Labels

LightBlog

Sunday, 6 May 2018

HMANGAINA LEIIN TLANG SENGSE A HNE BAN


Ziektu: H. Zate
- www.hzate.in

"Ka nuhmei ka hmangaina leiin sin hi ka ṭan a, Anachu, ka mipuihai ka hmangai leiin tawpsan lovin ka thaw ṭal ṭal a nih. Ka thaw naw chun tu khawmin an thaw awm si naw a,"  - Manjhi

An khuo le an fak zawngna, leilet le khaw danga inthawka chak an lakna, khawpui panna, sikul le damdawiin po po pan ding chun tlang sengse tak el ft 300 a insang hraw thleng a ngai a. Damdawiin hnai tak pan ding khawmin chu tlang ngainat um naw tak, khawkrawk le bumro chu hraw thlengin KM 70 chuong kein an lawn a ngai. Lung chang tak tak, tluk pangpala nun chan theina tam tak a um a, zum le hriem karah chu lampui chu an ditthlangna ni lovin an mamawnain a nawr tlat leiin chu khuo-a mipui hai chun an hraw rawp a ngai si.

Dashrath Manjhi khawm chu khuo a mi pakhat a ni ve tlat leiin a hraw a ngai a, a sunghai khawm an bang bik nawh.  Ni khat chu Manjhi chu chu tlang let liemah chun leiletah sin a thaw a, a nuhmei chun a sun bu ding, bei le hme siemin a puoninna tuom a, Manjhi pe ding chun a fe ta a. Manjhi chun a nuhmei chu a lo nghak a, phing ṭam taka a lo nghak hnung chun a nuhmei chu a hung tlung a, "i va sawt de," tiin a lo hal zet a, sienkhawm, nuhmei dang po po hnawla a thlang, a nuhmei, a hmangai em em Phaguni bienga mitthli le a kut le kea hliem a hmu meu chun thutlukna, mi tam takin invet tia an hrilna ding chu a siem naw thei nawh.
A nuhmei chu lamah tlu suolin a lo insukhliem a lo ni a. A ni ngei, chu tlang chun, 'Nuhmei awm nem ta ding chun hei inpha hnuoi ka ta, zangai deu ka tih' a ti si nawh.
Damdawiin hnai tak pan dingin lam dang a um nawh, chu tlang hraw tleng a, Km 70 vel a hlaah an fe  ngai si!

Chu ni a inthawk chun, 'Ka tum am inru sa ru,' tiin a nuhmei a hmangaina lei chun chu tlang chu hne ngei a tum ta a. Zing ni suok tiemin a Tubo, Lungral, le hmangruo a nei sun sun chawiin chu tlang, lung hmun khawkrawk tak el chu a pan a. Hne ngei tumin a bei ta nghau nghau el a nih.

Hun a liem a, a nuhmeiin a thi san a, sienkhawm, tawp san a tum chuong nawh, a hmangai a khaw mipuihai ta dingin, 'bei am sei run dung!' tiin a bei nawk ta nghau nghau a.

Pa khatte, mani a fak zawng, nau le te chawm,  ram le tui nei naw a ni leiin a tir chun zingkar hun awl le zantieng hun awlah a chu tlang nunrawng chu rawt hnuoi ngei tumin a bei a, tha inthla a tum ta nawh. A hnung lem chun, zingkar le zantieng chau ni lovin a hun pumpui chu chu tlang buonna ding chun a hmang ta a.

Kum 1960 a ṭan kha kum 22 a liem a, kum 1982 a hung inher suok meu chun Pu Dashrath Manjhi chun chu tlang chu a hne a, Leitan ft 360 a sei,Kho ft 25 a insang, ft 30 a lien  chu a hmangaina leiin a siem zo der el tah.


A tum chu sa ru nekin a'nru a, a nih, lung lien intieng ur el, tlang lien tak nek khawmin a'nru a nih. Chu a tum runa le a hmangaina lei chun a khaw mipuihaiin Km 70 chuong an hraw hlak kha Km 5 chauin an hraw ta a, hun le tha tam tak senga an tlung hlak khawpui chu hun sawt nawte sungin an tlung thei tah a nih.

Chuong ang lawma ram ta dinga inpe chu a dam sungin India Chawimawina a dawng naw a, a thi ni ruok chun Bihar Chief Minister-in State inzana leh ropui takin a vuiliem a nih.


06 May 2018 | Thingdawl

A thlawna thuziek i tiem zing theina dingin ads um hai lo hmet ve la.

No comments:

Post a Comment