Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Thursday, 7 December 2017

ȚAHNA KRISMAS


Ziaktu:- H.Zate, Hmar Rûn

- www.hzate.in

[Ni 31/(oct) . 2013]

Nipui lum bur bur, awm mai mai pawh a thlantui far zawih zawih theihna hunin mual a liam a, Furpui hun chhia leh diak, Thosi leh Ramsa tinreng ninhleina hun pawhin damte’n Kawl ah mual min liamsan tawh a, Khawvel chuan hun thar, a la hmuh ngai reng reng loh tawngin, Sappui tawng a ‘Ber’ thla intanin, Thlasik rim a rawn nam tan ta a. Zirlai tamtakin an zirna hmawr an bawk tan a, Nu leh Pa pawhin thlansaphul kai a, a-sur-a-sa hnuaia an thlawh chhuah chu an sik tan ta a. Chu hunah chuan a ni Nu leh Pa nih nawm lohzia leh Nutling Patling nih harzia chu a rawn lan tak thin ni.

He hun nuam leh hlimawm em em, India a Kutpui  hun (Festival Period)  tia an koh hial mai hi, a nawmzia hrelo an awm emaw chu. A Mi’n an hril Siknieng mawizia te hi tukhaw hrilh ngai lovin thlanga Tlangsam te pawhin an hria a. Chumai pawh a la ni lo , a khi chhak tlang a Tuahthing pawhin a parmawi a chhuah a sin?! Tlangsam a par a, Japan hlo pawhin Lal piang chibai buk hman loh hlau niawm fahranin dai ah par a lo chhuah ve bawk a, chunga Sirva hram thiam te pawhin hram thiam tawp chhuah in an lo ri ve chel chul bawk. Lal thar chibai buk turin mi tin an inpeih tawh.

Chutihlai chuan, tukhaw hriat lohin Nu leh Pa thenkhat chuan an fate thuamhnaw tihsak theih loh hlauvin Tlangram chhengchhe tak atangin  an Buh leh Bal leh Thlai, chhawchhi le La te phurin, Neihlung khawng tak meuh meuh in ‘Ka fate tal’ ti a in ngaihtuahin, chhungril a mittui tla rawng rawngin an fate Mi zinga an mawi lo bik tur  chu ngai-ngamlovin, an thil phurh an hralh a, thil an han lei a ‘Hei hi Bawiha, Hei hi Bawihi’ an ti zo vek a,an tan a daih tawh lo. Chu hunah chuan a ni, Nutling Patling nih a har tak thin ni. fate pawh Thuam leh par tha a thuam zo lova mahni inthuam thu lah awm suh. Khua an han thleng a,an faten lawmtakin an lo dawngsawng dawn emaw an tih laiin “Hei chu ka duh zawng a ni lo, Ka thiante ta ang a sin ka duh” ti a Faten an neih phak loh ani tih hre hauh lovaa an thiante Kamding fate thil an han awt phei chu an vanglaia engmah ngaituah lova an awmlai te an ngai rawng rawng a, an tan chuan he ni lawmawm hi ‘HLIMNA KRISMAS’ ni tawh lovin ‘TAHNA KRISMAS’ a changzo tawh thin.

Krismas hlimte a hmangza turin khualkhua atangin chhung tin an rawn haw khawm a, Zirlaite pawh an zirna zovin an awmna chu Khawpui eng ang pawh nise ‘Krismas chu Mahni Khua ngeiah’ tiin hman ata an Thlatute chena ropui an lo relna ramah chuan hlimtakin Sianglawi zai an rel a. Hnathawk leh Eizawnna vanga hmun danga awmte pawh Mahni Khua ngeiah tiin ‘ I pianna ramah kir leh rawh’ ti niawmtakin an awmna, khawvel intlansiakna ram chu kalsanin an khua an pan tal tal a, rilru ah

“ * Lal pian hun pangpar a vul leh ta,
Thinlai mu hnu lunglen a kaitho ve”


Ti a sa rat rat chungin Nau piang lawm turin Kil tin Kil tang a tangin an kalkhawm a. A thenin an thiante an rawn hruai a, a thenin thianlo deuh, Thlasik thla-eng hnuai a “Dite, Nang chauh lo chu” tih pui tur te “ka thian a ni” tiin an rawn hruai ve bawk a, thenkhat erawh chuan ngampa deuhin “Ka kawppui tura Ka thlan anih hi” tiin an rawn hruai ve bawk. A then chuan Khawpui aia Khawte leh Thingtlang Khua-a anawm zawk zia hria-in an Pi leh Pu-te Khaw hlui-te an pan ve bawk a. chhung tin hlimtakin an intawkkhawm a, Tu dang ngai lova  an chanchin an inhrilh lai chuan kilkhat-ah erawh, 

 “ Hun leh Kum inherliamin,
A mileng Lal piang lawm turin,
Kan Vangkhua-ah siang an lawi,
Sianglawi zai I rel ve silo maw, 
Aw ana, famkhaw run I rem mai hi”

Tiin mittui far zawih zawihin an ngaih, awmlai lunglian nunrawng hrang vang a fam chang ta te ngaihna ti tharin, an lo tahpui a, an tan chuan he HLIMNA KRISMAS hi TAHNA KRISMAS  a chang lo thei lo.

