Labels

LightBlog

Sunday, 19 November 2017

NUNHLUI KHA KA ȚAHPUI


Model : Mami Clark

Ziaktu: - H.Zate, Hmar Rûn.

- hzate.in


Kha kum, a ni nena kan intawn kum kha ka tan theihnghilh a har a, ka tana hun hlu leh ka hriatreng tur a ni fo tawh ang. 



  A ni nen hian Sikul hmunkhatah kan kal a. Kei 12 niin, ani chuan pawl 10 a zir ve thung a. inpawl rual ni lo mahila,  inkawm țhin kan ni a. Ni tina inhmu a, inkawm ta chu karah inngainatna a lo piang a. Ni e, chu inngainatna chuan ka lo rin ngai loh leh beisei ngai reng reng loh, kan inkarah hmangaihna a lo piantir ta si!


Board Exam tur kan nih avangin Hostelah ka awm a, a ni pawh a lo awm ve a. A ni, chu hostelah chuan kan inkara hmangaina, kan thinlunga inphum ru chu a rawn par chhuak ve ta a!


Min bêm laia ka lawm zia leh ka hlim si ziate kha aw! Zak si, lawm si, hlim veng veng, mahse, hmeichhe awlsam leh zuamawm tak anga lan ka hlauh vanga ka duh ve thu hrilh lova ka chhan loh chhung khan keimah hi ka hrehawm a. Min ngaihsak chhunzawm tawh loh mai hlauvin ka țawngțai ruai țhin. Mahse, ka țhiante'n , "I chhan vat chuan a ngainêp palh ang che." an ti tlat si a, duh leh ngaina em em chungin ka han innghahtir ta a. Ni e, ka innghahtir, mahse, keimah zawk hian ka nghakin, ka nghakhlel zawk ni ber hian ka hria!


Zanah a rukin kan inhmu a. Hun rei tak a lo nghah tawh chu a chhanna pein, hmangaihna chu hmangaihna vêkin ka chhang ve ta a. Kha zana a hlim hmel leh a mitmenga lawm tih hriat ngawih ngawih a meng de sawr te kha ka tan hian ava han mawi tehlul em! Chu mai a ni lo, zak tih hriat taka min han kuah ve te kha ka tan a hluin nuam ka ti ngawih ngawih.  Mi te hriatah kan inngaizawng ngam chiah lo, kan țhiante țhenkhatin an hria tih mai loh chu. Chu kan tleirawl hmangaihna chu kan karah chuan kan vawng dun reng a, mi dang tana a vul kan phal lo. Hmeichhe dang a biak țhat hlek pawh ka ngai thei lova, Hmeichhe dangin an biak pawh ka phal hek lo! Ka ngainaa, ka duh a, kan inhmangaihna a zual telh telh a, kan zep thei lo tulh tulh mai si.

 Hun liamin ni a liam a, kar liamin thla meuh pawh a vei ta. Kan kara hmangaihna pawh zep rual lovin kan țhiante'n an hria a. A rûka kan inhmuh țhinte pawh a thleb lohna tur kan zirtirtute beng a lo thleng ta. An lawm lovin an thinrim kher mai. Min zilh a, min hrilh a, ti tawh lo turin kan intiam a, mahse, kan inhmu lo thei si lo,kan inhmu leh zel lawi si.


Exam-ah kan tichhe lutuk a. Kan zirtirtute beisei ang kan pha lo lutuk chu kan nu leh pate an ko ta hial a. Nu leh pate hmaah kan awm dan zawng zawng, kan nihna, kan inngaihzawn dan leh a ruka kan inhmuh țhin dan nen lam an han sawi chu kan hmaah hian darthlalang an dah hi a ni hawt a. A zahthlakin hnar a lian duh ngei mai. Theih chu nise khuk chem chema khuk ral daih mai kha ka duh a, mahse, ka lo khu ral thei si lo. 


Kan chhungte chu an lawm lovin an zak khawp mai a. Ka hrethiam, beiseina sang tak nen lehkha min zirtira keini lah an beisei loh lamah hmangaihna tuipuiah kan lo pil mêk a ni si a.  Kan nu leh pate ve vein ințhen turin min ti a, min vau a, min ngen a, thurawn min pein, thupek min pe bawk! "umm" tia kan chhanna chu keimahni pawhin kan ring lova, kan chhante pawh khan an rin ka ring bik chiah lo!


"Aw" tia kan chhanna chu, "aih" tih nen a thuhmun reng a. Kan inthlah thei lova, a ruka inhmuh kan bang lova, a rukin kan la inngaizawng reng a. A tawpah chuan, keimah zawk chu min hnawt chhuak ta a. Kan i kara hmangaihna vang chuan hmingchhiat leh mualphona zawng zawng ka tuar a, ka tuar chhuak vek a ni ber mai. Ka chhungte'n min vuain min hau nasa a, mahse, ka kiansan thei chuang lo. Ka hrehawmin, ka tuar tlawk tlawk reng mai a ni.


Mahse, chutia atana rinawm taka hrehawm zawng zawng leh mualphona zawng zawng ka tawrh lai chuan țhenna thu min hlan a, ka lak ațangin a inla hrang ta tlat mai a. Mak ka tiin na ka ti. Mahse, tih theih ka nei lo. "Ka hmangaih lo che!" min ti mahse, a mitah a lang a, min la hmangaih a ni tih ka hmu a, ka hai lo. A chhungte nawrna vang a nih tih ka ring a, ka hrethiam a, min țhen pawh demna ka nei chuang lo. Min la hmangaih zia hi he ka thinlung hian a chiang a, min hlat a tum poh leh a ni pawh a na ve niin ka hre țhin.

Chhungte hran vangin kan inkar hmangaihna chu tunah par chhuak lovin ințhen mahila, ka hmangaih a, ka theihnghil thei lo. A ni nen chuan mi hran niin, duhthusam hran hran tipuitling turin kawng hran kan zawh ve ve tawh a. Mahse, He hmeichhe dawrawm, nunnem leh awm nem hian kan nunhlui kha ka țahpui a, kir rel lo tur nunhlui kha ngai chungin kan inkara hmangaihna, hmelma leh dotu awm lova a parchhuah ve hun tur chu ka la nghak reng a. Ka la nghak fan si!



18 November 2017 | Thingdawl



1 comment: