamah kalin class an la a, kei pawh chuti ang bawkin. Class lak chhung chuan ka ngaihtuah veng veng a. Mitthlaah amah lo chu a leng tawh lo.
Off Period ah kan inhmu a, ṭhiante an tel ve bawk a. ṭhianhova picnic kan rawt a, kan phur tlang ngei mai. 
A ni a lo thleng a, picnic tur chuan kan kal ta ngei a. kei pawh ka pain Bike min leisak hman avangin ka bike ngei mai chuan ka phur a, kan kalho ta a. kawngah pawh chuan a nuam veng veng ringawt mai a ni. Ṭhalai lungkham nei lo rual han picnic chu kan thawm a ṭhain kan hlim khawp mai a. Serh leh sang a awm tawh si lova an rui tlang ngei mai. Mahse, ka mihringi erawh chuan far khat te mah a lem ve duh loh avangin kei pawh nuam lo a tih hlauvin ka in duh ta bik lova. In chu ka in chak ngei mai. ṭhiante rui an lam suau suau lai chuan keini pahnih chu ngawi reng chuan an hmuh phak loh lamah chuan kan lo inmelh ralh ralh a. thu sawi tuma ang zuau hian kan in melh ve ve a. kan lai dun kher mai . “I kal ve duh chu ka lawm kher mai”tia ṭanin, thu hote te kan sawi a, thli a thaw heuh heuh a, a vawt ve var mai.
Ka ding lamah a ṭhu-a,  a kut no nalh tak mai chu ka khal mial mial a. kan inhriat chian ṭan dan mak lutuk te kan sawi dun a. kan nui leh hak ṭhin.  A inrin loh lai tak chuan a hmuiah ka fawp zauh a, “Hei”a rawn ti a. “Ka duh che” tih pahin ka kuah a. engtin mah mi chhang hran lo. Ka zak ang reng khawp mai a. “tih palh” ka ti leh hnuhnaw a, lai ve tak chu ka ni. A nui sak a, “Kei pawhin ka duh che”a rawn ti chhuak mai chu lawm avangin ka zuang tho lo chauh  a ni ber e. Tun hnua ka ngaihtuah hian kha picnic kha an rawt lovang tih ka hlau leh hnuhnaw.
Chumi ni aṭang chuan a ni nen hun hlimawm leh nuam tak tak kan hmang dun fo ṭhin a. Mahse, kei nena kan inhmuh dawn vangin SU lama a tih tur a hlen loh phah ngai lo. Chumai a ni lo, a kova mawhphurhna awm a tihhlawhtlin lohna turin chhuanlam a insiam ngai lo. Hriatthiamna nen min enkawl a, chuti ang chuan a thawhpuite pawh a thawhpui fo ṭhin.  Ngai em em mahila a pawimawh em avangin inhmuh reng chu a theih bik lo. Mahse, a theihna apiangah chuan kan kal dun fo ṭhin.
Exam turin kan inbuatsaih a, ka lehkha zirna engkimah a ni chu ka tan a pawimawh a, ka engkima engkim a ni. Min hmangaihna hi ka tan a hlu a,  kan exam ah pawh a ni vangin ka tih ṭhat phah reng a ni. Hum ka ngaihnaah mi hum a, min fuiha min pui a, mahse, ka sual ka sim theih loh vang erawh chuan keimah vangin a lungngai a, Hruaitu chuan chhiahhlawh angin a rawngbawlsak tan rawng a bawl fo ṭhin.
Ni khat chu kan inah, ka pindah kan pahnihin kan awm dun a. ei turte eiin kan ti ti a, thil eng eng emaw tiin, khumah kan mu a, taksa insi reng chu rilruah thil dang a lo lût a, a biangah fawpin a hmuiah ka fawp a. A awm bawr khawih ka tum a, mahse, a duh lo, a ṭang tlat. Ka tilui ṭang ṭang a, mahse, a duh lo. Ka beih ngial pawhin a duh lo, a ṭang tlat a. hnuai lam ban ka tum chiah chu a tho zawk a, a duh loh thu sawiin “Ka thei lo, Ka thei lo a ni!”hetianga awm tur kan ni lo. Ka hlawhchham, mahse, ka zah si! 

