Sponsorship atan helai hmun hi i tan a ruak e. To Advertise here contact: +919402125273 (Call / WhatsApp / SMS)

Labels

LightBlog

Sunday, 1 April 2018

KARHLA HMANGAIHNA


( Pic is just a pic )
Model: Kimkimi Hrahsel
Photographer : Valte Camera
Ziaktu: H. Zate
- www.hzate.in

Fb-ah ka thu post pakhat a lo comment ve aṭangin kan inhre ṭan a. A profile ka en a, a thlalak ah 'like' ka hmet pawp pawp a. A ni pawhin ka thlalakah a lo hmet ve zel a. A tawpah chuan inbox lamah kan ṭuan a, ṭhian ni ngai lo kha fb ah ṭhian kan lo ni ta a.
Chuti chuan remchang leh hun awl apiangah kan inbiaa, hun awl lo ah lah kan inbe awl lo! A online in ka lawm a, a online loh lah chuan ka ngai veng veng lawi a. Kan han inkawm te hi ka sawifiah thiam phak bak hian nuam ka ti a, ka hlim veng veng ṭhin. Tichuan, inkawm ve ta fo chu fb ringawt chu ka kham khawp ta lo. A Phone number ka dil a. "Mipa i ni a min pe hmasa zawk rawh," a  ti a. Mahse, a dil hmasatu zawk ka nih thu ka chhuanlam tlat a, chutia ka ṭan tlat takah chuan min pe ve ta a. Ka va lawm kher em! Ka lawm zia lantir nan Kei pawhin ka phone number chu ka pe ve ta a.


Fb aṭang chauha inbiak kan kham lova, tichuan, Phone Call ten kan inbia a.  A aw mawi tak mai ka hriat kha ka bengah hian a la cham reng ṭhin. Ni e, ka tan chuan a aw tluka ri mawi leh ngaihnawm he khawvelah hian a awm ve tlat lo. Ka tan chuan ka engkima engkim a ni ringawt. Phone Call ringawt pawh chu kan duhtawk ta lo, WhatsApp lamah nen kan inbe leh ta zel a. Kan inbiak tawh hi chuan nuam ka ti a, ka hlim veng veng ṭhin. A changin ṭha takin min biaa, min biak viau chang nei mahse, min ngaihsak miah loh chang a nei fo ṭhin.

Zan khat kan inbia chu a bialpa nen an inṭhen thu min hrilh a. Ka lawm kher mai! Mahse, lawmna tihlan vak chi a ni si lo. Amah tawrhpui angin ka awm a, a ruk chuan ngaihzawng nei lo ka biak tawh dawn avangin ka lawm lawi si. Ka theih tawk chuan ka hnem ve ngial a. A tawpah chuan kan inhnem thei ve ta a. Amah ka duh a, ṭha ka ti bawk a, ka hriat loh hlanin a zunah ka uai a,  ka thamral zo ta.  A awm dan engkim chu mawi ka ti a. A aw ngaihthlak ringawt pawh ka thlahlel a, ka be ngun telh telh a, ka biak zin poh leh biak nawn leh ka chak ngun a ni deuh ber mai.

Ka duhnain a hneh a, a zunah ka uai tlu ngang mai si a, insum leh inzep reng thei ka ni ta lo. A tawpah chuan zah pawh dawn lovin ka bem ve ta a. Min be chhe hran lova, mahse, min be ṭha lutuk lo.  Min ring chiah lo te pawh a ni mahna.

Chutia kan inbiak lai chuan Fb ah naute pakhat nena kan thlalak ka dah chu a lo hmu a. Nupui fanau nei tawh emaw min ti a, a thinrim ta tlat mai.  Ni e, a ni tan chuan fimkhur a ngai a, min ringhlel pawh kha ka dem chuang lo. Tin, a taka la inhmu lo kan ni a awm pawh ka ti. Chutianga ka chanchin a lo chik ve tak danah chuan a tan mi pangngai mai chu ka ni tawh lo ni ten ka hria a, ka lawm letling zawk mah a.

Mi pa emaw min tih tlat avang chuan kan inkar chu a hma angin a ṭha thei lova, min be ṭha peih tawh lo. Kei lahin ka ngai a, ka duh a, ka vei a, be lovin ka awm thei si lo. Ka thiam dan ang angin ka hrilhfiah a, ka han insawifiah a. Insawifiahna ropui kan neih hnu chuan 'tlangval' ka nihna chu a pawm ve thei hram a. Luhlul ngang hi a ni a, a lung ka tiawi zo lo lek lek a ni.

A hma ang chuan kan inbe leh a. Mahse, mak deuh mai chu min fiah nge ni, min hnawl lova min chhang mai hek lo.  Ka rilru a buai a, amah ngaihtuah hian ka hun leh ni ka hmang liam zova. Tawpsan mai duh chang ka nei a, mahse, tawpsan mai tur lahin ka lo hmangaih ve laklawh tawh si. Ni e, ka hmangaih a ni. Kei pawhin hetiang hian a taka ka la hmuh loh ka hmangaih mai hi ka ring bik lo. Mahse, rin loh theih pawh a ni lo, ka hmangaih miau si a.

A niin min ngaihsak lovin min be duh lo mahse, he thinlung hian a duh miau avangin ka be lo thei lo. Ka hmangaih em avangin tha tharin ka bem nawn leh ta  a. Ka birh tlur tlut hi a ni deuh mai.


A tawp a tawpah chuan a lak aṭanga ka lo beisei ṭhin chhanna chu ka dawng ta a. A ni nen chuan hmelhriat satliah mai ni lovin ngaihzawng kan lo ni ve ta a. Hmun khata awm si lovin thinlung hmunkhat puin Hringnun hlim takin kan zawh dun ta a.

