Tuesday, 7 November 2017

HAULAWNG LANU -2 (A Dream Come True!)

(A Dream Come True)

-H.Zate, Hmar Rûn.

[Haulawng Lanu, Zawlaidi, Oct 2012 chhunzawmna]
Hringnun hi a lo makin a va han mawi ṭhin tak  em! Khatia ka mumang rama kan intawn zawh khan hun chu a rial rei ta e, hun tam aliam a, ni tam a vei a, Tawnmang lama suangtuahna rama kan lo lenna chu a takram a thleng ve turin Ni 21 March 2013 zinglam dar 7:30 vel chuan kolasib aṭangin Bial motor hire a min rawn lam chho in kan Khua Thingdawl aṭang chuan kan rawn chhuak ta a. ka hlimin ka lawm ngang mai a, ka lo beisei leh ka lo nghahhlelh em em mai chu a takin a thleng dawn ta niin ka hria a, ka hlim takzet ani. Kawnpui leh zanlawn ah te kan Ṭhian dangte kan lam chho zel a. Lungdai ah chaw kan ei a, kan rawn tlan leh zel a, Aizawl kan thleng a, kan hrutphei zel a, Aibawk kan thleng a, ka Ṭhiante nen a Hotel a kan chawlhna kha Society in anlo luah tawh a, lung a ti leng khawp mai. Ka thlirliam ta ringawt a. Hei ha, Vallungmawla Lunglen tizualtur tingin khua lah chu a thiang em em mai a, nuam kan ti tlang ngang aniang, kan hlim hlawm em mai. Kan tlan zel a, ka rinloh hlanin Kan Hnam Ṭhiek Hming chawi a khaw awmchhun Ṭhiak chu kan thleng ta a, He khua hi Mizoram khaw hming ah chuan a diklo ber pawl ani awm e, Ṭhiek chu Lusei a kan lehlin a Ziah dawn chuan Ṭhiat tih tur ani a, Mahse, Ṭhiak tih ani tlat bawk si a, Hmar Ṭawnga Ṭhiek tih kha paih silo in Hmar-Lusei Ṭawngin Ṭhiak tiin anko ta anih hmel . Midum khám leh Hmuifang kan rawn thleng phei leh chu nuam hem hem tak ani, tun hma a kan zin ve lai kha chuan Aizawl ,aibawk sialsuk thenzawl ani ṭhin a, tuna Midum kham leh Hmuifang lam panna hi anla zolo a, ka vawikhat hmuhna ani a, nuam ka ti ang reng khawp mai. Motor ti ding in kan fangkual vel a,Pathian hi faklo thei ka nilo, hetiang ram nuam leh duhawm min pe mai hi. Reitawk fang kan awm hnu chuan kan tawlhphei leh ta a, Tlailam ani tawh a, Thenzawl kan lut phei ta der mai le, Kan khua ka ti a, ka insum thei tawhlo , Bus kawngka ah ka dak a, hmelhriat ka zawng ruai a, Venghlui, Bazar veng, Field veng kan tlan pel zel a, han chawlh khawmuan a Ṭhian hluite hmuh ka duh tehreng nen kan ding ta silo. Mahse, Hriatpuia,Dinthar leh RK Lallawmzuala te chu ka hmu hram a, khai aw, alo danglam tawh hle mai a, Tualvungi veng alo awm tawh maw le, In 1500 khua ni ṭhin kha 2000 anhnaih tawh hle dawn nih hi ka ti rilru a, Thenzawl leh Thenzawl Tleitiri , Ka Nu leh Sisi-i, Siamtea, Remi leh ka Pu Rosangliana te chu hmuh ve zuai ka duh tehreng nen din zai an rel ta hlawm silova Mitthlalo lék a thlir chungin kan tlan pel ta,tin,Tualvungi Thlan, Vantawng leh Chawngchilhi Puk tiamin. Tui Rihiau kan thleng a, Buangpui kan lut ta, Buangpuitea ka hrechhuak thut, a hming diktak ka hre tawhlo, Buangpui khua ani a, a tet em a vangin Buangpuitea tiin kan ko ringawt mai, tin, Ngentianga pawh, an khaw hmingin ka ko tawp mai anih kha. Kawngsirah chuan MPWD 37 HAULAWNG tih inziak ka hmuh chuan ka thawhuai a, mahse, ka lawm ala kimlo. KM khat chhung paw’n kawng thlanga tlan liam avangin HAULAWNG hi ka hmulo thei tlat.  Mak deuh mai chu, Thenzawl nen a inhnaih tehlul nen a hma in Haulawng hi ka lo hre ngai miahlo maw le.

