Labels

LightBlog

Saturday, 13 January 2018

I-LEAGUE A HMUNAH NGEI


Ziaktu: H.Zate, Hmar Rún.
- www.hzate.in

Kei leh Hmaa Hauzel, Aizawl FC Stand ah

Ka Aizawl zinlai nen a inrual vangin leh karleh lam thlenga tihtur hmabak ka la neih vangin vawiin, 13 January 2018 khan i-League chu a hmunah ngei ka en ve ta ngei e. 
A tir chuan en ka tum hran lo, Mahse, Lalvansanga, Editor, MZP Chanchinbu leh The Zozam Times a thawk mek chu MZP Pisa hawn hun tur zawtin ka call a, a hun tur min hrilh pahin i-League en tura an kal mek thu a rawn sawi zauh a, Tichuan, Ka thlenna pa, Salem veng pa fel tak mai, Pu Ramṭana Khawlhring-in, "i duh chuan va en ve la." tia min sawihmuh takah chuan en tur chuan ka insiam a. Amah, Pu Hmangaihhlima Hauzel, (Hmaa Hauzel ) , Sport Writer, The Aizawl Post & DDK Aizawl chu Call-in Ticket min ngaihtuahsak turin ka bia a, a niin lungngai lo tura min hrilh hnu chuan ka chhuak ve ta a. A thlawnin min la pe zui ! Ka va lawm tehlul em!
Kawngah Lalvansanga Pautu nen intawkin a niin min phur a, Mualpuikawnah Hmaa Hauzel, RFa Chawngthu te nen inhmuin kan inchibai a, Pu Hmaa chuan Ticket min pe a, Kan chhuak chho ta a. 
R Dengṭhuama Indoor Stadium hnuaiah Motor kan dah a, RG Stadium, Mualpui lam pan chuan kan kal ta a. A taka ka vawi khat hmuhna a ni a, a lo ropui narawh e. Mahse, ropui ka ti lo! Pawnah chuan TV Channel lamin Live a an pekchhuahna tura pawimawh an Motor chu an lo chhawp run mai a. Keini ang duang, thingtlang tlangval tan chuan hmuhnawm thlira thlir tham a ni nghal hawt mai. 
RG Stadium Mualpui kawt

Stadium kan lut dawn a, Venhimna lam an uluk khawp mai a. Kan ṭhian hova gate pakhata luh kan tum a, mahse, a lo theih der lo. Ka ṭhian dangte chu Gate 2 ah lutin kei erawh Gate 3 ah ka luh a ngai thung! A mikhual ber chu a hrangin ka kal ta a nih chu. Mahse, ka zâm hran lo, a chhan chu Mizo ṭawnga biak theih an ni veka bakah Aizawl fc  inkhel en tur ka ni tlat!  Stadium ah chuan ka lut a, wash Room ah lutin ka zung te te a. Mizote ta, mizote cheibawl ni awm rengin a faiin hmuh a nuam. Ka chho leh a, Inkhel en turin ṭhutna lam ka pan a. Aizawl FC standah keimahin ka ṭhu a, mahse, mi dang chu an tam tho. An ri le lu nghal mai a, a nawm hmel khawp mai. Aizawl FC Stand lamah keimaha rei vak lo ka ṭhut hnuin Pu Hmaa Hauzel a rawn lang a, kan ṭhu dun ta a. Ka thaw a vengin ka thla a muang huai mai! Ka tan engkim kha hmuhnawm a ni a, zawhna ka ngah a, hriat loh lah ka ngah!  RG Stadium ka luh vawikhatna a nih mai bakah I-League a hmuna ka en vawikhatna a ni bawk a hriat chak ka ngah khawp mai. 2nd I-League bak a hmunah la en ve hek lo le! Hriat châk ka ngah ang aiin zawhna ka ngah lo mai zawk a!
Rei fang kan ṭhut hnuah Rfa, Vansanga leh Nangsawmthanga ( Sawmtea ) te awmna lamah kan insawn thung a, a hlimawmin a nuam khawp mai.
AIZAWL FC INKHEL A ṬUM HNIHNA A TAN
13 January 2018, Inrinni tlaia ka inkhel en hi Aizawl FC inkhel a hmuna ka en ṭum hnihna a ni a, a vawi 2na erawh a ni lo. Mahse, I-LEAGUE an khelh hnua ka en vawi khatna a ni thung. I-League 2nd Div an khelh lai khan District Sport Association Stadium, Silchar ah khan ka lo thlir ngun ve malh malh tawh a. Aizawl FC fans damlai zingah ka la tel fan a ni ber e! E taka, khami ṭum khan Kan ṭhianpa, Malsawmthang, Sakawrdai chu vanduaiin kha stadiumah khan a nun a chan a, a pawi takzet! Kan ui a, Hmar Students' Association, Silchar Branch a kan memberpui niin kan ui takzet! Mahse, kan chunga khua rel kei ni lo dan rual  ni si lo!  A pualin HSA Silchar te khan Tournament te an buatsaih a, Mizoram lamah pawh MFA leh ADFA lam pawh khan a pualin programme an buatsaihin ka hria. An fakawm khawp mai. ( Ka sawi sual palh a awm chuan min hrethiam se. )
Aw, lung te riau riau a leng mai dawn a lawm le.  DSA Stadium khat ve mup khawpa football ngaina ten 2nd i-League  han thlir kha chu a nuamin a hlimawm a. Khang hunlai khan, "Engtikah tak kan ramah I-League ngei en ve ang maw?!" tih kha a tak a thlen ring tak tak lova kan beisei ṭhin kha a ni!    Chuti chuan, 2nd div an khelh laia ka en bâk kha chu i-League ji a hmunah ka la en leh lova,  13 January 2018 kha ka en leh hmasak ber a ni.

