Labels

LightBlog

Thursday, 15 February 2018

FIRST LOVE

Model : Melody
Ziaktu: H.Zate,
- www.hzate.in

Ṭum khat kum thar lawm tura ka nu chhungte khuaa kan zin chu ka tana hun hriatreng tur leh ka nun sawi danglam dawrhtu a ni dawn tih hre miah lovin hun ka hmang ve a.

Zan khat chu ka unaunu ( ka nu u fanu) chu a bialpa in a rawn rim a. A ṭhianpa, pa deuh mai nen hian an ni a. A rûkin pa ka lo ti em em a. Chumi zan chuan inhmelhriat tir kan ni bawk a, kan inbe tam vak lo. Mahse, a mawi tawk chuan kan inkawm ve tho. 

A tuka an rawn len leh chuan ka unaunu bulah chuan a bialpa ṭhianpa chuan min duh thu leh ṭha min tih tu a lo sawi a. Chu thu ka u hnen aṭanga ka hriat chuan ka lawm ve kher mai. Mahse, chhan dan tur pawh ka thiam lova, engtia dawnsawn chi nge pawh ka hre lo. Ngaihzawng la nei ngai lo ta na na na chu engmah hi ka hrethiam lova, ka ngaihsak thiam meuh lo. star te chu sikulah ka nei ve ṭhin a. Mahse, ngaihzawng tak tak ka la neih loh vangin ka ngaihsak ve vak lo.

Mahse, ka u  hnenah a lo sawi fova, chu mai bakah ka phone nambar te lain min bia a, thlum tak takin min duh thu min hlan ṭhin. Hmaichhanah pawh min hrilh ngun khawp mai. Kei hmeithai fa mai tan chuan a ni chu a sang ema a tak a nih pawh ka ring ngam lo. Chuvang chuan chhan mai ka tum lova, la nghah rih ka tum ta zawk a, mahse, Ka u in chhang tura min tih vang chuan engmah ngaihtuah chiang mang lo chuan ka chhang ve ta a.

Ka thlennaah chuan a rawn leng leh a, ka u chu a bialpa nen an inkawm a, kei chu Fela nen chuan kan inkawm a, ka kut min khalsak niap niap pahin thil kan sawi a. A ngaitein min duh thu min hrilh a. chutah chuan ,"Feli, ka hmangaih che!" tia beisei nei taka hmangaihna thu min fah chu, "U fel, kei pawhin" tiin ka chhang ve ta a. Chu zan aṭang chuan Ka phu loh nia ka lo hriat ṭhin tlangval tan ngei chuan vul ve a a tana rinawmna vawng turin ka intiam ve ta a.

Kan han inngaizawng chu a zeiin a fel em em a. Min ngaihsak thiamin ṭawngkam lah a thiam narawh, a lakah ka luangliam a, a zun hian min phuar a, min zem a zo ni ber hian ka hria! Min kuah paha min hmangaih thu min hrilh te hian mur chem chemin ka hria a, min fawh hmasak ber phei kha chuan ka hik chem chemin ka hria!

Kan khuaa kan haw hnu thleng pawhin kan inbia a. Mak deuh maiin Fela nen hian khaw khat kan ni a. Tunhmain ka lo hre ngai miah lo. Kha kan intawnna khuaah khan hunpui hmang tura kal ve tho an lo ni reng!

Zan khat pawh min be lovin a awm thei lova, min ngaiin min thlahlel a. Kei pawh rei lote chhungin ka rilru zawng zawng a luah a, ka thisen zungzam zawng zawng a fan zo ta. A lakah ka buai a, a ṭawngkam mawi takin min bual a a, a chet dan leh nunchang pa lutuk te chuan amah ngaihtuah veng veng tur hian min bual a zo ni ber hian ka hria. Ka hmangaih a, a tan engkim ka huam der tawh.

Kan inbiak apiangin min hmangaih thu a sawi chamchi a, hmangaihna thu min fah fo ṭhin. Min thlahlel a, min ngai hle ṭhin a. Kei pawhin ka ngai thei hle. Mahse, unau zinga naupang ber leh hmeichhe awm chhun ka ni a inleng ka la nei ngam lo. Chhunah ka hun awlah kan inhmu ṭhin a. A bike a min phurin hmun nuam, thawveng leh zalen tak takah te min kalpuiin kan leng dun ṭhin. Min duatin min ngaihsak thiam a, ka ṭhiante leh hmeichhe dangin min thik thamin min duat thiam a. Ka tana inpe leh min ngaihsaktu chu kei pawhin ka ngaihsak lo phal lo a ni ber mai.