Nun dan tam tak min zirtirin, ka nunah tlawmna nun leh zahngaihna te a tuh a. ka tan ka bialnu, kan college lady, ka leader leh ka nun a ni. Chutia zilhna leh fuihna dawng fo ta chuan Amah vangin sual simin ka bansan a, ruihhlo bawih ata ka talchhuak a. Ka nu leh pa bakah Ka Lady pawh a lawm ngei mai.
Inhaw lo leh inhmangaih na na na chu a hranga awm reng kan duh ta bik lova, a tawpah chuan innei zai kan rel ve ta a. Kan innei a, kan inneih nia a hmel ṭhat zia kha aw! ‘You Look So Beautifull in White’ ka ti lo thei lo. Fanu duhawm tak neiin kan hlim hle a. A ni nen chuan nun hian  awmzia a nei a, a hlu thin a ni. Ka  lei par mawi chu ka tan a vul ta a. ka tan nupui niin, ka chhungte tan fanu ṭha niin, ka fanu tan nu ṭha a ni ngei e !
Hetiang hi a ni Kan College Lady, ka dam chhung atan “Ka Lady”a nih tak dan chu!

19 March 2017 | Thingdawl




Tuesday, 24 October 2017

ȚHANGHAR A HUN

(Hi thuziek hi Hmasawnna Thar, 20 October 2017 a suok ta hnung a nih  )
Ziektu: H.Zate, Hmar Rûn, http://hzate.in/

Favang awllen lai a ni a, zanah van inthieng kel kawl elah Thlapa var em ema a hung var hi chu a mawi chungchuong em a, a mawina hin tleirawl mawina a phâk thuokin ka hriet hlak! Hi thla, Changer (October) thlaa thla var zet hin chu lunghlui in ta hnung a keithova, Pasalțha khawm nunhlui ngaiin an inkiu a, a nih, Nu le pa rem naw leiin innei naw hai lem chun, kawppuihai kuoma um siin mitthli leh an nunhlui an sui rawp hlak hrim a nih! 'Hmangai, i hlim chun lawm pei ka tih!' tia lo intiem tahai khawm hi thla var zanah zet hin chu an insum thei naw a, an lawm zing thei bik naw a, țapin nunhlui an  suikir nawk rawp hlak! 
Hi zan thlavar hnuoiah ngei hin annawm, Inzaum, Pu Timothy Z Zote, Editor, Manmasi Digest hla phuok, 'Sim le Hmar, Sak le thlang thlirin, aw ze danghai chun an ram ngeiah hlimte'n Sawrthla eng zaia awiin hringnun an phâm, Manmasi Hmar nau lenghai chun sieng inlawina ram an invai, Țapna ding chauin maw Hmar nau ka lo chang!' tia a lo phuok hi lungrilah a hung inlang rawp hlak!
A ni annawm, hi hun hlimumah ngei hin ngirhmun a ngir naw a rinumzie a hung inlang a. Ngirhmun țhaa ngirhai ta dinga a lo inhawi zie khawm a hung inlang bawk hlak.  A nih, hi hunah hin Khuongchawiin hlim takin nun an lo phâm hlak. Lusei țawng lem chun hi thla hi Khuangchawi thla tia ko a ni hiel rêng/hrim a nih. Sienkhawm, Thla var mawi em em a hung liem a, a mawina a bo hnungah chun, lunglenna le Khuongchawi leia chawltuia lo inrui hai ta dingin țhanghar a hun zie hril dingin daidaw a hung tla țan a, Varît  Pîtin muol an hrut țan ta a. Hi huna țhanghar ve hman nawhai chu an bupui a lo inriel zova, zu le va an hrat leiin fâk khawp an thar suok ngai nawh!
Tv. Lalramsan Hekte, Ei hlasakthiem Vincent Hmar Hekte a sangpa chun 'Țhanghar a hun' ti thupuia hmangin hla a phuok a, ama ngeiin a sak bawk a. Ka ngaithlak a, ka ngaithla nawk hlak a, ngaithlak a hlaw a, ngaithlak nawn tlakin a mawiin a thu a țha.
A phuoktu Tv. Lalramsan Hekte chun, "... Ei hnam kaupeng tamtak an Hmar nina el khawm hre talo an uma,thanghara inthuruol ei pawimaw zie hai ka hmuin ka lungril a tawk em em a..." tiin a phuok san a hril a. Hi chau hi ni lovin ei hnam sungah in lusu mekhai hi a hmu thiem niin ka hriet!
​Tiena pi pu china khuonu mi'n duonpek hnam, 
A sakhming Hmar reng hi a mawi chuong ngei.
A sukvultu ding nang le kei thanghar a hun,
Theitawp suoin inthuruol zai rel ei tiu!

