Friday, 23 November 2018

ZOFEST KARA HMANGAIHNA



Ziaktu: H Zate

Kha Zofest kha ka nun sawi danglam dawrhtu ka tawnna tur a ni tih reng hrelawk lovin ka kal ve tawp a. Ka hmang liam ve tawp tawp mai a ni.

Zofest 2014 Muolhoi khawpuia hman chu a tawp zan a ni tawh a. Chu nula chuan ka beisei loh tak maiin, "mi lo inthiarpui lawk thei ang em?" tiin inthiarpui turin mi rawn ngen a. Ka lo star ruk deuh a nih vangin min sawmna chu ka tan hnar phal si va ni suh, ka kalpui rang kher mai. Keiin ka star chu thuhran nise, Zofest palai mipa dang pawhin an star a ni a, a sawpna kha ka tan hnar phal chi a ni lo. Chu chu remchangah lain Green room ah chuan a vawi khatna atan thla ka lakpui a. A thlalak ka neih hmasak ber a ni a, ka ngaihlu a, tun thleng pawh hian ka la kawl ṭha reng. Kha thlalak kha khawvela hun leh ni ka hman tawh a ka rohlu leh thil neihchhun te zing a ka roh ber a ni.

ZoFest a ṭiak, Kan nun erawh a inṭan chauh si!

Chu zan chuan kan intawn ṭan vena, Zofest 2014 chu a ṭiak ta a. Mahse, kan inkara nun erawh a inṭanna chauh a ni zawk si! Mahse, mahse, Kha zofest ah khan nihna pawimawh ka chelh ve miau avangin mi haw hnuah pawh a hmunah ka la awm a. Mi hawna tur ka ngaihtuahsak a ngai a, chu chu ka mawhphurna lah a ni si. Buaina neuh neuh karah ka mawhphurna chu ka hlen ve thei hram a.

Ka thlenna te'n min rawn lama ka lawm kher mai. In kan thleng chiah chu ka thlenpui pakhatin ka star em em mai chu ka thlennaah a lo len thu min hrilh a, ka lawm lutuk chu ka dam sawng sawng ni mai hian ka hria!

Kan puala room an buatsaihah ka lut a ka phur lutuk chu ka inthlak sawk sawk a. An thutnaah chuan ka va ṭhu ve ta a. Kan titi a, nuam ka tiin kan hlim tlang kher mai. Minute 30 vel liam taa ka hahna leh ka mawhphurna vanga ka buainate kha ka theihnghilh vek tawh.

Chutia kan titi hnu chuan a ṭhiannu nen an haw duh thu kan hotute an hrilh a. Rang deuhin Sana kan en a, zinglam Dar 3 alo pel tawh a. Anmahni thla turin motor en a, Driver a lo mut tawh avangin two wheeler chiah a awm tawh si a. Eng vang kher chu ni maw, Ka thlenpui tlangval zingah keimah chiah Two wheeler khalh thiam ka ni hlauh mai a, mi dangin thlah chak sateh mahse ka koah a tla lo thei lova. Mi dangin min thik tih pawh hai rual a ni lo. Kan zinga hotu ber chuan, "i tlawmngai thei mai lo maw?" tiin min zawt a, khati ang khawvawtah khan thil dang vang chu nise ka peih kher awm love.Mahse, a ni thlah tur kha chuan kha zawhna kha zawhna ka dawn tawh a, "aw" tia chhan har ka tih loh ber a la ni ta ve ang.

A ṭhiannu nen chuan Haflong khaw vawt hnuaiah chuan bullet bike ngeiin kan han in threeble a. Kha zan vawt raih hnuaia Minute 20 bike ka khalh kha ka nuna minute 20 rei lo ber a ni ang. Minute 20 hnu chuan an thlenn kan thleng a. A kawng hla zawk chu awm se ka thlang ngei ang le!

An thlenna in kawt kan thlen chuan kir leh mai ka tum a. Mahse, lut tura min sawm avangin ka lut ve ta a. Ni e, a sawmna hnar turin chakna ka nei lova, Khatiang sawmna duhawm hnar tur khawpin ka mawl tawk lo te pawh a ni mahna! A ṭhiannu a intihfai hlanin kan pahnihin kan awm a, thla lakpuiah ka sawm leh a, a rem tih thuin min chhanga ka va han lawm kher em! Kha a rem tih thu a sawi ri kha tun thleng hian ka bengah a la ri ral ral thei. A biang si rialin thla ka lakpui a...