Ni a thla ruai ruai tawh a, chutihlai chuan Keini Kolasib Bial ṬKP te chuan Haulawng kan rawn lut ṭan tawh a, Khawdai a MAIN COUNTER ah kan in ripáwt (report) a, kan Bial, Kolasib Bial ṬKP Flag chu kan pet el a. Haulawng khawchhung kan lut ta tak tak e, ka beiseiloh ang deuh maiin alo ropui a, Haulawng leilung chu  ka ke dinglam in ka rap ta a, khai, ka mur deuh uai uai in ka hria. A awmna pawh ka la hriatloh leh khawvel ah hian Haulawng hi a awm tih pawh ka lo hriat ngailoh chu atak in ka hmu ta a, a mak a nuam.
Kan thlenna tur kan thleng a, Pu R Lalrinawma te in kan han lut a, mikhual kan tam lutuk kha a in neitute kha mikhual an ang tawh zawk. An in buatsaihna a namen lo hle mai, keini michhe fa thlenna atan chuan a ropui lu deuh e, In thar, MṬKP Inkhawmpui pual a ansak thar ah kan thleng anih chu. A hming ka lo phuah hman a, Inkhawmpui Rûn ka lo ti leh hman pek a. A thar ani tih ka hriat a avangin ka lut vat a, ka Inthiar nghal a, Mikhual zinga Pu Rinawma te inthar chhunga ekin ainthiar hmasa ber ka ni mai awm e.

Ava han nuam kher kher em, zan ah inkhawm turin ka kal a, MTKP POWERPOINT PRESENT te kha ava han ṭha em, opening ceremony te kha a ropui tak  em. MṬKP inchhiarna kan han nei a, Bial tin Flag leh placard kenga bial neitu in anzui zel te kha a nalh dangdai hle in ka hria. Khatia mikhual tam tak mai kan han fuankhawm a, Tuilet hnu a la inhmu ngai miahlo te kan han inhmelhriat te kha a ropui mai nilovin a nuam tel bawk ani. Ka bula ṭhu, Luangmual lam nula cici-i han felzia te kha aw, ka kawrnghawng diklo min siamṭhat sak kha lawmthu ka hrilh hman miahlo.
A tuk a ni a, zing inkhawm ani a kan inkawm a kan bang a, chaw kan ei kham a, rorel turin BCM BIAK IN, Lamṭhuamthum lam ka pan a, rorel kan han ṭan ta a, khai aw, ka lo beisei leh hmuh hlan ka nghahhlelh em em mai HAULAWNG LANU ngei mai chu ka hmu ta a, rorel ninawm lutuk tur pawh kha tawrhdan a nep deuh in ka hria. Kan hruaitu te rorel han kaihruai thiam zia leh Hruaitu ruat dan lo felfai zia te kha (FOD leh pastoral in hruaitu, President, organizer leh sr adviser min ruatsakte) rorel a tiphuisui phah in ka hria. Kei mimawl in a rel ṭullo a ka ngaih te pawh kha an han sawi chuan rel fe hi alo ngai ṭhin a, hriatlohna hi chuan min lo ti mawl ṭhin  ngawt mai.

Hei ha, cheiraw, chung zawng ai chuan Ka hma a HAULAWNG LANU pianzei em em leh felzia te khan ka rilru a luah a, ka thlir ning theilo hi ani ber mai. Mahni kohhran nilo te, a ṭhen mahni kohhran ni te pawh an han che zet zet te kha ava han ropui cher cher tak em, a kohhran neitu aiin kohhran dang ho kha an fakawm in ka hria.