Pi le pu a inthawk a Pathienin ami lo indinpek ei hnam hi, a hming hrim hrim khawm hi a mawi a, a hming ringawt khawm hi a mawi a, A sukmawi a, a sukțhatu ding nang le kei ei in lusu mek hi țhanghar a hun ta takzet a. Țhanghar ringawt khawm ni lova theitawp insuo a, ei inthuruol hi a hun ta takzet a nih. A ni hrim a nih, ei hnam inrieng hi ei en a, hmasawnna um met met sienkhawm a nawlpuia en chun ei la'n hnuoi a. A khaw tieng tieng khawm hnam dang hnuoiah ei la bet a, hnam dang karah ei la um ro ro el chu a ni hih!
Hmarnau thanghar a hun,
Nang-kei inti a hun ta nawh.
Suilungruola insuikhawmin ei ram le hnam chawisang ei tih.

tiin a thunawnah a hung hril nawk a. Ei hnam chawisang ding hin țhanghar a hun ta takzet a, nang le kei tia insekhek a, Mizoram a Hmarhai, cachar a Hmar, NC Hills Hmar, Manipur Hmar tia inkal a hun ta nawh. Ei ram le hnam chawisang ding hin chu Pawi kawm thin ang țhapa inruol le Arpui mei ang țhapa ei um a hun takzet a nih. 
Țhenkhatin, 'a mawi' an ti laiin, 'a mawi rak nawh.' lo ti a hun ta nawh a. Chu nek chun, mawi ei ro ral naw khawm ei țhat lemna ding a ni chun hrilmawi thiem a pawimaw ta takzet. 
Pahnam ah ei buoi sung chu inthuruol naw mei ni, 
Mani phing chau dawn sung hnam intodel naw mei nih.
Zu le sumin hnam damna intlun naw nih.
Pawla ei buoi sung zalenna hmunaw mei nih.

tiin a chang hninaah a hril nawk a. A hla thuah hin a chieng a, a hril tum chu hriet thei vawng a nih.  Hmarhai hi pahnama buoi pawl tak ei niin ka hriet! Ngainat lo ding ka tina ni chuong lovin kohran chenah pahnam lungril khermei tak el putlut a ni hlak hi a pawi takzet. Pahnam buoia buoi rawpna hmunah chun inthuruolna hi thil thei naw a ni a.  Hnam damna ding a um nawh. Ei țhuoitu le hnam țhuoituhaiin hnam neka an phing tieng an ngaituo a sum ngainatna bawiah an lut sung ei hnam hin 'intodelna' hi ta nei thei naw a ta, hnam danghai ta dingah ngai a ta, 'Hmasawnna' lem hi chu ei kawl le kienga mihai ta ding lieu lieuah aie rawp hlak a tih. Țhalai nun inchûklai hai hman inchúktir a, țha taka keițhuoi ding țhuoitu lem 'Ruihlo bawiah' a lut a, ruihloin a sal bet sung chu țhalai haiin inchúk ding nei naw nihai a. Hnam dang ngaizawng phal naw thu insuo si a, a țhuoitu lemin a kawppui a tawngkhawp si naw chun mi dang a hril thei chuong nawh. Ngaizawnghai le um kawp lo dingin thu an insuo a, thu insuotu lem a ngaizawng leh an um si chun a thu insuo kha tu in am zâwm chuong lêm an ta? Ama hmanin a zâwm thei naw chu mi dang chun an zâwm kher hmel nawh. Nunghak tlangval inrui khap si a, Val-Upahai an rim a'nhmui el chun an inkhap țha naw el thei a nih.

Mani theina chau ringin kalpen naw mei niu, 
Hnam mi petu ei Pathien chu ring lemin,
Ei theitawpin hnam sin thaw veng ei ta,
Ei thei baka ei Pathien a um annawm.