A ni nen chuan thlalak kan inthawn awl lova, ka mit tan a hmuhnawm miau vangin a thlalak ka dil a, min pe leh ṭhin. A hnu phei chuan ka dil loh pawn min pe fo ṭhin.

Chutia kan inbiak ṭhat a, nuam ka tih em em lai chuan a bialpa hlui a rawn inrawlh leh a, a rawn be thar leh a. A rilru a lo pek tawhna a nih vang nge ni ka ngaihsak angin min ngaihsak lova,  ngaihsak lah ka phut ngam bawk si lova amah vangin ka rilru a  na fo ṭhin.

Ka nghak a, ka dawh a, a ruka na siin hlim angin ka awm ṭhin. Chutia ni tam tak kan awm hnu chuan Kan inbe pangngai ve leh tawh a. Ka rilru pawh a hlimin ka lawm khawp mai. Ni e, ka hlimna leh lawmna a ni a, ka engkim a ni tak meuh meuh a ni. Mual leh tlang tam tak kar dana awm ta chuan kan inthlahlelin kan innngai a. Kan inbe ngun ṭhin khawp mai.

Ka hmangaih em vang chuan min ngaihsak loh chang paw'n ka kalsan phal lova, kar khat dawn dawn min biak loh paw'n ka thinrim ngam phal lova, ka be chhe phal hek lo. Mahse, a  hriat loh hian ka na a, amah vang hian ka mittui a far leh ṭhin. Min ngaihsak lova, min hmangaih tawk lo ni te hian ka hre ṭhin. Mahse, a chang chuan min hmangaih mah mah ni te hian a hriat leh lawi si! Ka hmuh atana a taksa saruak thlalak min pe te kha min ring lo nise min pe awm si lova. A hnute thlalak min thawn te kha min rin vang a ni ka ti lo thei si lo. Mawi ka ti a, ka tan hmuhnawm a tling tak meuh meuh a ni. Mi dangin an hmuh chuan a mualpho thei dawn a ni tih kan hre ve ve a, ka timualpho phal dawn lo a ni tih min ring ngam kha ka lawm a. Kei pawhin a mualphona tur ka thlen phal lo. A thlalak min thawn chu ka en a, ka en ning thei lo a ni ber mai. Ka tan chuan khawvela thil hmuhnawm ber a ni miau a.  A ni nen chuan engkim a nuamin a hlimawm a. Ka tan a hlu a, ka hmangaih a, min kalsan tuma min  ngaihsak loh pawhin kei chuan ka kalsan ve phal ngai lo. Ka hmangaih em vang hian min ngaihsak loh chang pawn ka nghak fan fan ṭhin.

Ka hmangaih em vang chuan a hlimna nih ve ka duh a. A tan ka thei tawk chu tlem hle mahse ka chhuah ve ṭhin.


Kan inngaina telh telh a, kan inthlahlel tual tual a. Aw  leh thuthawn mai chu kan duh tawk ta lova,  Video Call ten kan inbe fo ṭhin. Ni e, khatih hunlai khan nuam kan tiin kan hlim ṭhin. A taksa saruakin min entir ṭhin a. Ka mit atan hian ava hmuhnawm si em! Chutia inthlahlel ta chu kan inkarah thup leh zep a awm lo tial tial a. Phone Sex te hial kan hmang fo ṭhin.
Kan nun hman kha nuam ka ti thei hle a. Min ring em em a,  Min rin ang bawkin a tana ṭha lo turin engmah ka ti ngai lo. A inbual laite in Video call hmangin min entir a. Timualpho duh ni ila lo screenshot zauh ila, ka tihdarh chuan a mualpho a ni nghal mai a. Mahse, hmeichhe awm nem timualpho duh tur khawpa pa lo ka ni lo. Tin, Ka hmangaih a, a tana ṭha lo tur engmah tih ka tum bawk lo.

Mahse, mahse, chutia hlim taka hmangaihna par kan tlan dun lai chuan a bialpa hlui a rawn inrawlh leh a. Kan inkarah hem a rawn thlak a. Kan buai ta neuh neuh mai a.  A tawpah phei chuan kei, hmel la inhmu lo zawk leh eizawnnaa chhuan tur nei lo zawk chu min hnawlin a bialpa hlui, eizawnna lamah pawh sawrkar zem zen leh a taka a lo hmuh tawh. A thlum a al a lo tempui tawh chu thlangin kei min hnawl ta zawk a. Na tiin hrehawm ti viau mahila ka hnangaih berin ka chan tura min ruatsak a ni a, mittui nen ka chan tur kawng chu mahniin ka zawh leh ta a.

Chu ni aṭang chuan ka nunin hlimna ni reng a hmu tawh lo. Ka hlimna thlen ṭhintu kha ka ṭahna thlentu mai a ni tawh a.  Ka hlimnana ka tana vul ṭhin chu mi dang tan a vul ta si!

A changin a rawn let leh ṭhin a. Ka hmangaih em vangin ka lo pawm leh a. Mahse, rei daih lovin min liamsan leh mai ṭhin. Hetiang khawp hian ka lo hmangaih theih hi ka ring ngai lova, mahse, ka hmangaih tlat si! Min phatsan hnu pawh hian ka thinlung chuan engtiklai pawhin a la ngaidam reng a, a la pawm tlat reng si! A lo let leh hun tur a nghak reng ṭhin.

31 March 2018 | Thingdawl

No comments:

Post a Comment