Rorel  lai a a chevel ka han hmuhte khan ka lo tawngfuh chu vannei hi ka inti hliah hliah a, khuanu malsawmna hi ka ti lo theilo. A usher form;kawrvar leh puanfen dum kha avan inhmeh ber kher em, a kal zawnga a pawnfen phena a mal vawngvah mai rawn lang zauh ṭhin te kha ava han mawi em, a pawnfen kha a chhing deuh lu em aw ka ti a, mahse, kha ai khan fual se chu ka ti chuang silo. A Lengins(lusei deuh takin) te kha a mawi pui hliah hliah in ka hria , hruaitu thlanna kan neih lai a lehkha a han sem te, a che vel hrim hrim te, palai rorelte thutlukna siam dawn a ban phar te min han chhiar a min han kawk zet zet pawh kha mawi ka lo ti em em mai a. Ka bul vel a arawn vei kual ringawt pawh kha ka tan thlir ninawm lo alo tling a. A zúnah ka uai ani mai lo a, a zún khan min bual ä ni ber in ka hria. Chu zawng aia mawi chu a mitmeng leh a nui hmel mawlh mai kha ani. Thlir nin har ka ti a, ‘Palang kar aṭanga mengdeker e’ ti lo chuan a mitmeng khan zún anei teh tlat.
Ka hmuh in ka en ṭha ngamlo a, ka hmuhloh lah in ka zawng ruai bawk si, a pangti no nalhzia te kha ka Ṭhianpa nen a kan sawi dun ni leh pek se la, "A ṬEK EL IE" kan ti leh ngei ang. (HMAR a Hnam peng pakhat Ṭhiek Ṭawng a 'a var vûk mai alawm le' tihna ani.) chûng zawng ai chuan a Nungchang mawi leh ṭawng phung a thiam em em mai kha ani ka rilru luahtu leh a zún a min phuartu leh hrui lo a min phuar tlatna chhan chu. Rorel kan zo a, tlai lam ani a, chaw ei a hun a, biak ngial ka tum a, ka va pan ta a.
Tichuan, biak tum chuan ka pan a, ka hnaih tial tial a, ka zám tulh tulh a, a bul hnai ka thlen chuan ka khúr titih tawh a, ka bul lawka a din hnu chuan biak tumin ka ká ka áng zuau tawh a, kha pa pui roh kha ka haw lutuk, a rawn be khanglang a, ka be ngam ta lo. BCM LAMTHUAMTHUM Biak In chu a vang zawng in ka kaltlang ta ringawt a.
Zan alo ni a, a chevel thlir reng reng chuan ka mit ka len a, Haulawng Lanu chu ka zawngruai hi ani ber mai.
Counter lama a ṭhut laite, chaw nghei ṭhak khawpa mikhual min ngaihven te kha ka chhuang hliah hliah a, phur em em niawm taka mikhual min han buaipuite, zan dar riat hnu lamah pawh intihtheih vang pawh ni lova chaw ala eilo ve ngat te khan ka rilru a hneh em em mai a. A zûn ah Ka uai ni mai lovin a zûnzám in min zem a, hrui lovin min pawt tlat ni ber in ka hria. vawi engzat fako nge amah zawnna'n ka hun ka hman le aw.
