Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Sunday, 14 January 2018

LIAM TAWH HI A CHÂM RENG - 3



Ziaktu: H.Zate, Hmar Rûn.

- www.hzate.in


Part - 3


Min hawsan hnu chuan ka intifai a, ka intihfai zawh chuan mu turin khumah ka lawn a. Ka phone ka en chu a thuthawn hi a lo awm a. A tana ka inhlan leh a tana ka vul vanga lawmthu min hrilh pahin rinawm tlat turin min ngen a. Darkar khat dawn WhatsApp a kan inbiak hnu chuan mut zai kan rel ve ta a. Ka han mu chu ka muhil thei lêk lo mai a, ka rilru-ah thu tam tak a rawn lut zut zut a, amah ka vei em em ringawt mai a ni.

'Engvanga a tana khatianga awlsama inhlab mai nge ka nih? Min ngainêp viau mai ang em? Min phatsan leh si ang em? tih vel te ka rilruah a lo lut a. Ka ngaiin ka thlahlel ngawih ngawih mai bawk si. Keimah hi ka inhrethiam lova, ka awm dan zawng zawng hi mak ka ti a ni ber mai a ni.

Ka tal ka tal a. Ka hriat loh hlanin ka lo muhil a. Ka harh meuh chuan zing lam dar 5:30 a ni der tawh. Ka phone ka en chuan a thuthawn a lo awm a, "ka hmangaih che. Rinawm takin aw! Krismas chibai le!" tih hi a lo awm a, "kei pawhin ka hmangaih che. awle, ka rinawm reng ang." tih chu ka thawn ve ta a.


Krismas ni chu hlim takin chhungkaw kimin kan hmang ve a. Mahse, zanah erawh min rawn biaa, lenchhuah pui atan min sawm dawn emaw ka tih laiin, "zaikhawm ang aw." a rawn ti daih mai a, mak ka ti ang reng khawp mai. Egmah ngaihtuah chiang lo chuan, "khawiah?" ka ti hu a.

"in kohhran zaikhawmnaah"

"i duh tak tak a maw?"


"duh lo ila ka sawi nang aw. ka lo kal ang aw?!"

"i peih phawt chuan le"


"awle, in inkhawm ban hunah min lo hrilh la ka rawn kal ang."

"awle, muah!"


"muah!"



Kan inbiak zawh chuan a duhzawng leh nalh a tih dan tur ber chuan ka insiam a, ka inchei mawlh mawlh a. Zan dang ai zawngin ka inulukin ka hria. Inkhawm tur chuan ka chhuak a. Inkhawm lai chuan engmah ka rilruah a awm lo amah chauh lo chu. Inkhawm kan bang a, thingpui sa ver vawr kan inzawh chuan ka call a, "lo phei tawh la." ka ti a. "awle. In biak in kawtah min lo nghak la," tih pahin phone a dah a, Kan biak in kawt kawngpuiah ka lo nghak a. Ka nghahhlelh vang nge ni lo thleng har ka ti riau mai a. Khua a vawt ve vur bawk nen a hrehawm lek lek a ni. Mahse, duh ber nghak ka ni miau a a zie deuh. Chutia rei fang ka nghah hnu chuan a rawn thleng a, kan inkuah chawt a. A thim laiah ka hmui min fawp zauh pahin kan zaikhawmna lamah chuan kan kal ta a.

A hmun kan thlen chuan mi an lo awm ṭhap tawh a, an zai tui hmel khawp mai. Kan lut a, a hnung lamah chuan kan ṭhu a. Ṭhian ṭhenkhatin min hmu a, mak an tih hmel. Anni aiin ka chhungte'n zaikhawma ka tel ve ta mai kha mak an tih hmel zawk. Ngaihtuah chiang lova min sawmna ka lo aw liam puat kha ka inchhir leh hnuhnaw. Kan zai a, hla dang an la a, kan sa zel a. Duh ber bula awm ka ni bawk a, nuam ka ti ngei mai. Kan inkarah ka kut chu a hmer leh ṭhin a, min thlah reng a tum lo. Min thlakhlel hmel hliah hliah hian  ka hria.

Khang hun kan hmante kha a nawm vang nge nina rei lo riau hian ka hria. Keimah vangin ruai pawh kan kohhran lamah a rawn ṭheh a. Krismas chu kan kohhran lamah a hmang reng ang vel a ni.

Kumhlui thlahni a ni a, Ka tunhma nun ang chu nise nuam tinreng chen a, khawvel chen tumin ka ṭhiante nen khawi lai tlang remchangah emaw kan phusa nasa viau ang. Mahse, A ni nen erawh a dang tlat. Tlai ni tla tur chu kan thlir liam ngei mai a. Mahse, a dang tlat. A nun a buai thu leh a nuna thil inthlak a tam ziate, a tunhma nun kalsan a tum laia kei min tawn thute, urlawk zana kan awm dana a inthiam theih loh zia leh hrehawm a tih thu a sawi a. Keimah lamah chuan inthiam loh phah lo turin ka hrilh ve ngial a. Mahse, keimah ringawt ni lovin ama nun leh Pathian inkar lam a nih thu a sawi a. Kei pawh Bible chhiar ngun turin min hrilh a. Ka aw ve tawp tawp ringawt a , mahse, ka zawm pawh ka ring chuang lo. Kan haw dawn chuan an inah kala a chhungte hmuhpui turin min sawm , ka nial viau naa, "min lo nghak vek ang." a tih tlat vangin a sawmna chu ka pawm a, an in lam pan chuan kan kal ta a.

An in kan thlen chuan a chhungte an lo awm ṭhap a. A nu, a pa, a pi leh pu, a farnute leh a unaupa te an lo awm a, fel leh hawihhawm takin min lo bia a. Min chibai pahin an insawi sap sap a, an mo ni mai tur ang mai hian min en a, ka zak zawk. Mahse, an felin an nelawm a, an chhungkaw boruak a nuam lutuk.  Chaw ei tura min lo nghah thu an sawi a, ka hnial viau naa hnial theih a ni lo. Sawi lawk leh insawm lawkna awm miah lova chaw ka ei ta mai chu mak ka ti a, ka inthlahrung khawp mai. Zak theilo min tih ka hlau si a, awm dan tur pawh ka thiam lo a ni deuh ber mai. A pa lah chuan, "kan monu tur chu" tiin duhsak em emin ei tur min pe lehnghal a. Mahse, a hnua a sawi leh danin, "ka sawm lawk che chuan i duh  ka rinh si lo, khati ang khan ka ti ta mai a nih kha." a ti a. An ruahman lawk vek a lo ni a, mak ka ti leh hnuhnaw.


14 January 2018 | Aizawl
chhunzawm tur..

No comments:

Post a Comment