Hi thu khawm hi ava hei indik de aw! Mani theia inngaia mani hratna ringa, ama rawn lova ei fe pha pha Hnam a mi thlangtu hin a mi'n kiengsan hlak a,ei buoi nawk rawp hlak! Ama ringa, ama ringsanin theitawp insuo ei ta, ei thei bâka um ei Pathien hre zinga ei um a țul takzet! Hi ei Pathien hin, a ditdan a ei um a, ei thaw hnungin a mi țhangpui naw ka ring naw a, sâwn nau ang ela enkawl ding chun Hnam a mi'n dintu hin mi'n din naw nih! 
Ama rawn pum a,  "Aw Kan Pathien, Imi pek kan hnam hi, I mi Isarel hai angin mi tung ding rawh." tia țawngțai pum a, a dit dana ei hnam hi a fe a ni chun, Pu Timothy Z Zote -in 'Țapna ding chauin maw Hmar nau ka lo (in)chang." tia a țaphla a lo inzâwt hi, "Hmar nau ka lo (in)chang hi ka lawm kimna!" la ti ve ngei a tih!
17 October 2017 | Guwahati

Monday, 16 October 2017

NGHILH LOH NUNHLUI



Pic/Model : Biaktluangi Hmar

Ziaktu- H.Zate, Hmar Run.

‘Nunhlui ngaih chu khuareiin a hnem,’ an lo tih thin hi chu, ‘Khuarei chu engtikah nge?!’ tia zawh mai awl khawpin ngaih a bang dawn lo a nih hi.


Kum 10 lai a lo liam ve ta reng mai. khang hun lai, ka tleirawl chhuah hun lai te kha ngaih ni a bang lova, a bang dawn hek lo. Ka hma lam hunah engnge ka tawn ang a engnge lo thleg dawn pawh hre lovin ka hun leh nunte ka hmang chho ve a.

Nun hian hlutna a nei a, a nun hlutna tihzual tumin nu leh pate thlazar hnuaiah High school chu ka rap chho a, tleirawl nun; ka la hman ngai loh chu ka pal ve tan ta a ni. Tleirawl chhuah, pangti chum bat leh no thei zawng zawng no hunlai chuan tu pawhin heltu leh chhaitu an nei vek ang a, kei ngei pawh ka tawng ve a; Mahse, ka ngaihsak hran lo. Min duh der vetu chu awm bawk mahse, ka ngaihsak miau loh avangin ka nun hi a ngaiin ka hmang leh mai zel.
Chuti anga mahni mum muma nun ka hman lai chuan; zan khat chu ka u; nulate rim turin kan veng tlangval rual chu an dan pangngai zawmin an rawn leng a. Kei erawh lehkha zirin ka pindanah awmin, lehkha zir peih loh bawk nen, an thusawi ngaithlain mahni tawkah ka lo hlimpui ve em em thin. Kha zan khan khan thil thleng tur hi lo hre lawk chu ni ila ka chhuak kher lovin ka pindanah thingpui min pe turin ka u-te ka ngen ngei ang; Mahse, hun lo thleng tur hrelawk hek lo le. Ka lehkha zir ning chu thingpui in turin ka u-te awmna lamah chuan ka va chhuak a. Thingpui in in an zingah chuan thut hmun ka rem ve a. Chutihlai chuan tlangval lo lengte chuan min fiam laih laih hlawm a, an zinga pakhat chuan ka mit a la tlat pek a, nuam ka ti ve veng veng a, awm renga a hmel en reng mai kha ka duh. Mahse, ka Nu leh pa leh ka u-te ka zah vangiin peih lo taka ka lehkha zir chhunzawm turin pindan lamah la luhsan ta a.

Hun a liam a, ni liamin kar a vei la, karin thla a hring bawk a. Bat nei ang fahrana zan tin maia lo leng ta chu, inhmuh zin na na na chuan kan lo inbe tam a, inbiak tam chuan karah innelna a lo pianga, chu innelna chuan ka thinlungah hian ‘Hmangaihna’ an tih ang hi a rawn hring chhuak ve ta a.

