Monday, 25 June 2018

I FA KHA I HRECHIANG EM?

Ziaktu: H. Zate,
www.hzate.in



"Zirtirtute ngenna vangin Pathianni tlai khat chu an sikul kan tlawh a. Tleirawl, la upa lo tak mai, mahni ina naute ang maia la awm ṭhin an ni tih hriatchian em emte chu sikul kawm karah an bialpate nen an lo bawk far mai a. Ka ngaihtuahna a ti kal thui khawp mai. Nu leh pa lahin an fate awmna an hre der si lo!" tiin min hrilh a.
Vawi khat chu In pakhatah ka leng a, in neitunu chuan a fanu chungchang a sawi a, a fak khawp mai. 'Ngaihzawng lah a ngaihsak lo, a fel a ni.' a ti a. "A nih tak chu, fa hmel țha leh fel tak i nei a nih chu." ka ti a. Ka rilru erawh chuan, 'Ka rawn kal paha , Sikul hnunga saruak a mu a, a bialpa nena sex lo hmang kha i fanu a ni tih i hre si lova maw"' ka ti a. A kalna ka zawt leh kher a, 'Home work a thiam lova, a ṭhiannu a va zawt dawn a nih kha. Lekha hi chu ngaihsak ve a!' a ti leh hrâm a. Naute ang mai a la nih thu leh pawl 10 a zir tawh na a naute ang maia a la awm thu chenin a sawi zel a. Ka ngaihthlaksak vel ta mai mai a, a rukin ka lo zak zawk.
A fanu, naute anga a en kha pawn lamah chuan a naupang tawh lo tih a hre lo ley, a fanu a ring lutuk piahah a chhuang lutuk kha mak ka ti hran lo. A hriat loh vang a ni ve mai. A fanu khan home work ti tur anga insawiin, a phenah chuan, Phone aṭangin thil tam tak an lo ruahman daih si.
Nu leh pain an hmu loh phenah hian fate hian thil tam tak an inzir a, an hria a, an ti ta ṭhin. Nu leh pain a ri rêt rêt an hriat tawh hi chuan khawtlaiah chuan an lo nasa ve viau tawh tihna a ni a. Nu leh pain an hriatchian meuh chuan chu a pawi lampang a ni tawh ṭhin!
Țum khat chu, nu pakhat hian a fapa chu ngaigzawng pawh ngaihsak lo, fel leh țha emin a lo sawi leh a. Ka nuih a zain ka ngaithla peih lo lek lek. A sawi aṭanga thla khat em pawh a liam hmain, POCSO Act hmangin an fapa chu a tâng dêr! Ni e, nu leh pa hian an fate hi fa an nih miau vangin an hmu upa thei lo a ni mai thei.
Ka hmelhriat pakhat chuan, "Vawikhat chu kum 14 mi hian min be ve tlat ṭhin a. Kei tehlul hi a min duh thute a sawi ve luam ṭhin! Hmeichhe pakhatin mualpho leh zah pawh dawn lova min lo bia chu ṭha deuhin ka chhang a. Mahse, a tawpah chuan a beisei 'ngaihzawng' ni lovin, 'u' ah ka insawi chhuak thei hram a." a ti a. A chhunzawm a, "Chuta ṭang chuan, Ka farnu, kum 15 pawh hi kan hmuh ah țawng fiah lo ang maia a awm hi pawn lamah chuan, 'ka nun aiin ka hmangaih zawk che!' tiin a lo thai kur ve dup tawh thei tho tih ka hriat phah a.
Hun remchângah, thil tam tak, duh rûk neih hun lai nawm zia aṭanga ṭanin Sex chungchang chenin ka sawipui ṭhin a. Nupa kâra thleng tur hi nupa karah ngei thlentir turin ka sawipui ṭhin! A zawm leh zawm loh chu a thu ni se!" a ti.
Nu leh pa țhenkhat hi chuan an fate hi an hmu naupang reng a, mi fate, Pum thum cheng khat man chauh pawh an lêrh zia hahipa an sawi laiin an fate chu lêrh ve thei lo turin an ngai tlat ṭhin! Mi fate pawhin an tih theih chuan an fate pawhin an ti ve thri a ni tih hi an ngaihtuah pha lo nge an ngaihtuah duh lo zawk lah hriat va ni suh!
Nu leh pa tam tak chuan an fate, Sex chungchang hi zahmawh a nijna chauh ngaihtuah vangin an hrilhriatin zirtirna an pr ngai lo. Zirtirtu țha zawk turin zirtir lo mahse, an ṭhiante leh hmun dang dang aṭangin an zirin an hre thova, a țha lo zawk leh a pawi zawk; 'Virgin kher chu a ho lutuk. A luck loh thlak!' ti kha an inzir chhuak zawk a, a tawpah chuan thil pawi tak a thleng ṭhin. Chuvang chuan a pawi zawk a thlen hmain, Zirtirna țha zawk fah mawlh mawlh tur a ni.
