Monday, 23 April 2018

I HATE 'KHIANGTE MOBILES'



Ni e, ka haw ve det. Mihring tungchho a awm hian huat zawng leh ngei zawng hi kan nei a, kei pawhin, Khiangte Mobiles, Kolasib a mi hi ka haw ve tlat.

Ka thiam loh pawh a ni bik chiahin ka hre lo, ka huat zawngin an awm ve a ni deuh mai!
Nia, a hma kha chuan ka lo ralkhat thlir mai mai ṭhin a, miin an sawi pawhin engah mah ka ngaihsak ngai lo. Mahse, ka tawn ve tak meuhah chuan ka huat thu leh ka ngei thu hi sawichhuak lo thei ka ni ta lo.

An ni vang hian ka pawisa tam tak a lo luangral a, ka sumfai leh a fai vak lo thlengin cheng sing hnih dawn chu an kutah hian ka thapral ta!! Keini ang duang, ni lenga ni sensa leh ruah sur hnuaia hna thawka cheng 300 vel awrh hlawh tana cheng 20,000 vel a hlut tur zia chu i chhut thiam ve maiin ka ring. Chuti ang zat chu an dawrah hian ka hmang ral tawh a nih chu!!!

A nia lawm, ka hmang ral ve chuang em mai!
Pawisa tlemte kengin ka nu tan, a khawih theih ve tawk phone leisak ka tum a. Dawr dangah ka luh chuan ka duh ang ka hmu lova, ka duh angin min ngaihsak ṭha hek lo! Chuti chuan, Khiangte Mobiles Bung chhak ami zawkah hian ka lut a, an thawktute'n zei taka min lo chhawnin, an nulate'n nui sang chunga min han  chhawn zet kha chu keini ang duang, bel val vala val ve satliah tan chuan min duh ta emaw tih mai awl khawp a ni. Duh chung si khan Lei loh chhan tur ka han zawng a, mahse, ka chhuanlam tur zawng zawng ka hmaah min hlihsak a, a ni, khami tlai khan  Phone cheng 750 man chu ka lei ta nge nge a. Ka sawi sual lo. Cheng zasarih sawmnga man .

A hnu deuh chuan, Assam Police ho ngei tak chungin Phone thar, ka mamawh em vangin lei turin ka kal leh a. Khiangte Mobiles, Canara Bank bul zawkah hian ka lut leh a. Thil hi a man tlawm apiang duh ṭhin ka ni a. T-Shirt pawh Second Hand thing peih leh 99 dawr a mi lei ngat peih khawpa inren ka ni ṭhin.  Mahse, Dawr nghaktu nulain thiam taka min han hrilh a, min ngaizawng ta emaw tih mai awl khawpa zeia min han chhawn takah chuan khami ni kha chuan Kei val lungmawl hian cheng 7500 man aiah a man to zawk ka thlang ta tlat pek a. Ka pawisa kenin a daih lova, engmah a dang (tax) cut eih lovin, Bung chhak a an dawr pakhat zawkah Card Payment min tihsak a nih kha! Hmun ṭhenkhatah chuan min cutsak ṭhin a, Customer ten kha tax an chawi kha kan pek tel tur a ni lo tih hre reng mahila, min cut sak miau chuan lungawi lo taka kan pawm a ngai ṭhin a. mahse, an ni erawh hi chuan an ti ve lo! Chutia a to zawk ka thlang ta mai chu a hnua ka ngaihtuah let hian ka pawisa ka ui leh hnuhnaw!

A hnu lehah, Thingtlangpa chiseh lam zo, awh, Sawrkar Pisa dawr zo zawk chuan, ka haw lamin _Selfie Stick_ en chhin ka tum a. Ka han lut chiah chu an nulate khan min lo nuih sang a, val hi ka tuiral lo chauh a ni leh ta der mai.  An tlangvalte lah kha an fel narawh, farnute min chawm chhawktu atan a thlan mai awl tak tur an ni!  Kan han indawr a, en mai mai tum kha, lei a ngai leh ta tlat pek! Mahse, ka pawisa kenin a lo daih lova, cheng 100 lek kha kei pek hian ka lo nei daih lo pek a. Cheng 100  lek kha Card aṭangin min han cut sak kha a ni a. An tax chawi tur nena ngaihtuah chuan 'hlawk tak maw?!'

An fel a, dawr an nuam a,  lei tum lo puia luh pawhin lei leh mai awl khawpin mi an dawr thiam a. Customerte an dah pawimawh thiam em em a, lawi luh fo mai chakawm khawpin an awm thiam. Thil lei tum vak lo chunga luh chi a ni lo, tum vak lo chunga lei a awl tlat! An nula te'n nui seih a min han melh chunga, "hei hi lei rawh a ṭha," an tih kha chuan, neih zawng zawng bun ruaka lei mai a awl a, 'a leina zawng nei daih i la, an dawr ruak khawpin min lei tir thei mai dawn hian ka hria!!'   An hetih vang hian dawr tawh tan chuan dawr nawn zel an chakawm a, khaw dang hawi zai kan rel thei lova, an dawrah bawk hian kan lut leh mai ṭhin bawk si a, pawisa min laksak hnem tawh lutuk a ka ngei ve det! 😂
Kolasib sumdawng zinga ka pawisa la hnem ber an ni ngawt mai hi ka haw tlat! 😂😂

Mi ngei ve te.... 😂😂😂😂

hun hman nuam u le...


- H. Zate
mail@hzate.in
www.hzate.in

23 April 2018


No comments:

Post a Comment