Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Tuesday, 7 November 2017

HAULAWNG LANU -3 (Nghilhni awm lo)


Model: Rody  

( NGHILHNI AWM LO )

Ziaktu:   H.Zate, Hmar Rûn.

- hzate.in

Khatia ‘a hlimna ka thlenzo ve dawn chuang silo’ ti a a no. min pek pawh paih a, ka hawsan hnu khan Hun leh ni a vei a, theinghilh tumin ṭan khawh seteh mahila nghilhni reng a awm theilo. A no ka lo hriat tawh, ka rilru a cham tawh chu ka ziahna lehkha leh Ka Fawn aṭangin thaibo seteh mahila a thaibona ber tur ka rilru ah ka thaibo thei tlat siloh avangin biak leh tumloin hmelhriatloh ang mai a awm chu tum mahila a sâwt tawh silo. Biakloh ka tum poh leh ka rilru a tibuai a, Ka biak apiang lahin tibuaitu mai ka nih hlau in ka in thlahrung bawk si!! Aw! Hringnun hi alo va mak em! ka tana duan anilo tih leh ka tan chuan duh en a en chi leh ka cho rual pawh anilo tih hre reng mahila Ka belo thei silo.  Ka rilru hi tih beidawn tumin vawikhat mah ka hmuh tawhloh tur Nula chu ka lo khukpui ve vak turin anilo ka ti ṭhin. Mahse, beidawnna tur a thil ka ngaihtuah hnem poh leh tunlai khawvel changkan tawh zia leh engtikah emaw la hmuh hun a thleng thei ani tih lam hlir ka rilru ah a rawn lut leh si ṭhin. 

Haulawng Lanu hi a hming ka la sawi miah lo niin  ka hria a, a hming ka hrelo a ni lo, mahse, a hming sawi hi ka huaisenna hian a ngam thlawt lova, ka sawi ngam zen zen lo mai a ni. A mizia leh a pianzia chu ka sawi fo tawh a, Nula hleitling tak ani a, zirna lamah pawh a hniam chhe zekzawk biklo. An khua ah Higher Secondary a awm tih ka sawi theihnghilh  pawh pawi ka ti a, mahse, an hawnna a la rei lo em a ka hre mai bik lo a ni. Bakah, Higher awmleh awmloh kha ka tan a pawimawh berlo a, facebook a a thlalak ka lo like lo ai pawhin ka ngai pawimawh lo zawk. A chhan chu kha sikul kha ka ngaihtuah ber a ni lo, ka ngaihpawimawh ber chu HAULAWNG LANU chauh a ni miau a. Facebook han sawi takah chuan in be fo mahila ka rilru tlang rawihin ka la hrilh lo hi mak ka ti a, a rukin ka zah ngawih ngawih a, a thlalak ka en ringawt pawh hi ka tuiral lo chauh ni ber hian ka hre ṭhin. Facebook a thlalak ka rawn dah a, like loh hlau reng rengin ka phi chung a, comment ngei ngei ka tum te kha mak ka ti. Chuchang ani hleinem, a thiltih ilo a chimchin leh a thlalak vel a Mipa an rawn lan tel ve hi chuan a rûk te hian ka lo thîk ve em em ṭhin. Ka thil post a rawn comment ve a a rawn like chang a ka hlim ṭhin zia te kha aw!! Tukhaw hriatloh hian a nuam veng veng zel. Amah vekin ‘HAULAWNG LANU  kha tunge I ziah chhan a’ ti a mi han zawt te kha “nangmah hi i nia lawm”tia chhan mai ka nâp, mahse, huaisenna ka nei lo.  Msg ka thawn a, a tawpa ngam leh ngamlo a ‘Hmelṭhate’ tih ka belh ringawt pawh hian ka thisen hi kangchat mai dawn hian ka hre ṭhin. Chutia ka awmlai chuan ka rilru in Hmar hla pakhat “Hrietthiem zai rel el ta la ka umdan hi, dangtu um silo, Hmangaina kan hlan ngamnaw che hi” ti a ka ṭhianpa in a sak chu ka rilru ah a rawn lang veng veng ṭhin. I thuziak a awmzia ka hrelo, Hmar ṭawng I dah tawp a ilo ti anih pawhin ka hrethiam che, hei ka let dawn a lawm. “Hriatthiam zai rel mai ta che Ka awmdan hi, dangtu awm silo Hmangaihna ka hlan ngamlo che hi” tihna ani a, he hla hi ka tana phuah hi ani ringawt in ka hre ṭhin. Chuan, han hlan ngam tai la, hlan ta ringawt pawh ni ila, min chhang ve tak maw. Min chhang tehreng pawh nise ‘Khua hmuna leng mah hian bawihte, in tawnni an nghakhlel ṭhin a’ an lo ti si a, ngai leh thlahlel em em chungin lunglen biahthu chang hian  Ka Di rûn a lawi anga tawnni reng a har silo ang tih hi ka hlau ani.