A biang sirialin thla ka lakpui. Ni e, a biang leh ka biang insi rialin thla kan la dun. Kha thlalak kha tun thleng hian ka ngaihtuahna tithuitu a ni a. A ni nena kan thlalak neih ve te kha min hlat lai ber leh min tihnat lai pawha min hnemtu leh ka inhnemna a ni fo ṭhin.

Ka va insum zo lo teuh em. Fawh mai ka chak a, mahse, 'fawp ta ila, a lo huat viau chuan keimah mai ni lovin ka inhmanna pawl bakah Zofest thlenga kumkhaw chawrno lohna a ni dawn tih ka hria a. Ka fawp ta lo. Mahse, kha nula duhawm tak mai khatia ka chhuah ta mai kha ka ui a, pa lo ka intiin ka insit a, A hnu thlengin ka indem.

Mahse, Chu tih rual a ka inhnemna chu, 'Lo fawp ta ila ka biangah min beng ta se engtin nge ka tih ang. Min pawngsualte ti se. Zahna avangin ka dam chhungin demna leh hmusit ka tawk dawn si a,' tih Chu ka inhnemna a ni.

Duhin thlahlel viau mahila Ka ngaihzawng a ni lova, an bula awm reng thei lah ka ni hek lo. Reilo te hnuah ka hawsan ta a. A thlalak pahnih ka nei ve tawh a. Ka va hlim si em!  Assam Tlangram khawvawt reng ka hre chang tawh lo. Mahse, ka han haw chu ka thlah lam a kawng a tawi tehlul nen mahni a haw chuan a rei duh viau mai.

A tuk mai a haw tur kan nih avangin thian tha zualte nen chuan Halflong hmun nuam takah chuan khawvawt pawh sawi lo chuan tlaivar a lam turin kan inzui chhuak ta ṭham ṭham hlawm a.  Engkim mai chu a eng vekin ka hria.

 Chu nula, 'Zofest Lanu'  chuan ka rilru a luah veng veng reng a.  Engmah inhrilh a inbiak hmain ka lo hmangaih bur ta mai nge ka ngaizawng zawk satliah ni ta ang le? Ka rilru hi a luah a,  a luah mai pawh ni lovin a so but but ringawt mai a ni.

Kan pianna Zoram nuam lam panin Zofate inpumkhatna duh a tuihal leh unau kanni tih sermon ngaithlaa inunauna tuia Baptisma chang zo hlim Zofest palai sang rual kannhan haw kha chu Haflong khawpui pawh a ruak huai ta ve ang! Inhlat lo taka inzuiin kan tun ram kan pan a, kan tluang khawp mai. Silchar thleng a.

Palai tam tak chuan Silchar Mizoram house kawtah Bus din tirin athenin chhungte thil tur lei an bazar a, an bazar zawh chuan kan chhuak leh ta a.

Halflong atanga kan chhuah ngawt ai chuan Silchar aṭanga zan Dar 7 vel a kan chhuak chu kan thawm pawh a ṭha na rawh e.

Aizawl city Bus 30 rual leh Mizoram hmun hrang hrang college Bus 10 chuang nen, Chu mai ni lo VIP motor leh private motor ṭhahnem tak nen Motor 50 rual zet han inzui chu Zokhaw lam atanga lo kal tan phei chuan hmuhnawm tham a tling a ni.

Kq vei em em Zofest Lanu chu ka zawng a, ka hmu si lo, a hmel tal kha hmuh tur han awm se ka hahdam deuh tur hi a nia. Mahse, ka hotute motora nuamsa zawkin a haw tih ka hriatin ka lawmpui lawi si!

Chuti zat motor inzui zingah chuan. Mi chi hrang hrang kan awm a, Motor rui nen, Motor ni lo lo rui tawk nen an kat nuk mai.

Chuti tehnuai karah chuan Mizoram kan lut a. Ni e, boruak a zangkhai tawh khawp mai. Mahni in lum ṭheuh dam takin kan thleng leh ta hlawm kha mi tam tak tan lawmna ni mahse, kei, ka tan erawh lunglen tizualtu mai a ni si.

Ni e, khatih lai kha chuan ka tan Zawlkhawpui hi a mawi zo lova, a ni nena kan intawnna leh hlim taka kan inkawmna Muolhoi khawpui lo kha chu engmah a mawi zo lo!!

