Labels

LightBlog

Tuesday, 1 May 2018

DAR RI ; VAWIKHAT BEK


Ziektu: H. Zate
   - www.hzate.in

Tuk khat inhlaw ding a ka suok chu ‘Dar ri’ inri ral ral hi ka hriet a, ka hei ngai chieng chun ka beisei naw ang takin, Mihriem dam sunga a ta dinga dar inri thei um sun a lo ni a.

'Aw a va ropui ngei de. Lawmpui a um de aw!' hi dar sukri ding hin ieng ang harsatna am tuor thleng ata? A kawppui le ngaizawng kawla inthawk vawi iengzat khiu am “inmawl” hlaw ata?

A ruolhai laka inthawk vawi iengzat am “ Pa Naw “ le ‘Tuoi’ ni hlaw ata? Sienkhawm chungang popo le thlemtu popo chu hne a Harsatna tamtak paltlangin hi Dar hi a ta dingin a'n ri thei a ni si a.

Hieng ang dinhmun tlung thei ding hin ieng ang lawma Huoisenna chu lo nei bik ni maw?!

Mihriem hin hi khawvelah hin ei hming le ei ta dingin Dar vawi hni a'nri thei a, anachu, a pahniin ei hriet ve ve thei nawh.  Pakhat chu i hriet thei a, pakhat ruok chu i thla in rauthla a'nchanga Fam tuollaiah i sakruong Piellei thuoriet hnuoia an inzal ding ni in inri ata chu chu ‘mitthi Dar' an ti hlak. Chu Dar ri chu a muonga a hretu ni an nuom ngai naw a, a'nrikna kohran le khawtlang ni khawm an nuom ngai nawh. A vawtu ni khawm thafan um naw tawp khawk a ni a, chu chauh chu ala ni nawh, a'nrik san ni lem chu thlang um naw tawp khawk a nih. Ṭapna le lungngaina, mitthli le ṭap hla intluntu a ni tlat annawm.

Sienkhawm, Pakhat ruok hi chu a vawtu le a'nrikna Kohran le Khuotlang ni an inhawk a, a vawtu ni lem chu chak um tak a ni awm! Chu el a la ni nawh,  a'nrikna san ni lem chu khawvela mihriemin a chak le nuom laia a pakhatna hai pakhatna ni ngei ati. Sienkhawm chu chu mi tamtakin an baw pel hlak, retheina lei,  Suongkuo inrem naw lei am ani, hursuolnaa an lo lut lei damin a nih. Chu Dar chu 'Inneina Dar' a nih.


 Chu dar chu i ta dingin a'nri ve thei annawm. Hi khawvela i cham sung hin i ta dingin Dar vawihni a'nri thei a;  pakhat chu i hriet hman naw, i thi ni a inri ding a ni a, i ta dinga Dar inri i hriet thei um sun, i dam sunga i ta dinga dar inri thei um sun hi sukri lovin ‘Famkhawrun’ i rem el ding maw?!

Dan lova kawppui neiin i dam sungin i ta dingin dar vawikhat khawm a'nri naw ding maw!!! Ngaituo chieng ve la, i'nsir el naw ding maw?!

“Ei dam sung ngei hin ei ta dingin 'dar' sukrik tum hram ei tiu.”

24 April 2012 | Silchar
Tuesday 8:30 PM

No comments:

Post a Comment