Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Tuesday, 21 November 2017

KA STAR VE KHA!



 ( JNV Thenzawl tleirawlho thlalak hi dah teh ang. ) 


- H.Zate, Hmar Rûn.
--- hzate.in

Hringnuna hun nuam ber chu a ruka lo duh ruk neih hunlai, tleirawl/rawlthar nun thianghlim tak, hrilh ngam si lova a ruka lo duh veng veng hunlai ngei mai kha a ni ngei ang!

Kan han tilpawr aw ve țut a, aw mawi tawh loh nak alaiin a la mawi loh belh leh ta. Awi, a mak hian a nâ hi a ni ber mai. Țhenkhat kan hmai a han bawl deuh țan a, pangti peng hrang hrangah hmul lo awmin, zan lamah pawh mangpui kan mang ve zak zak tawh. Ani, chutih lai ngei mai chuan a ni a ruka ka rilru luah veng vengtu chu ka tawn tak ni. JNV Thenzawl, emaw JNV Serchhip emaw a an sawi țhinah ngei mai ka kal ve a nuam kan tiin țhianho kan hlim țhin hle. Mahse, chutia ka duh ruk em em, kha tleirawl, ka star ve kha ka tawn ațang kha chuan rilru hi a danglam zova, ngaihtuahna zawng zawng deuh thaw hi a luah zo ta! Mi â ni si lo hian thil dang ngaihtuah turin  ngaihtuahna fim ka nei tawh lo a ni ber.

Ka star ve kha, a ni ngei mai kha A țhiante zingah pawh ka tan chuan a țha larh a, ka mitah chuan a ni tluka țha leh ka thinlung luahtu an awm lo! Mi tan khawvela Hmeichhe duhawm ber ni lo mahse, ka tan hi chuan ava ni chiang si êm! A chawn, a mal, a kut chum biang mai leh a biang tai tek mai te kha ka mitah hian a mawi a, ka thinlung tan hian vei ngawih ngawih tham a ni si.  A sam dum hlarh mai te kha ka tab hmuhnawm a tling a, a hnar leh beng te thleng khan ennawm a tling a ni ber mai! A mitmu dum fiah kalh maiin a min han melh te kha ka tan hian tawrhhar a tlingin awn ruai ruaina tham a va tling țhin si em. Chu mai ala ni lo, nui sanga min han melh zauh phei kha chu inrinni chhuna vawksa nena thleng pawh ka phal zak! Ni e, A ni sin, ka tan Pu Zova Vawksa suah aia a hlut loh bikna ka hre lova, ekzam laia țhiante'n thiam loh min hrilh aia a hlut loh bikna lah ka hre hek lo. Țhiante'n Hmarcha pum khat min pek aia a hlut loh bikna lah ka hre lo.

Ngaihtuah loh ka duh a, ka ngaihtuah lo phal țhin si lo. A hmel hi ka mitthlaah a châm reng a, amah ngaihtuah hian zan rei tak tak thleng ka men phah fo țhin! Huat ka tum a, ka haw thei lo. A awm dan engkim mai kha ka tan hmuhnawm a tling a, ennawm a tling a ni ber mai. Khatiang ema ka rilru luahtu kha chu kan zing chaw, Chaw kan ngei mai kha hlan vek mai ka nâp a, a tan chuan tlai lam thingpui leh a hmeh chhang pawh hlan ka phal hial awm e!

Thlasik vawt vin tak mai kara a biang leh a hnar tai sen vawt vawt khawma a zing tlan hmuh kha a nawm rualin vawt ti taka a khur hler hlerh țhin ka hmuh erawh chuan kan PET Sir kha huatna namen lovin ka lo khat țhin.

Class pana a kal ka hmuh ringawt pawhin ka hlim a, a hlim a ni tih ka hriat phei kha chuan ka hlim lehzual a. Mahse, a hlim chhan ka ni lo tih ka hriat erawh chuan tih theih leh tih ngam nei hauh si lo hian a rukin ka rilru hi a lo na țhin.

Ka star ve kha, a tan tibuaitu mai nih ka hlau a, a tana mi țangkai nih ka tum fo țhin. Puih a ngaihnaah ka pui a, a tan chuan ka inpumpek hi a ni ringawt mai. Mahse, ka sta ve kha ka duhzia ka hrilh ngam der si lo.  Hrilh a hnekin ka zep nasa a. Zanah chuan ka sawi chhuah dan tur ka ngaihtuah a,mahse, a tluk alo thleng a, ka țhulh chiang em em țhin si.

Ka star ve kha, Amah vang khan JNV Thenzawl kha mawi ka tiin nuam ka ti a, Waterpoint leh Lalchawm li thleng khan ka tan chuan ngaihawm a chang a, a hlu vel vek a. A ni a sin, a awmna a nih miau avangin sikul chawlh lai paw'n a ni vangin sikul ka ngaih veng veng phah a. Ka tana hmun hlu ber a chang zo tawh.

Ka Star ve kha an Dorm ațanga a rawn chhuak te hi zun leh ek nei lo hmel a pu a, a țhiante leh kha kan sikul hmeichhia zawng zawng lakah khan a țha ber awm e!  A hmel țhat piah lama infiamna lam a ti thei lehzel khan ka tan a hlutna a tizual a.  A rukin ka vei veng veng a, mahse, ka duhzia leh a ruka ka lo thlir țhin erawh ka hrilh ngam chai si lo. A hriat loha thlir duh viau si khan a bul hnaia ka awm chuan ka buai a, sawi tur ka vai leh ruai țhin. Tihpalh thila kan taksa a lo intawh palh ringawt pawh kha nuam ka ti veng veng a. Ka thlir a, ka en a,mahse, kan mit a intawh changin ka zak a, ka mit ka lasawn leh țhin. Chutia hrilh ngam ta tlat lo chu Kha sikul ka chhuahsan thleng khan ka star tluan ta țhak a.

Ka star ve kha tawn hnu kha chuan, "Ngaihzawng chu i duhzawng ngei ni rawh se." tia ka lo țawngțaina țhin chu a duhzawng kha he hmeichhia ngei hi nise ka ti fo țhin! Ni e, kha hmeichhia ngei mai kha ka rawlthar rilru luahtu a ni, ka star ve kha!

20 November 2017 | Thingdawl

Android Apps download turin hetah hian hmet rawh.





No comments:

Post a Comment