“Hlimte a nuih za laite dawnkirin lungreng a ai thei mawlh lo”
“ Tap ruaiin zai ka vawr nawk leh ṭhin,
Enchimloh Parte, I sulhnu hlimthla
Ka thlirkir chang hian,
En teh, a mi leng siang anlawi,
Kan vangkhua-an,
I rel ve silo, sianglawi zai”

An(Thi ta te) thiante hlimtaka an lenglai an han hmuh phei chuan Fam hnu ngaih a tithar a,

“ En teh Lal, I Lenrualte
Hlimte’n an nui za, tu dang reng ngailote’n,
Run siang an lo lawi,
I Rauthla talin lo lawm la” 

Ti a tap-hla remlo thei anni ta lo. ‘Ni e’ ngaih ana em ani Fam zunleng hi zawng. Sakhmel tawng leh tur, Hmangaih thutiam sut a thenzai rel mah-in na an ti a, Sakhmel tawnni awm tawh lo tur a thenzai rel a, Piallei thuah-riat hnuaia Sakruang buanlei chang mai tur hi chu ana ani.

Kilkhat-ah thlirna danga I thlir leh chuan thil dang I hmu leh ang, hetiang te hi chu an saunṭek( sound track) a dang deuh a, mi tinin kan tawh thin ani. ‘Mipa in Mipa ka ni tiin Nu Hnute hnek an bansan chauh emaw kan tih laiin Hnute dang an zawng a, Hmeichhia lah duai biklo, Barbie khalh an bang chauh maw kan ti a, a Barbie tu tur an zawng bawk a’ . hetiang reng reng a Khawsa Hringmi leng zingah hian Krismas hlimawm hmang tur a intiam tamtak an awm a, ‘Urlawkzan chu Dawhthlak-zan’ an ti a, ‘a pianna ngeia hman tum pawl leh hman tir tum pawl lah bo lo’. Hengho zingah hian Thlakaw hnu-ah Thlarau thianghlim nilovin Remruata fate hi a piang duh khawp mai’.

Chutiangho zingah chuan thenkhat chuan,

“ Hlimzai rel a har dite, I tel lo chuan,
Ami-leng a-thiangten an leng, Kei riangte’n,
Khaw nge I awm,Min hnemtu di,
Ka kiangah lo leng ve mai rawh,
Hlimte’n Krismas hmang ve turin”

Tiin Di ngaiin an lo kur diam diam a, ‘kur diam diam, kur diam diam’ ti-a awih an mamaw kher lo. Midangin hlimtaka Krismas an hman lai khan an ni zawng Thlasik mei lum aipui tur an nei ve silo. Thianten kawppui an nei far a, a nei lo bik nih chu riang ngawih ngawiha inhria in, an hlim thei mawlh lo.

  “Zaleng dang hlimte’n Lal piang an lawm,

I tel ve lo, dite, lunglawm a kim lo”

Tih chauh lo chu an tan sawi tur a awm mawlh lo a, hengho tan pawh hian,

  “* Lal piengni kawla  liemhnung,

A hung suok nawk tah,

Bethlehem ngaina chulhnung

Par-ang a vul nawk tah”

  “Lal pianni kawla liamhnu alo chhuak leh ta, Bethlehem ngaihna chulhnu, par-ang a vul leh ta”

Tia hlimtaka Krismas hman chu Vana rah ang mai niin, Midang tana HLIMNA KRISMAS  chu an tan  chuan TAHNA KRISMAS a chang tawh zawk thin.

“Aw, Khawvel hian Hrethiam se,

Van Lal Hmangaih ropui hi”

Tih thu hrethiam lo leh

“*Isarel ten an hnawl a
An paih hnu kha,
VanLal Reng ro pialral lunghlu 
Ka chhar ta.”

Tih awmzia hrefiah zo lo tan chuan TAHNA KRISMAS a chang dawn reng a ni.

Krismas a nih vangin Thuamhnaw thar neih tur a ni lova, Thalai te pawhin Nu leh Pate Lu tihai khawpa Thuamhnaw manto ngen lovin, Pheikawk Ke-artui sang em em mai, manto deuh bun a, kawngchhuk  kal dawn apiang a, CHhemtheinu ang a hnungzawng a tawlh a midang vawn kher ngai lovin Ke-artui hniam deuh, man tlawmte pawh bun ta zawk ila, an chhiatphah a rinawm lo. West-Coat kher kher emaw, Kawrchung(Coat) kher kher neih tum lovin, inhmehlo baksak a chawn puar pawp khawp a Beatle Shoe bun kher lo pawhin Krismas hi a tling tlak theih tih hi hrechiang ila, Krismas a nih vanga Thuamhnaw thar neih kher kher hi tumlo ila, Kohhran pawhin Krismas a ni tih vang ringawtin mi harsa te ti harsa leh zual thei ti lo bawk ila, Krismas a rawn ni a, kan ngaihlai mual lo liem ta te ngaia indawmkun mai lovin an tan hlimtakin Lal fak zawk ila, ngaihzawng-te awm loh vang a khawhar a lungleng mai lovin, A pianna ah kher hman tum lovin, a pianna ah kher hman tir tumlo bawk ila, Thlakaw hnu ah Thlarau thianghlim nilo Remruata Fa kha a piang tawhlo bawk ang a, Kan lawm leh Krismas kan hman chhan ah chiang ila, Khawvel chhandamtu piancham lawm kan nihzia hria in, ama tan Kan nun pum hlan ta zawk ila, ami’n an lo hril TAHNA KRISMAS hi HLIMNA KRISMAS a chang ngei ang.

Tranlated From Hmar On 1st November 2013, Friday

No comments:

Post a Comment