Kan inkawm dan leh kan in biak danah pawh chuan min haw hranlo tih chu ka hria a, a chang phei chuan kan inngaizawng ta emawni tih mai tur kan ni. Kan thurûk leh veizawng te kan in hrilh tawn a, mahse, kei chuan ka hringnun chu dâwt in ka hrilh ṭhin. Ka duh loh zawng te chu duh angin ka lang a, amah duh angin ka lang duh lo, ka chapo vang nge ka ât vang zawk pawh ka hre lo, min hmuhsit a min ngaihnêp ka ring tlat a. min ngaihnêp phah hlauin amah duh angin ka lang duh ngailo. Keimah ka inrin aia nasa in amah hi ka ring a, a nunze mawina te hian min hneh a, an khua a ka kal hnu phei kha chuan engtin emaw hian ka awm a, kei aianaupang mah nise ka zah ngawih ngawih ṭhin. Ani mi neinung fa ania, kei ve chu, ka neih hi a nung tih mailo ah chuan mi neinung hi kan la ni ngailo hrim hrim. Mahse, ka tilo theilo. A hawihhawmna leh a felna chuan min hneh a, ‘Kei rual u zawk pawh min sêl lova ‘ an lo tih angin ‘Kei neih nung ve satliah pawh min sêl lova mi pangai anga min kawm thiamtu hi ka rilru chhungril ber aṭang hian ka haw thei ngang lo a ni. Huat ka tum poh leh ka duh a, ngaihtuahloh ka tum hnem poh leh mut mawh hnar mawh ah ka hmang leh lawi si. Ka haw theilo lutuk hi ka in haw letling zawk a, ka theihnghil thei lo lutuk hi ka nihna pawh ka theihnghilh zo tawhin ka in hria. Ka biak khatin ka ngai a, ka biak zinin ngaih a zual zel bawk si. 
Hmun khatah awm lo mahila a ni nen chuan hringnun hi a nuam a, hmeichhe awm nem zawk mah nise he rilru no tak hi a kiangah hian a nuar lo thei ngai lo. Chutia ka phu lohzia ka ngaihtuah a ka phulohna zawng zawng mark 20 pu dawn a ka ngaihtuah chhuah hnu pawh chuan ka duhna leh ngainatnain kianzai a rel chuang si lo a, a tawp a tawpah chuan bêm zai chu ka rel ve ta a.

Inrinni zan ani a, thla a eng no ngulh mai, he zan thla êng no ngulh hnuaiah hian Hmangaih biahthu chu hlan ngei tumin ka in sangphek a, ka in ngaihtuah nasa khawp mai. A chhan chu, thla eng hnuaiah ngei han inhlan chu a romantic bik riau hian ka hria a. In chungah ka lawn a, thla eng thlirin ‘a riang chan tur dâwn lo hian maw’ ka ti vawng vawng a, chutih lai tak chuan Haulawng Lanu ngei mai chuan msg min rawn thawn a, ka han en chu ‘zate,  thil hrilh tur che ka nei’ tih hi a lo ni a. ‘Han sawi ta poh che’ tih chu ka thawn lêt a, ‘min ngaihnêp phah suh aw’a la rawn ti hram a, ‘aw, KS pawh ni la ka ngainêp awm si lo che a’ ka rilru in ka ti rauh a. kan intawn hma thil a ni a’ a ti a, a zah hmel khawp mai, mahse, ka hriat chak tlat a vang chuan a tawp ah chuan min hrilh ta a.

Ni 12 march 2014 | 

( A lo rei ta hle mai. Ka haichhuak hlawl a. Ka rawn chhawpchhuak ta mai. Ka hrilhru keuh ang che, model IG profile en turin a hmingah khian hmet keuh rawh.)


No comments:

Post a Comment