Board exam hmachhawn mai tur ka nih vangin ka ngaihsak tha lova; mahse, a rukin ka vei veng veng ringawt mai a ni. Exam kan han zova, rilru a thawveng pawh bawk a , an rawn len chang pawhin nuam ka tiin ka hlim veng veng thin. Mahse, Ka rilru luahtu val chu mi dang ta a lo ni si. Zan tin inhmu e ti lo chuan Pathianni tlaiah chuan ka ute nen a huhovin kan leng chhuak fo thin a. Ani pawh ka ute nena inkawm an nih vangin kan inkawm nel ve a, zan tin leh pathianni apianga inhmu ta chu karah innelna mai bakah inngainatna a lo piang chhova. Min ngaihsak ta riau hian ka hre thin. Kei erawh zawng a hma atanga duh tawh ka ni bawka ka duhna chu a ni telin a zual a; Mahse, chhungte la zah bawk nen, a ni ngaihzawng nei angin an lo sawi bawk nen thian ang bakin ka kawm ngam lova, kham lo takin ka thlah liam a, khum lamah mahni tawkin ka lam hawi a, ‘Ka Hmangaih Che’ min tih hun tur ka suangtuah fo thin.
Kum 2007 July 13 a ni a, an dan pangngai ang bawkin, Sunday tlaia an chhungte ina len tum chu zui turin min ti tlat a, ka ute pawh an sawm ve avangin kan vai chuan kan leng ho ta a. Ka u-te an pen lawk hlan chuan kha ni kha ka tana ni hlimawm ber ni turin ka duh ruk em em chuan, ka lo suangtuah thin ang ngeiin, ka lam hawiin’ Ka Hmangaih Che’ tiin min hmangaih leh min duh thu min hrilh a. Ka va hlim si e; mahse, ngaihzawng nei nia ka hriat avangin ka awih thei lo. Rilrua lawm tak chungin , “ Ka awih lo, i ho em mai a.” ka ti hramm a. a sawi nawn leh tak avang chuan, “Ngaihzawng i nei a ni lo’m ni?” tiin ka zawt phawng a, a ni chuan an inthenna a rei tawh thuin min chhang a. Ring chiah lo mahila, ka lo duh em avangin ka ring lo phal lo. Dawt pawh sawi se ka awih awm si a. Chumi ni atang chuan kan ‘inngaizawng’ ve ta a. ka thilung zawng zawng hlanin atan ka vul ve tan ta a. Khawi lo kan kal hlekin kan inzui reng a, kan hlim em em thin. Min ngaihsakin min duat thiam em em a,Ka duhthusam mipa ngei ka tawng niin ka hria ka lawmin ka hlim hle thin.


Kan ingngzaihzawnna chuan ka chhungte beng a thleng ta a, ka chhungte’n kan inngaizawng tih an hriat chuan min khuahkhirh thar a, a hrehawm thei khawp mai. Zan tin a rawn len erawh a sim chuang der lo. Kan inzui ri tulh tulh a chhungte paw’n min dang thei tak tak lo. Urlawk zan, Kumhlui thlah zan te hian an rawn riak fo thin a. Kan kalna apiangah kan inzui a, ka bazarna leh kohhran hran daih ni mahila, kan inkhawmpuiah thlengin min zui rawt thin. Min nel deuhtute chuan, ‘innei tawh mai rawh u’ tiin min fiam fo thin