Ruah a sur a, pandal kha ṭhalkhaw mil a sak alo ni si a, ruahsur tur mil a sak a lo nilo a, ruah ahan sur meuh chuan a rawn far ta tluk tluk mai a, kha tih lai pawh khan ruahsur vawt kha nuam ti em em ni awm fahran a ahan che zet zet te kha ka tan chuan thlir ning awmloh a tling hliah hliah a, ka hma zawn a ruahtui far in a far huhlo chin a aṭhu te, zak si zak lo hmel tak a insawn i duh em min han ti te kha aw, ka insawn duhloh vang nilovin amah ka zah vangin ka insawn talo a, ka hmazawn ah a ṭhu a, ka en reng a, ka bula nula ṭhu hnenah chuan he nu hian min star kan ti mai chu, min bengpawp a, i star vang zawk a nih kha a ti a, ka pha lo, ka arsi ru tlat a lawm. A mitmeng pawriai leh a biangno nak mai te, a kechheh mawi em em maite kha ka tan chuan a mawi hliah hliah a, Sawisel tur hi ka hre lo ani ber, ka ṭhianten min biak pawh hrelo khawpin ka lo thlir ṭhin a, Silchar khawpui a amizia ṭhatak mai kha alo awm ve reng anih hi ka ti ta a. Ka rilru hi a luahkhat mai ni lovin a luahliam ni ber in ka hria a. A mak hi ka ti , ka duh hluah hluah ni ber in ka hria, a pianṭhatzia te, a felzia te kha ka tan chuan a mawi hliah hliah asin.
Hetia Haulawng Lanu chanchin ka  sawilai hian Haulawng chanchin hi tlem tal hrilhlo che a ka awm chuan Nula chauh ngaihtuah mai min lo ti pal hang e. Haulawng hi Mizoram chhimlam a Thenzawl leh Lunglei inkar a awm ani a. In 525 awmin, Chhungkaw 444 an awm a,Mihring 2175, mipa 1137 leh hmeichhia 1038  an cheng a, Hospital (PHC) pakhat a awm a, sub- centre 2 a awm bawk.In 500 khua e tihlo ah chuan Kohhran lamah chuan rual anpawl ve khawp mai ,Baptist Church Of Mizoram 4, PCI 1, UPC (NEI) 3, Salvation Army 1, SDA 1, Isua Kohhran 1, Church Of God 1, an awm a. zirna in lamah chuan High School 2, middle School 3, Primary shool 7, Aganwadi 8,  awmin, Tourist Lodge 1, PWD IB 1 Community Hall 1 Hausiampa Hall M ṬKP Inkhawmpui 2013 Photo Exhibition buatsaihna leh Khelmual Zokhuma memorial Field, MṬKP Inkhawmpui 2013 Pandal innghahna,Tin, Sawrkar Department hengte ho hi a awm ve bawk; Soil and water conservation(R.O), Agriculture Department (AEO) , Medical Deptt (M.O), Vety Department (VAS), E&F Deppt (RO),  Mizoram Rural Bank, Industry Deptt, Bsnl Telephone Exchange, Horticulture Deptt te a awm bawk ani.
Hetiang mai te hi ani, Ka nun a danglamna thlentu Haulawng Lanu tualchaina chu. A va te ve tiin ilo ngainep ngawt ange, a te nang a A Lian ani. A mah aṭang hian missionary tamtak an chhuak a, Pastor leh Rawngbawltu tamtak Ramchhung leh Rampawn ah an chhuak a, MṬKP President Rev Zohmingliana hi Haulawng Khua ani a,chumai ala ni hleinem, tun MṬKP Inkhawmpui hi MṬKP President Khua a  a thlenna awmchhun te zinga mi ani ve  tlat. Chumai anilo, NEICC Secretary Pu Rev Lalnunzira (Rev Zohmingliana MṬKP President nau) hi Haulawng khua hi ani asin. BCM missionary Panga leh Pastor pathum anchhuak tawh bawk(BCM bikah). Tin, Haulawng MṬKP Inkhawmpui hi Mizoram inkhawmpui liana Pre-registration hmanna hmasa ber ani bawk.
