Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Saturday, 14 April 2018

I LOVE HER


( Credit Goes to photographer )

Ziektu - H. Zate,
  www.hzate.in

"I ngaizawngnu kha ka thei hnung a ni kha!" tia WhatsApp-ah thu ka dawng ni tluka ka lungril nat kha ka la hriet nawh. Chu thu chu thlalakin a zui a, ka hmangai em em, ka nun nia ka lo hriet hlak leh intheida naw hmel fahran a saruok thawthanga an zal lai thlalak a nih.

Ka hmu char le ka mita inthawka mitthli far kha ka dang hman nawh. Ka nun, ka iengkim nia ka lo ngai le ama khawmin mi hmangai ve vieua ka lo ngai chu hieng el hin nun a lo hmang ti ka hriet chun na ka ti ngei el.
A hmur a fawp khawm nuom naw khan mi dang lakah chun a lo inphal rai hle a nih ti ka hriet chun um dan ding tak khawm ka hriet nawh. Ka lungril hi sun angin a na ngawi ngawi a, ka natna sukzuoltu dingin a ngaizawng hlak chu hnam dang a lo ni nawk a. Mak ka tiin na ka ti a, ka hrietthiem thei hlawl naw a nih.
Chawmkhat ka inngaituo hnung chun, "I ta dingin a hlui tah; sienkhawm, ka ta ding chun a thar a nih. A nunhluiah ka buoi nawh; a nun thar lem hi ka ta ding a ni leiin! Ka hmangai a, hmangai zing bawk ka tih; asanchu, I Love Her!" ti chau te hi ka thawn a. "Hlim takin um ro!", ti char hi a hung thawn a, a re ta vang vang a.

WhatsApp Group pakhat a inthawk a inhre tan kan ni a. Khuo khat ni inlang khawm Kohran khat kan ni naw leiin ka lo hriet ngai bek bek nawh. WhatsApp group a inthawk mimal taka inpawlin, inpawla inbe zing chun inngainatna a um a. Intheida naw na na na chu kar 3 zet zawt ka bem hnung chun a ka fielna chu mi pawmpekin , inhre ngai naw kha ruolah, ruol kha ngaizawng kan ni tah a.

Ama leh chun nun hi a hlimumin a'nhawi a. Rinumna karah khawm beiseina ka nei hlak!
Chuong a a chanchin ka hei hriet el chu mak ka ti em em a. A tir chun the nghal el ka nuom hiel; Sienkhawm, ka inngaituo a, ka hmangai tak tak a ni chun a nunhlui ni lovin a tu nun lem hi ka ta ding a nih ti ka hriet a.
A chanchin chu kimchang taka indawnin, a mi hril a, chu pa a lo kawp leia a nat pha dan le an inthe hnung chena a la sukbuoi dan chenin a mi hril a. Ka lunginsietin ka hmangaina a zuol.
"Kum thum liem ta a khan hi pa le hin kan inngaizawng a" tia inthawka tanin an um dan, hun an hmang dan le nupa nun chena an lo hmang tak dam a mi hril a. A mi hril lai chun na hle langkhawm a ngaithlak ka sin a ni leiin ka ngaithlak ran a. A tawpah chun, "Ka nuna thil tam tak i hriet ta a, i ta dingin ka tling nawzie ka hriet a, i nuom chun mi maksan el rawh. I ta dingin natna intluntu mei mei ni pangpal ka tih!" a ti a, a tap feih feih a. "Chel naw ka ti che. Ka tling naw a nih!" a ti nawk a.
A nun dan po po ka ngaihthlak zo chun, ka kuo a, a mitah enin, "Ka hmangai che. Ka ta ding chun mi thienghlim i nih. Ka hmangai na che hin iengkim a hmu tha vawng!  I nunhlui ni lovin i nun thar lem hi annawm ka dit le ka ta ding chu." tiin inthla ka tum naw thu ka hril a.
Tap puma lawmthu mi hrilin a mi kuo ve ngawi ngawi a. A vawikhatna dingin a hmur inno em em el, siemtu hin a uluk bik am anih ti el dinga mawia chun ka fawp ngawi ngawi a.
Chu taka inthawk chun duot taka enkawlin, a nat ka phal ta nawh. Duot thei tawpa duotin, a natna ka hrietthiempui a, a hlimna intlun ka tum fan hlak. Ka lakah ringna a innghat angin a lakah ringum ka tum a. A mi mamawnaah chun ka sukhlawsam ngai nawh. Inpaw takin nun kan hmang a, ka lakah insit hlak sienkhawm, mani inngaihnuoinaa a sip ka nuom naw leiin ka ta dinga a thatna ka infa mawl mawl hlak.
Hmangaina hi mi tling tawngna ni lovin, mi tling naw tak khawm tlinga pawmna a ni leiin ka hmangaina hin a tling nawna po po a pawm vawng a. Vawikhat a suksuol leia a nun pumpui beidawngna kara a hmang ka phal bawk nawh. Ama khawmin ka hmangaina hrethiemin a mi'n za em em a, kei khawmin inza taka enin kan inkarah inhrietthiem nawnain hmun a chang ngai nawh; inhrietthiemna leh nun kan hmang tlat leiin.
Ka hmangai em leiin chan ka nuom naw a, ka phal bawk nawh. Chuonga intheida naw na na na chu a tawpah chun, damsunga puonthu pawt Ṭawmpui dingin a in sung ngeiah a hung inlawi tah a.


03 March 2017 |Thingdawl


Thuziek dang,
https://hzate.in/

No comments:

Post a Comment