INKHEL CHU!
Aizawl FC in Chennai City FC an mikhual a, mikhual an duat tehchiam lo! Si hnih faiin an lo sawp zêk mai. Inkhel en a hmuhnawm a, mahse, a aia hmuhnawm erawh beisei tur a la awmin ka hria! Inkhelh hrim hrim kha Aizawl FC in an thunun a, mikhual lam pawh duai zek zawk erawh an ni chuang lo.  Player-te game khelh a hmuhnawm a, thlirtu tan pawh thlir man awm tak a tling. 

FANS LAM
Mipui kan tam a, amah Nl Bd-i'n a puan danin mipui sangthum chuangin a hmunah kan thlir a, fans leh supporter te an fakawm. Fans hruaitute lam an fakawm a, mi tihphur an thiam. Mexican Wave (Hmaa min hrilh dan) pawh a hmuhnawm.  Fans lam kha an hmuhnawm zawk lek lek lek. hihi

STADIUM A ROPUI MAHSE A ROPUI TAWK LO
Kan Stadium, RG Stadium Mualpui chu ropui viau mahse, a ropui tawk lo!  Ni e, football ngaisang lo ram chu ni ila a awm tawk thova, mahse, Hetiang khawpa football ngaihsanna ram nisi, kan sawrkar chak tak hnuaiah kum heti chen hnuah pawh a la pum thei lo hi a pawi takzet. A pawi tih mai lo chu sawi theih a awm si lo,keini ang duangte chu lo iak iak mahila an ui bauh pawh kan tluk awm chai si lo!

RG Stadium, Mualpui

Mahse, Kan ṭhenawm state Assam Sawrkar, 'sawrkar chak tak' tia inchhal ngai lo mahin, hman hmanah êng hnuaiah, zanah inkhel min entirt thei si a. Mahse,hmasawn lo erawh kan ni lo, Awh namen lova kan awh hnuah Lammualah kan  nei ve hram a, hmun dangah pawh hei kan neih belh mêk zelin, neih belh zel dawn pawhin a lang! 


Inkhel a zova, inkhel entu mipuiin an tihhnawk an thian sap sap hmel hmuh kha a va nuam tehlul em! A Mizo in a kristian hliah hliahin ka hria. R Dengṭhuama Indoor Stadium a motor lachhuakin Vansanga bawk chuan min phur a, kan haw ta a. Aizawl ka châm ve chhungin Inkhelh a la awm a, ka en hman chuan la enho ve zel tura intiam pahin kan inthlah ta hlawm a!

Ṭhiante hi an hlu a, 'ṭhian' hian rethei leh hausa a thliar lova, kei pawh he ṭhian zarah hian ka kawm phak loh tur ka kawm a. An ni zarah a thlawnin I-League a hmunah ngei ka en theih phah a, an chungah ka lawm takzet! 

13 January 2018 | Aizawl 

No comments:

Post a Comment