An khua hi te hle mahse, an taimak, tlawmngaih leh Ṭanrual em avangin an rual awtlo hle a, An khua aṭang reng hian Haulawng Lanu pawh hi Silchar khawpui a mawilo taka inthehṭhil mai chi chu alo nilo tawp mai. He Inkhawmpui aṭang hi chuan Haulawng te pawn anthei alawm, tih te, Haulawng ho ang mai tih te chu ṭawngkam thar a piang tawh a, Khaw inlungrual tak sawinan Haulawng ang mai kan ti reng tawh ang.
Hetiang khaw nuam leh ṭha aṭanga chhuak anih vang pawh nifahmiang, a ṭhat em em mai hi.
Inrinni zing ani a, Zing ṭawngṭai leh Baibul Stadi inkhawm kan neih zawh chuan HL te inlam pan chuan ka kal ta a, mi kan zawt zel a,zah thupnan ka ṭhianpa ka hruai bawk a, ka zah leh ka phur phulo zetin alo awmlo chu niin kan haw leh ta ringawt a, Kan Thlenin Pu Rinawma te In kan han thleng chu ka u te hoin Haulawng Lanu bawk maw I zawn leh ruai tawh a, anlo ti a, mahse, ka chhang ṭha duhlo, ka chhanṭhat chuan an zual kai anga kan thlenna te khan an hriat ka hlau em ani, An mikhual te zingah Haulawng Lanu lo ngaizawng em em tu a awm tih an hriat ka hlau tlat a lawm.  Chaw kan ei a, kan eikham chu Hmanhmawh taka insiamin , Seminar ah kal vek tur anih vangin Kan Bial chu kalna tur akn insiam rem a, Unit tin aṭanga kal te Hmunli ah kan inṭhen vek a, kei chu Mizo Ṭhalaite leh India Look East Policy , Pu Rbt Dr Jv Nunchunga Present na tur, BCM Biak In,Lal Veng lam chu ka chang a, chuta kaltur chuan kal ka han rem taa, PÛM (pandal) ka han thleng chho chu, Ka mit nghal lutuk chuan Haulawng Lanu chu ka va hmu fuh a, mi pakhat chanchin zawt turin ka va phei a, Haulawng Lanu chu Kawngka bulah alo dinga, Ka han enchiang ṭhin a, ang ka ti si a, anilo tih chu ka hre mai a, a hmelṭha leh fai veng mai chu ka en reng a, tichuan, ka bia a, a mitmeng pawva chuan Palang kar aṭang chuan mengkalh ralh hian min rawn en a, “I Hria em” tih tum khan “I ni em” ka ti ta mai a,”aih, ka nilo’ a ti a, ‘kan kochhuak dawn mi’ ati a, mahse, ka zawh tumloh tak mai ka zawh ták a vang khan ka hamhaih ta vek a, áih, ngailo e, a tawk, ka lawm e’tiin ka kalsan ta a, mahse, ani chuan fel tak leg hawihhawm tak mai hian ka mizawn te awmna chu min hrilh ta hram a. Ka zak lutuk chu Ka Ṭhiante hriatloh hlan a ka lo zawt hman chu ka lawm rilru khawp mai a, chuti nisuh se, he thu ka ziah hma hian Mizoram ṬKP group ah ka thlalak nen a chuang kulh tawh ang.  Ka zak khawp mai a, ka mur chum chum ni ber hian ka hria, Mahse, kha ka thil tawn aṭang khan Haulawng Lanu felzia ka hriat phah tlat lawi si.
