Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Saturday, 4 November 2017

I LUNGINSIET VE NAW MAW?!



Model : Thelma Keivom

- H.Zate, Hmar Rûn.

Ka nuna i hung inlang ni kha khawvela ka nun inhawi ni tak ni ngei a tih. Ei pahnia hun ei hmang po po kha ka ta ding chun hun hlu le ngaium a la'n chang rawp hlak.

"I nal taluo!" ti malama i mi dit thu i hril țum khan hieng el ding hi ka lo ring ngai nawh a. I ta dinga rem ve dinga ka intiem nia lawm em em a, "Ka hmangai che." i ti mawl mawl lai khan hieng el ding hi ka lo ring ngai nawh. 

Ka hlimna le lawmna i ni hlak a, ka ta dingin beiseina i nih. Ka hringna le damna ni naw la khawm, hi khawvelah hin dam san ka nei ngai a ni chun nang hi ka dam san ni ngei i tih! I mi ditsakna le i mi ngaisakna po po kha ka ta dingin a hlu a. Duot taka i mi enkawl baka inhawi ti le thlakhla ka nei ngai naw a, ka thlakhla tak a la ni rawp hlak!

Chuonga hlim taka ei um lai chun pawmlai nei i ni thu ka hriet a. Ka va hei na de aw! Ka ta dingin vanpui a chim! Sienkhawm, ka hmangai em lei chein a thei hram a ni chun, nang ka chang ve theina ding che a ni phawt chun i 'thaikem' ni khawm inhuomin, mi hrilsiet le endawng tuor inzuomin mi pa i nih ti hre zing pumin ka la kawp hram hram che a ni kha. Ka hmangai em lei che hin tlang rel le hrilsiet phur inhuomin nang ka bel tlat che a. I pawmlai nei khawm theinghil țhak khawpin ka hmangaina lei hin nang ka lo thlang tlat che a ni kha.

Hi ka hmangaina, hmangaina mitdel, a tum tawk le phu tawk khawm țhe hran thiem lo hin ka hmangai em lei chein ka ta ding ni ve lo ta ding chun ka lo inhlan a, ka hmangaina po po khelah ka hlutna le ka nei hlu po po chu ka lo inhlan che a. A nih, hi nuhmei hmangaina hin chu a nei po po i hlimna dingin a lo inhlan che a. Dit le hmangai taluo lei che hin mi hmusit le hrilsiet huomin pawmlai nei chu ka kawp ran che a ni hi!

Sienkhawm, Keiin ka hlutna thapa ka thlang lai chein nang ruok chun infiemna mei meiin i mi lo hmang a. Ka hlutna le mawina chu chênin, ka leia hrilsiet phur inzuom si lovin hmangai em em tu che hi i mi'n phatsan ta si! Ka dem naw che, ka phu naw che a, i hmangaina indik tak chu i kawppui ngeiin a phu ti khawm ka hriet. Sienkhawm, hieng el ding hichu ka hlutna po po ka lo inhlan hma che khan vawi khat bek mi lo hril ve la chu tuor dan ka thiem deu el rawi maw!   Ka hlimna le lawmna ni hlak kha tu ruok hin chu ka țapna intluntu i ni tah.

Ei nunhlui ka ngaituo a, ka khuo a sawt  chang hin ka ngai zuol hlak che a. I kawlah, i awm innghai ngeia um nawk ka thlakhla hlak. I kawla um ka nghawk naw a, nag leh thi chena hun hmang ka nuom rawp hlak. Sienkhawm, nang ruok chun nang a leia muolpho ding leia muolpho chu phur ngam lovin i mi lo inkieng san ta a. 

Hi ka laka i nunrawngna lei hin, mawi le țha ka ti ka ring ngai naw, Pu Laldana hla 'I khawngaih ve lo em ni?' hi ka ta dinga hla nal tak a ni ta si!

I lungdum loh di kei vang hian maw?

Tlangrel phur ngam lo mahla,

Ti em a i zunzama uaitu hi

I khawngaih ve lo em ni?!!


I hmangai naw i ngaizawng kei a lei hin mi hrilsiet chu phur ngam naw la khawm, hieng ang ema i zunzama thamral hi i lunginsiet ve naw am a ni?!

04 November 2017 | Guwahati


No comments:

Post a Comment