Ka zrina ka chhunzawm a ngai a, zirna avangin hmun dangah awmin Hostel-ah awmin a chang chuan haw ve thin bawk mahila, inhmuh hun a rei lo si a, lunglen a na thin khawp mai. Kum hnih ka awm hnu chuan krismas ah chawlh kan nei hlauh mai a. Kan khuaah ka haw ve ngei a, hmangaih ber hmu dawn bawk mahni in ngeia han awm leh chu rei lo mahse a nuam ngei mai. Kum thar maia exam tur kan nih vangin zir tur ka hawn a, duh ang chuan ka zalen thei lo; mahse, nuam ti takin chu krismas chu ka hmang liam ve a.
Mahse, Mahse, nun hi a lo va mak si em. Kumhlui thlah ni a ni a, ka hmangaih, rinawmna ka tiampui leh rinawm reng tura min tiamtu hnen atang chuan ka lo beisei ngai loh leh a lak atanga hriat ka inrin ngai loh leh fiamthu pawha ka ngaihtuah chhin ngam loh thil chu ka dawng ta si, “Nupui a ru” tiin. Hmangaihtu tan chuan a va na si em. Ka nun a ni a, ka khawvel niin ka beiseina zawng zawng amah ah a innghat a sin!
Urawk zan khan inrua a kianga hun hmang tawh turin min sawm a, ka zirna laklawh em vang leh kan hma lam hun atana tha zawk nia ka hriat avangin ka hnar a, kha thil vanga lungawi lo vanga ru ta mai nge kha kum 2 chhung khan ‘Ka hmangaih che’ min ti si hian hmangaih dang a lo nei reng zawk! Ka ta nia ka ngaih lai khan mi dang ta ka lo tawmpui lek em lo ni? Rilru hi a insual a, mawl ka intia , na ka ti a, keimah indemin hrehawm ka ti a. Ka ngaihtuah nasat poh leh ka na zual a, ngaihtuah loh ka tum lahin ka thei si lo. ka natna min chhawk thintu ngei khan natna min thlen si. A va na si em! Ka chhungten min hnemin min fuih mahse, min hnemtu an tling zo si lo. Mahse, hmangaih ber hlimna tur a nih miau avangin tibuai lovin dam takin ka thla liam ta zawk a.
Tunah chuan an karah fa piangin chhungkua an din tawh a, hlim taka an awm hmuhin rilru lawm thin mahse, he thinlung hian a va thik thin si em. Ngaih a bang lo kan nun hlui te kha. Min hriatpuitu chung chhawrthla leh kan tuanna mual dang si lovin, kan tiam rthudi erawh a dang ta si.

Engpawh nise, mihring tung chhova kal na na na chu hmalam hun eng a awm tiin ka inhnem a, mahni inhnem chawp zela nun hmangin ka zirna pawh chu tha takin ka zo ve ta a. Thian leh chhungte min lawmpuiin duhsakna min hlan mawlh mawlh a; mahse, lawm a kim lo. Min lawmpuitu tura ka duhin min lawmpui si lo. Ka tana chakna hnar ni thin kha tunah zawng ka tan a rem tawh si lo. Kan khuaa ka haw changa min hmuaka min tihlim a, min duat em em thintu khan tunah zawng mi dang a duat tawh si. Sawi chhuak si lo hian rilru hian a zawng ruai a, kan ina mi an rawn len changte hian rawn tel ve tur hian ka lo beisei ve tlat thin. Mahse, ka chhungte ka lamah an tang a, ka thla a muang. Min fuihna vangin Computer lam te ka zir zawm a, a zun ngaih a nem chuang lo.
Kum veiin a liam zung zung a, chutia beiseina leh mipa rinna reng nei lova nun ka hman lai chuan min duhtu leh min hmangaihtu te tawng thin mahila ka ring zo tawh lo. Mahse, Min hmangaih em em tu ka tawng ve a, a ni chuan min hrethiam a, min khawngaihin min lainat em em a, kan inzui deuh hnu chuan “tiam tlat e” tihpuiah min sawm a. Ka rilru a insual nasa; ka hmangaih kha ka theihnghilh thei tawh dawn si lo.
Engpawh nise min hmangaih a, min duh em em tu tan chuan ka nun hlan ka remti ta a. Palai tirin a ni nen chuan ‘Tiam tlat e’ kan ti ta a. Kha nia ka hlim zia kha aw; mahse, min lawmpui tura beisei ka la nei fan si! Hun a liam a, ka nunhlui ka theihnghilh miau loh avangin ka pasal chu ka hmangaih thei lo; Mahse, a ni erawh chuan hmangaih takin min kuangkuah reng si. Fapa duhawm tak mai kan nei a, ka fa pian niin kan chhungte leh ka nu leh pate lawm zia kha aw! chung zawng ai chuan ka pasal hlim hmel mawlh mai kha a mawi. Rilru erawhin tuna mi hi hmana mi kha ni zawk se a la ti fan si!
Chutia hlim taka kan awm lai chuan ka pasal chuan hun loh takin min boral san leh ta a. A va mak tehlul em! Khawvelah hian vanduai tur renga piang em ni ka nih le! Ka hlimna ka chan a, ka pasal ka sun leh a, nun hian awmzia a nei lovva, ka tan chuan tahna mai a ni. Ka fapa avang chauh hian ka nung a, a ni hi ka engkim a ni tawh a, ka tan a hlu a a, ka nunpui zel a ni ang chu!
Ka nunah lo lutin , nun awmzia min hriattirin hmangaihnaa thikthu chhiatna nen min hriattir a, ka ta nia ka hriat lai chein mi dang tan i vul a, a tana vul tura min sawma rinawmna min ngentu khan min phatsan leh si! Hun leh ni veiin kum tam liam mahse, ka theinghilh ngai lovang che; Mahse, i tan ka rem tawh si lo. Tunah chuan, hmangaihna mit a min thlir a, parmawi vullai thliaka chuai leh mai tura hnawm kara i paih hnu chhara min tivul lehtu ka pasal, min liamsan tawhtu leh a fapa aia pawimawh ka tan an awm tawh si lo!