Ka rilru gaihtuahna hi a luahkhat mai nilovin a luahliam hini berin ka hria a, (Haulawng) ka lo kal ta chu ka inchhir lek lek a, mahse, pawi ka ti chuang silo. nuam hi ka ti hliah hliah zawk a, ka rilru ah hian a chàm reng a, ngaihtuahloh ka tum ṭhin a, mahse, ka ngaihtuahlo phal bawk silo. Ka en a, ka en ngawih ngawih hi ani ber mai, Biak ka tum ṭhin a, ka vanduai a siamin biakna hun ka nei thei lo. Ka bula a dinlai chuan han biak mai ka duh ṭhin a, mahse,mi tamtak hma ah, chupawh Biak In ah lehnghal han biak chu ka zahloh theihna hian a tlin lo ni mai l ovin a zo lo a, a sapáwt (support) bawk hek lo.
Pu Jv-a seminar paper present chu a pawn aṭangin kan ngaithla a, paper erawh ka chang talo, a hnu ah ka download ta ringawt a, alo tha kher mai, ka hmang ṭangkai lutuk, ka zirna nena inmil tur ber thlang kha ka ni bawk a, ekzam na ah kan hman ṭangkai zan kha.
Chumi zan chuan ka bul lawk ah hian a ding reng a, Àshar (USHER) anih vangin. A chevel chu hmuhnawm ti em em ka thlir  a. Inkhawm ban chuan ka lo chang a, Pandal hnung lama a rawn chhuak chu ka lo chibai hram a, kha kha Hmaichhan a kan inhmuh vawikhatna ani in ka hria, Ka han chibai chu ka mur deuh uai uai hian ka hria, Kan han inhmu chu kan hlim ve khawp mai a, an in lam haw tawh tur anih a vangin Mipa hna thawk turin ka zui phei ta zel a, kawngah chuan kan ti ti zel a, thil kal dan mak zia te kan sawi dun a, a pangti no tak main a ka kut a rawn sík zeuh chang khan ka ṭêk sawk zelin ka hria. Chutihlai tak mai chuan ka rilru te te in thil ka ngaihtuah rauh rauh a, mi pawi te hi ka lo khawih mai an gem aw, ka ti a, mahse, “Saivate vunglai chu tu ta bik ani chuongnawh” anlo tih kha changchawiin ka kalpui ta zel a, an in kawt kan thlen chuan ka ding ta a, Mikhual tam lutuk kha ka zak deuh a, In a lut ve ah min sawm a mahse, ka hnial fithla ṭhak a,Kham lo hle amhila  A tuka inhmu leh turin ka in mangṭha ta zawk a, an in a han lut chu mikhual ṭhenkhat chuan anlo chhaih laih laih a, keipawh chu muangchangin ka chhuk ve ta a, Thlen In thlen chu ka huphurh khawp mai a, engdang vang nilovin, Kan bial hruaitu ten min chhaih ka hlauh vang zawk ani. Kan bial hi tlem bawk a, kan inhre hneh hlawm a, kei a awm ngailober pawh hi a chhia chhia hian ka hming hi chu an hr eve far hlawm a, zan a kan han mu tur te hi a bang tlai deuh chu “Nupui zawng turin kan kal lo aw” hi kan inti leh fawk ṭhin a, kan infiam laih laih ṭhin, nuam kan ti tlang bawk aniang, mut nachang kan hrelo a, fuhlo ta ber chu mut nachang hriatlohna khan thawh nachang hriatlohna a hringtel tlat kha ani. Ka han lut ṭhem ṭhem a, ka vannei a siamin anlo la awmlo a, ka inthlak sawk sawk a, a thleng hmasa ber awmin ka awm ve ta ringawt a.

