Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Monday, 13 November 2017

ȚHA SENSIER

Model: Puii Edith Khawbung
Thlalatu: Muona Infimate

Ziektu: H.Zate, Hmar Rûn.
- hzate.in
A hmel ka hmu tir a inthawk rêngin ka lungrilah a sipliem a, ama ka ngaituo a, ka mitthla zawng ringawt khawm hin hlimnain ka sip hlak.
Khawvelah hin ama neka țha ka hmu naw a, ama tluka țha khawm ka hmu zo nawh. A no. khawm 'Țha Sensier' ti ngatin ka sie a. A țhatna le felna hin a zûn zamah sawl ang ami'n uoi/tul tir a. A laka inthawka hlat tuma ka bei nasa po leh Chirduma pil angin ka pil inthuk ting el a nih.
H.S.A in hun pawimaw em em a hmang a inthawka inhre le inhmu kan ni a.  Kan vawi khat inhmunaah ka lungrilah hin hmun pawimaw tak changin, a chang el khawm ni lovin a hluo a, a hluo el khawm ni lovin Ka lungril Lalnu a ni dêr tah! Kan inchibai malama innui seiha a mi mel khan a mi sai nawk ngai lovin ka lungril, ngaituona le ka taksa po po hi a lakah a luongliemin a lo thamral hman der tah. Chu el khawm chu a ni nawh, ka chibai char khan pieng dingpa nu dingin ka thlang a,  damsunga khumpui ințawmpui dingin ka lo thlang fel tah.
 Nunghak fel le var a ni bawka inbiekpui a'nhawiin a kawla hun hmang a'nhawi tak zet.  Ngam le ngam lovin, ka huoisenna po po bakah ka ruolpa huoisenna leh inthuomin a no. ka hni a. A mi pek laia ka lawm zie kha aw! Hril hin a fie zo naw a, ziekin a chieng zo bawk nawh. Ka lawm veng veng a, ka lawm dan hi chu a dawngtu, kei hin ka hrietchieng tak a nih! A ni ngei annawm, tu mi hrietpui si lovin lawm leiin ka'n nui ver ver a. A kawla um inhawi ka ti a, ka hlim veng veng el a nih. 
Inhmu ran thei a ni bik naw a. Mani umnaa kir dinga kan ințhe laia ka lungrilin a ngai zie kha aw!!
Zan khat kan inbiek naw met khawmin ka ngai a, ama biekna hin ka hun awl le ka hun țha ka hmang zo a ni deu tak.

Mi dang ta dinga a mawi le mawi naw ka hriet naw a, ka ta ding chun 'Țha sensier' a ni a, a ta dingin hi hla, 'ȚHA SENSIER!' ka'n hlan rawp hlak 
 I sakhmel a țha chuong ngei,
A țha chuong ngei, a țha chuong ngei!
Leng tin khum zo i țha chuong ngei,
Chuoi lote'n vul zing la!
I sakhming a mawi chuong ngei,
A mawi chuong ngei, A mawi chuong ngei.
Leng tin khum zo i mawi chuong ngei, 
Chuoi lote'n vul zing la!
Pieng zie  reng a mawi chuong ngei, 
A mawi chuong ngei, a mawi chuong ngei!
Chawnban, fuke , iengkim a mawi,
Chuoi lote'n vul zing la!
Ka phal nawh, val dang ta di'n,
Val dang ta di'n, Val dang ta di'n,
Mi tawna i vul ka phal nawh.
Chuoi lote'n vul zing la!
Țha sensier, i mawi chuong ngei,
I mawi chuong ngei, i mawi chuong ngei!
Ka lung i dum zo ngei el ie,
Chuoi lote'n vul zing la!

A hmel țhatna le mawina hi chuoi nawk el dinga pieng chu a ni ve si maw! Hieng ang lawma țha hi chu siemtu khawm hi a vul hun sung suksawt deu sien țha ding. Chuoi ve lova vul zing dingin ka dit a, chu ding chun ditsakna ka'n hlan rawl hlak! Ka  'Țha sensier' hin ka lungril po po a hluo a, ka lungril lalnu a ni chieng hle. Kan inbiek a, kan inpawl a. Kan inhrietchieng pei a, a fel zie ka hrietchieng pei a, a zûn zamah thamralin ka pil inthuk zuol pei a. 
Chu nuhmei var chun a sung ding le a himna ding a zawng a, a'nhmai nawh. A fel, a varin mi biengbiek a thiem a, mi tin el hin biek inhawi an tiin ka hriet hlak. Mi lakah ka suong a, ka ruolhai lakah lem chu ka lo uongpui ve vieu hlak.  A mi hrietchieng a, ka hnam hming a hriet meu chun ka lungrila thil um leh a'n mil ta nawh. Keiin damsunga Puonthuo pawtțawmpui dinga ka lo thlang laiin ama ruok chun ngaidan dang a lo nei si! "Ka pute ding i ni chu!" ti malama "Pute" a mi ti char khan hlo nuor ei tawk a a chuoi rawi rawi ang hin ka lungrila ka beiseina le hlimna po po chu chawp le chilin a chuoi nghal rawi rawi a.
13 November 2017 | Guwahati
( Hla hi hi story le inhme dinga ka ziek/phuok a nih. )

No comments:

Post a Comment