01 March 2017 | Thingdawl


Thursday, 5 October 2017

NANG NEN NGEI HIAN


Thlalatu: Simon_rednikon

Ziaktu : H.Zate, Hmar Rûn.
http://hzate.in

   "Tuipui ral ramah, a ni chutah chuan, nang nen, nang nen ngei hian hlim takin kan leng ve thei tawh ngei ang tiraw?!"

Țum khat ka zin khawthawng chuan ka hmelhriat pakhat hi ka hmu a. Ka hmu thut chu ka lawm em vangin Ka be nghal a, chutia kan inhmu chu mak a tiin kan hlim ngei mai. Hmun remchang laiah țhu dunin chanchin te kan inhrilh a. Kan hun kal tawhte sawi chhuakin lunglênna chuan min tuam dun veng veng a ni ber mai.

A ni nena kan intawn hian țha ka ti nghâl em em a. Ka veiin ka duh nghâl em em ringawt mai a ni. College pakhatah kal hovin class mate kan ni a. Inhaw lo na na na chu kan inkawm a, kan inkawp ta a nih kha!

Class țan ni a ni a. Hmanhmawh taka ka kal chu a ni, class ațanga lo chhuak nen chuan kan insu chawrh a, chu zawng chu kan inhriatțan dan   ni deuh ber mai. Zak leh inthiam lo tak chunga ngaihdam ka dil mawlh mawlh chu, 'It's O.K!' tiin nêm thlup hian min chhang a. Ka lawm kher mai.
Min su ta chawrh chu kan inhriat phah a, kan inbe fova, inbiak fo chuan ka lo inngainaa, kan inkâwm chho ve ta a. a chezia, a nun dan chu mawi ka tiin fel ka ti a. A hmel a țha bawk nen ka duh em em ringawt mai a ni.

Ka duh a, ka ngainaa, ka hmangaih bawk a. Ka thinlunga zêp rual lova amah ka duhna chu tihlan loh theih a ni ta lo. Ka huaisenna zawng zawng sãwmkhawmin ka duhzia chu hrilh ka tum ve ta a. Chutia ni tin deuh thaw kan inzui hnu chuan ka bêm ve ta chawrh mai a. Zak thei lo min ti pawh nise ka hrethiam. Mahse, min ti hauh lo. A rin loh thuin min chhang a. 
Ka hêl a, ka chhai a, ka bêm a, ka hlan a, ka hrilh a. Chutia ti ta tluk tluk na na na chu a ni pawhin min nêp reng thei bik lo. A tawpah chuan ka tana rem ve turin thutlukna a siam ta a. Ka va han lawm kher em! Kha ni kha ka tana khawvela ni mawi, duhawm leh hriatreng tura  ni tawh ngei ang a, a ni reng fo ang!

Min chhan a țang chuan ka inkawp chawt a. Kan nun chu nuam kan tiin ka hlim thei hle a. Ni e, a ni nen chuan khawvel hi a hahdam a, a nui hmel ringawt pawh hian chakna min pe nghal hrim hrim.
Ni khat chu ka room ah a lo lêng a. Induh leh inhaw lo ta na na na chu ka ti ne ne a kan lo inhnaih vmta viau mai a. Ni dangah pawh kan infawp fova, chumi ni erawh a danglam tlat! Tlem a tlemah kan insum zo lo țep a ni e.
College kal te pawh hi a nuam tawh riau a, țhiante zingah pawh kan inkawp deuh chawt mai a ni!  College kher loah pawh kan college hminga kan chhuahna leh kan thiltih engkimah kan inkawp chawt a. Kan hlim em em țhin.
Chutia inngaizawnga hlim taka kan awm lai chuan a nu leh pain kan inkawp chu an lo hria a. Țha an ti lovin min țhen turin an nawr a. Mahse, a thei lo mai ni lovin a duh bik lo a ni. A nu leh pa phal lo chung leh rem ti lo chung chu kan inkâwm a, kan inkawp reng a. Inthlakhlel a na țhin khawp mai.