Hun a kal zel a, Higher Secondary zirlai nih a, Chhuna sikul ban leh hun awl vela kan inhmuh mai chu ka duhtawk ta lo. Ni e, theih nise a kianga damchhung hun hmang tawh tura an ina lawi mai ka duh tawh. Mahse, ka la naupang a, a la theih si lo.  Ka thlahlel ngawih ngawih tawh a ni ber mai.
Kan inhmu ngun a, ka tana ui nei lo tan chuan ui ka nei lo telh telh a. Min fawpa min kuah a, a tan hian ka inphal rai ṭep ṭhin a ni.  Chhunah mai ni lo zanah pawh a ruka chhuahna remchang insiamin kan inhmu ta zeuh zeuh a. Nuam ka tiin ka hlim veng veng ṭhin.

Chhungte hauh hlau tak a chhuak ni siin a bula ka awm chuan ka hlim a, ka thla a muang hliah hliah ṭhin. Min fawhn te chu duhthawh taka fawh let loh rual a ni lova, min vawnna leh ka taksa a khawih chin chin chu a tan hian a hmin vek zel mai ni hian ka hre ṭhin. Mahse, ka serh khawih a tum erawh ka phal ngai lova, nupa nih hmaa nupa nun hman ka duh loh vangin chumi kawnga min hruai thei tura chakna min siam thei turin remchang ka siam duh lo. Khawih a tum ṭalh pawhin ka phal lova, min ngen ngial pawhin ka duh ngai lo. Pathian phal loh a nih miau avangin nupa nih hmaa nupa nun hman chu ka tum lova, ka duh ngai lo.

Zan khat chu kan inhmu leh a. Kan hlim em em a, kan inkawm melh melh a. Min fawp a, ka fawp let a. Mahse, sex min hmanpui a tum a, ka duh lova,ka ṭang ve ta tlat a. A duh ka puitlin thei chu pawi ka ti a. Mahse, a tan, ka pasal a nih hunah hmeichhiain a pasal tana thilpek a pek theih hlu ber hi pek ka tum vang a ni tih lah a hre si lo. Duhtawh taka infawpin kan haw ta a.

Hun a liam a, thla thum kan inngaizawng ve ta reng mai. Mahse, chutia hlim taka kan awm lai chuan ka rin loh deuh maiin, "Ka phu lo che." tia chhuanlam siamin ṭhenna thu min hlan ta mai a. Mak ka tiin na ka ti a, ka tuar thiam lo kher mai. A duh anga ka awmpui theih loh vang niin ka hria a. Pawi ti viau mahila, ka tana ṭha tur a ni a, bakah  Pathian ka ṭih a, a duhzawng kha ka puitlin thei lo a ni.

Ka hmangaih hmasa berin min kalsan chu na ka ti a. Ka tuar thiam lo hle. Ka dam loh phah a, ka nat phah kher mai. A ni lah chuan ngaihzawng dang a nei a. A hnu phei chuan ka ṭhiannu u nen an lo inngaizawng nghe nghe.

Min kalsan dan chu mak ka ti a, na pawh ka ti hle. Mahse, ka hawisan thei lova, amahbka theihnghilh thei si lo. Min rawn be fo ṭhin a. Mahse, a lakah nep taka lan ka duh lova ngaihzawng dang nei angin ka insawi fo ṭhin. Amah vang hian ka rilru leh taksa hi a na a. ka nungchang ka hlauh a, rilru damna'n zu hial ka in phah fo ṭhin. Ka duh a, ka hmangaih a, thlahlel bawk. Mahse, lo let leh tur erawh chuan ka duh tawh si lo!

Khang kan hlim ni tawite chhung khan ka tan ka nuna hriatreng tur thil tam tak min zirtirin min hnutchhiahsak a. Ka la tawn ngai loh hlimna leh lawmna min pein hmangaih neih dan min zirtir a, Hmangaihnaa thikthu chhiatna te nen. khang hun liam tate kha Ka la hre reng,  tun thleng hian ka la theihnghilh lova, hriatreng a ni fo tawh ang!


15 Feb 2018 | Thingdawl

No comments:

Post a Comment