Tunlai rawltharte chu, nu hnute hnêk an bansan chauh a, hnute dang hnêk tur an zawng a, Tleirawlho lah barbie khal an bansan chauh a, a barbie tu tur an zawng leh nghâl si!
He țawngka hi i lo hre tawh em ang chu maw, 'Hmeichhia chu Kawr hnuai (bra) an hâk chiah hian an taksa a puitling a, Mipa pawh Hmeichhe kawr hnuai hlih dan an hriat chiah hian an taksa a puitling tawh!' tih hi.
Ni e, I fanu khan Kawr hnuai a hâk țan chiah khan a taksa a puitling tawh a, chumi rual chuan i fapa pawhin Kawr hnuai hlih dan a lo hre ve nghal ! A tam zawkag chuan, Hmeichhiain ṭhianpa a neih a, Mipain ṭhiannu ngah chiah hian ngaihzawng an nei țan ṭhin.  A chhan chu, khawilai tleirawl mahin an nu leh pa hnenah, 'ka ngaihzawngte  inah ka leng dawn!' an ti ngam ngai hleinem!
Fiamthu ka dawn pakhat, Pain a fanu a hauhna a, "I nawmsakna turin thawmhnaw țha leh to tak tak kan lei che a. I nawmsaknan  tak tak chuan i hlip leh vek si!" a ti hi a dik hmel khawp mai.
Chu tleirawl thlalak darh chuan an vêng leh an khua a luahkhat hneh hle a. A nu leh pain an han hriat chuan, a tan a țangkai nia an ngaih, a pass lawmnan a leisak ngei khan a thlalak chu a bialpa a lo thawn a lo ni a. Nu leh pa hriat loh hian thil hi a lo va thleng nasa tak em! I laka a zahpui ṭhin a taksa kha tu emaw a ni lakah chuan a lo zahpui tawh lo mai ang em? I fapa, Naupang anga i en khan, a ṭhiante hnenah chuan, 'Pawla'n mi sai tawh bik  lovang!' a lo ti zawt zawt tawh mai lo maw?
Naupang sikul ban hun aia tlai lutuk a naupang inah an haw loh fo chuan nu tan chuan ngaihṭhat lohnaa hmang a, en zui vat vat a ṭha ber. Tunlai nu țhenkhat, an fate, tlai dar 3 a sikul bang ṭhin, a hla em em pawh ni lo, Dar 5 a in an haw pawh a rilru buai miah lo an awm. A mak khawp mai!
Hman deuh khan, tlai dar 3-5 inkar ah hian  naupang țhenkhat, nu leh pa hriat a la  inngaizawng ngam chiah lo te hi kan awmna bulah an rawn inhmu ṭhin a. Tlai dar 5 ah te in an tbleng chauh ṭhin a, an nute lah an buai der si lo. Kawng laka thil thleng ṭhin lah an hre si lo!
I fapa khawpuia lehkha zir tura i sum tam tak senga i dah khan lehkha chauh zir lovin a zirlai a zawh hmain rah dang a rawn chhuah mai ang em? I fapa chawm anga inngaia pawisa i thawn ṭhin lai khan a nupui leh fa piang mai tur i lo chawm tel a nih lek chuan e,  A ropui lo viau ta ve ang.
I fanu pawh, khawpuiah i dah a, pawisa a dil ngai loh vang che leh a rawn thawn fo vang che khan lawm ngawt suh. Sumdawnna hek thei lo lam a lo buaipui vaih zawngin a buaithlak teh ang.
Tu emaw nen nei lo nghei lova, 'Living Together' nun hmanga, in an lo inluah ṭawm mai zawngin  i hre mai awm si lova. I hriat hun chuan nuih a za tam lo teh tur a sin.
A lo chhuah changa nautr anga awm a, in kohhrana in chhuan em em, i fa kha khawpuiah chuan a lo naupang tawh lo viau mai thei. Zirna hi a ṭha, Khawpui lan pawh a ṭha, mahse, thiamna leh finna dawng siin i faten an nun an chân si chuan a hlu zawk i chân a ni mai thei a ni!
Vanglai chên inti a, nui ṭhinho hi ka hnenah țap chungin an rawn inpuang hnem tawh khawp mai! Tleirawl pakhat chuan, țap chungin a bialpa nen sex an hmang a, a hnuah a phatsan thu leh a nu leh pa hriat lova nau a tihtlak thu min hrilh a. Nu leh pa hriat loh hian thil tam tak hi a lo thleng thei a, a thleng reng bawk a ni!
I fa kha i hrechiang em? A vanglai hun țha leh hlu Krista nen hmang țha turin kan fate kan fuih a, an kalna awm kawnga kal ngei tura zirtir a enfiah a țul tawh khawp mai.  Vanglai chên inti viau te pawh hi a tawpa an beidawn hnu chuan 'Krista' tho an bêl leh si ṭhin.

24 June 2018 | Thingdawl

( He thu hi 22 August 2017 | Guwahati a Hmar Ṭawnga ka ziah tawh, ngenna avanga siam ṭhaa, let leh ka ni e. )

No comments:

Post a Comment