 College kal pawh a kum tâwp lam a ni ve ta. Kan hlim ve țhin khawp mai! Mahse, Chutihlai chuan thu dengkhawng tak mai kan hre leh ta. A  pasal tur an lo be tawh tih kan hria a. Min țhawng ngei mai. Kan inen a, kan inkuah a. A țap feih feih ringawt a. Hnem tum viau mahila, ka na ve tho si a.  Inhnêm thei bik kan awm lo. 
A rûkin kan la inhmu fova, mahse, fimkhur a ngai tawh khawp mai. Vawi khat hmun thengthaw nuam deuhah kan leng dun a. Kan awm dan tur leh kan awm mêk dan kan sawi dûn a. Inrûk mai ka rawt a. A duh hauh lo. Mahse, kan hmangaih a par vul ve thei lo tur erawh a tuar thiam lo hle! Kan inkuah a, kan infâwp a. 'Hmeichhiain   hmangaih hnena a pêk theih hlu ber chu a thianghlimna hi a ni. Vawiin hian i tân ka hlan ang!' a ti a. Mahse, mipa nunrawng tak anga ser nung siamsaktu nih chu ka duh lo! 


Ka duh a, ka hmangaih a, neih ngei ka duh. Mahse, a rem dawn si lo. Rûk ka tum a, inruk ka rawt ngial a. Mahse, a duh lo. 'Kan pahniha hlimna aiin ka nu leh pa hlimna ka ngaipawimawh zawk!' a ti tlat a. Bakah, hnam khat kan nih lohna chuan min dang a ni. Kan hnam inan lohna chu kan sawi chhuak ve ta a. Neih ka tum ngial pawhin 'Kan hnam nula, hnam dang pasal nei hi an vâng viau a sin!' a ti a! 'A nei awm chhun , tlemte zinga chhiar tel nih ka duh lo!' a ti leh a. 
An inneih hun a hnaih tawh vangin țhenna thu kan sawi ve ngei a ngai. Kan infawp mial mial a,  kham lo leh inthlahlel em em chungin țhenna thu kan sawi ta ni.

Chutia ka ngaihtuahna rama ka lo chên lai chuan, a ni chuan, 'i țha maw?!' a ti a. Ka țhat thu a ka chhân hnu chuan, 'Kha nia ka thianghlimna min laksak duh loh vang khan ka lawm e! ka chhuang takzet che a ni. Min lo hmangaih zia hi ni tin ka hrechhuak fo țhin!' a ti a. A mit a khap a, a mittui parawl chung chuan, kan hmangaih par vul ve lo chu sawiin, "Tuipui ral ramah, a ni chutah chuan, nang nen, nang nen ngei hian hlim takin kan leng ve thei tawh ngei ang tiraw?!" a ti sap a, la inhmuh leh ngei beisei chungin min hawsan ta a!


20 August 2017 | G


Sunday, 1 October 2017

KA THLANG SUAL



( A thlalak mawi tak hman min phalsaktu Jenny chunhah ka lawm e. Thawnthu leh Modelin inzawmna an nei lo! )


Ziaktu: H Zate, Hmar Rûn.
Min hmangaih em emtu chu hnâwlin min duh ve tu leh ka duh em em chu thlangin a lam ka pan ta a. 'Hlim reng ang che!' tia min thlah chungin, "Hei hi a nih hi ka bialpa, nang a chhai phâk ka ni lo!" ka tih chiah chuan a mit ata mittui a hnâm pâr a. Ka bialpa lam chu hawiin, "A mittui tlakna tur thlen lo hram rawh aw?!" tiin a phun sap a. Ka bialpa thar bike ah chuan chuangin kan kal liamsan ta a.