Ka lungleng khawhar lutuk hi a number ka neihah chuan ngam leh ngam lovin ka be ṭhin a. A ni nula fing chuan min be chhe lova, min duh ang pawhin a tilang chuang lo. Ka rilruin a vei a, ka thinlung hi a hriat lovin a ta a ni tawh si. mahse, ka rilru puthmang zawng zawng inpuan em tur chuan ka huaisen tawk lo fo ṭhin.

Zawi zawiin ka rilru ka hrilh a. Mahse, min ngaihsak lem lo. Amah vei reng reng chuan hun leh ni ka hmang ṭhin.
Hun a liam a, ni leh thla liamin kum a liam zel a. Kum 2014 a intawng chu  a changa inbiain inbiak loh chang lah a tam. Ni e,   ka tana ruat a nih ka rin phak miau loh avangin ka be tak tak ngam lo. Chu mai a ni lo, a hnen aṭangin beiseina mitmeng ka hmu si lova han bawh huam kha ka tan thil har a ni.

Chutia hun kan hman lai chuan kum 2016 a lo ni leh ta der mai. Zofest kal turin MZP leh tlang hrang hranga Zohnahthlak te kan inbuatsaih a. A tuk maia kal tur kan ni tawh a. Kan nula pawh kal ve tur a ni a, Kan hruaitu pakhat motora chuang tura ruahman a ni. Mahse, kan hruaitu chu kan kal ni turah a kal ve theih dawn tak loh vangin ka motor a a chuan a ngai ta si a. Kan hruaitu chuan mi rawn biaa, "lo phur mai ta che," a ti a. Pawi ka tih loh thuin ka chhang a, mahse, "Ka no. hi lo pe la, amahin min rawn be rawh se," ka ti ve ngat a.
A hnu chuan min rawn be ta a. A tuka kal dan turte kan inhrilh ta a.


A tuk khua a lo var a, a rukin hlim viau mahila ngaihzawng ka lo nei ve tumhrang tawh a, lawm dan a kim chiah lo! Mahse, ka rilru erawh a luah em em lawi si! Tichuan kan han inphur ta chu a ni a. Kawng tluanin a ruka hlim siin hlim lo angin ka awm lui ve tlat a. Ka tilang duh lo.

Zofest 2016, Zokhawthar chu hlim takin kan hmang a, a hlawhtling viauin ka hria. Chhunah lum viau mahse, zanah erawh a vawt em em lawi si. Phone network a ṭha lova inbiak hlei theih a ni lo. Rih dil kan kal a, rih dil kamah pawh thla kan la dun a. Kan hlim khawp mai.   Chu Zofest aṭang chuan kan inzawm ve ṭan ta a.

Zofest kan zova, kan haw  leh ta a. Phone network a ṭha tawh bawk nen kan inbe chhunzawm be leh ta a.  Urlawk zan hmanpui turin kan insawm a. An inah hun hmang turin kan intiam a. Zan lai a ni ṭep tawh a, ka ṭhiante sawmin an in lam chu kan pan a, rilru a hlim veng veng mai. Mahse, an in bul kan thlenga an in chu a lo inkhar a, a thim ṭhiap mai. Ka han call ngial a, an lo mu tawh niin, ka thinrim a, ka na a, ṭhiante lakah hmai a uang lo ngei mai. Zak tak chunga hawin ka inah ṭhiante nen chuan hun kan hmang ta zawk a.

Hun a lo inher zel a. Ka hmangaihna hian a hneh em avangin buaina neuh neuh kan tawh chang pawhin ka pawm leh mai zel a, a nem zawkah ka ṭang leh ṭhin. Chu ka hmangaihna vang chuan kan inkar chu a hma aiin a ṭha lehzual a, a ṭhat phah ta zel a. Hmangaihna lipuiah chengin nun hlim takin kan hmang dun ta zel a.

Hun hlimawm tak hmangin kan vanglai chu a ṭha thei ang berin kan chên a. Hmun nuam leh hlimawm takah te kalin kan leng dun fova. Chung hun  kan hman dun zawng zawng chu kan tan hun chhinchhiah tlak a tling vek a ni.


Hun a liam a, Kum 2018 a lo her chhuah meuh chuan ka hmangaih em em, ka nun ai pawha ka ngaihhlut zawk chu kumtluanga ka nupui ni tur leh fatr nu ni a, ka thlahte thlahtu ni turin 'tiam tlat e' ka tihpui ta a.

- www.hzate.in

(Tihdarh loh ka tum naa, ka han tidarh ta mai a ni e. 24 November 2018 | Aizawl )

No comments:

Post a Comment