Pathianni Zing ani a, ka Zing inkhawm kal peihlo chhuanlam chu KNP Bethel ho Tûm Káu kawng zawhna ah ka tel ve a,Thlalatu berah min hmang zek asin, ka Haulawng Lanu pawh ka Bulah a awm ve a, a changin a bulah ka va kal ve a, a fel reuh khawp mai, ka duh ang thal a, fel leh ṭha ani.

Chhunlamah chuan Inkhawm ban ah lo changin kan inkhawm a, engdang a ngaihtuah theihloh, inkhawm ban chuan a bulah kalin thla lakpui ah ka sawm a, a lo amen ve mai a, Pu Hawla te nupa an rawn tel ve vang nge pawh ka hrelo, Ka lo sawichhuak ta kha ka inchhir rum rum, a rem a piang khan thla anlak dawn a piangin çhi’ti tawhloin, NLUP anti zel mai a, Thla kan lak dawn a, NLUP ti rawh u ka lo ti kha ka inchhir letling zawk. Thla kan han la ta a,Ding chung chuan ka hniam zawk loh paw’n ka sangzawk dawnlo chianga ka hriat a vangin ka dinpui duhlo a, ka ṭhut pui tlat a. Ka nau nen a thla kan han la dun te kha min hmu chu nuilo an awm pawhin ka hrelo, kei aia a sanzawk a vangin Ka zuanga tichuan ka zuanglai leh ka nau dinglai chu kamera men chuan a rawn hmet ta a lawm le. ropui thei tak kan ni. Thla te kan lak zawh chuan Áshar a ṭang leh tur anih avangin tihtur annei a, kan in thlah leh ta a, Sakramen sem lain ka hmu leh chauh.
Pathianni Zan ani ta, hui ha, lung a lemg ṭan nghal main ka hria, a tawp zan te ani bawk a, tiin ka hmuh thei a piang chu chibaiin ka mangṭha nghal zel a, Counter lamah chuan Lehkhabu ka lei loh te ala awm takin tiin ka va pan hnai ah, chutah chuan a lawm, chei raw… ka sawi zawng pawh hian ka la khur deuh in ka hria. A lo ṭhu vang mai a, piang ka tum a, ka ang zuai a, ka chip leh a, biakloh ka tum ta zawk a, mahse, han biakloh mai a tan chuan ka ui bawk si, ka han be ṭha leh ta a, biak ka tum tih chu a hria, mahse, ka volume hi a ṭul hun ah a hniam tlat ṭhin a vang hian a hre pha lo a, tichuan , ka va pan ta a, kan in chibai a, an bulah chuan reilote ka ṭhu a, kha hunk ha reilote mah nise, Tuilet aṭanga ka hun hman nuam ber ala ni awm e. ka zak deuh avangin ka ṭhianten min nghak tih chhuanlam in ka kal bo san ta a. Ka thlenin ka thleng a, Mut mai anlo tumlo hlawm khawp mai a, a tawpzan ani bawk a, Tlai mah var ila kan inning hlei lo’ng e, tih thupui a hmangin Tlaivar anlo tum far a, chutih lai chuan N.Mualṭhuam Nula Tepuii pawh haw alo tum ve mek bawk a, a hming pum chu sawilo mai ang, a bialpa riau riau hian Haulawng kal leh hunah min lo chang palh ang. A pa in haw turin a ti a, a ni ala awm duh si, chutah, keini lam aṭangin lo thlahlel tu anlo awm bawk nen, ka hrethiam teh nuaih tawhlo, Mikhual a hriatchianloh khatih zo zai zingah khan Hruilova phuartu anlo awm ve pawh nifahmiang. A naute ho chu an mu far tawh a, engah kher ani ber kher kah haw tura tit lat nge mawni. Kei pawh chu an bulah chuan ka ṭhu ve reng a,mahse, mut lam ka ám deuh avangin ka mutsan ta hlawm a, eng em anchanglo hlawm chu aniang, zing ham takah antho theihlawm tlat. Anlo tlaivar awkawnglo chu niin, Kan han insiam sang sang hlawm a, kan inpu chhuak ta mai a, Kan thlenna pa Upa Lalrinawma Ralte (Fb ah chuan nise ETLaR anti leh hlawm ang chu) chu a ngaihdan ani ta hauhlo mai, min ko let leh vek a, Ṭawngṭaina ala nei te te a,kan in chibai vek a, Thla te kan la ho a, kan inthlah ta a, Pui Family nge nge anlo puie, Lapui, mapui, ruatpui, tepui, bawihpui, eng pui pui emawni pui kha an tam pui roh lutuk a, Pui chhungkua tihloh chi zuk nisuh. Hmar Hlaphuahtu in “Ngai mana chel thei ini sinaw maw” alo tih ang maiin ngaih vanga inchel thei lah kan ni hlawm si lo.
Ka Haulawng Lanu chu hmuh hmanloh hlauin ka phi chung a, a tawp ah chuan ka va chibai hram a, kan la inhmu le hem eng chu maw?! A ti a, kei chuan kan la inhmu le hang chu, ka ti a . ka en reng a, ka kalsan a, ka han leh hawi chuan a bula Mipa ding ve nen a an hlim hmel ka han hmuh khan ka lo BEISEI ve ṭhin chu Beidawnna min thlentu mai ani dawn ani tih hria in, a bula miin hlimna a pek ang kha ka pe thei ve dawn silo, a Fawn Nambar ka lo lak pawh chu paihthla in, Tichuan, Mut mawh chhin mawh a ka lo hman leh Tawnmang lam thleng a min tibuai ṭhintu Haulawng Lanu leh Haulawng Khua chu ‘CHung Pathianin min veng se, kan inhmuh kan intawn leh hma zawng’ ti a vailiam in, MṬKP Inkhawmpui Vawi 45na, Haulawng 2013 ah chuan ka damchhunga kal leh tawh ngailo tur leh LALPA HMAN TLAK ni zel turin ka rawn liam san ta a.. . .

Source:
MṬKP Inkhawmpui vawi 45na Sovinir PÛM
Mtkp2013.org
Pu Lalbuatsaiha Sailo,Zira Hrangchal leh Mapuii Ralte

No comments:

Post a Comment